Read Mizo_Old_version Deuteronomy 11 Bible Online

Deuteronomy 11 - Mizo_Old_version bible

Deuteronomy 11

¹“Chuvângin, LALPA in Pathian chu in hmangaihin a thurochhiah te, a dân te, a rorêl te, a thupêk te in zâwm fo tûr a ni.

²Tûnah hian hre rawh u khai; LALPA in Pathian thununna te, a ropuizia te, a bân chakzia te, a bân pharzia te,

³a chhinchhiahna te, a thiltih, Aigupta ram chhûnga Aigupta lal Pharaoa chung leh a ram chhûng zawng zawnga a tih te,

⁴Aigupta sipaiho leh an sakawr leh an tawlailîr chunga a thiltih te; an ûm lai che ua, Tuifinriat Sen tuia a vûrtîr zia te, tûn thlenga LALPAN a tihboral zia te;

⁵hemi hmun in thlen hma loh zawnga thlalêra in chunga a thiltih dân te;

⁶Reubena fa Eliaba fapa Dathana leh Abirama-te chunga a tih dân te; leiin a kâ a âna Israel mite zawng zawng zînga anmahni leh an chhûngte leh an puan inte leh, an ran hruai zawng zawng a lem vek dân te hre lo in thlahte hnêna sawi ka ni lo va;

⁷in mit ngeia LALPAN thil ropui tak a tih zawng zawng hmutute hnênah a ni zâwk e.

⁸“Chuvângin, in lo chaka, luah tûra in va pan ram chu in luah theih nân leh hnutetui leh khawizu luanna ram, in pi leh pute leh an thlahte pêk tûra LALPAN chhia a chham ramah chuan in chên rei theih nân tûna thu ka pêk che u, thupêk zawng zawngte hi in zâwm tûr a ni.

¹⁰In va luah tûr ram chu, in lo chhuahna Aigupta ram, thlai huana chi in tuha, in kea tui in leih ṭhinna ang a ni lo va;

¹¹in va luah tûr ram chu tlângte leh ruam, vân ruahtui dawng ram a ni zâwk a.

¹²LALPA in Pathian zawn chhuah ram a ni a; LALPA in Pathian mit chu kum thar aṭanga a tâwp thlengin a fu reng ṭhîn.

¹³“Tin, heti hi a ni ang a, LALPA in Pathian chu hmangaih tûr leh, in thinlung zawng zawng leh in rilru zawng zawnga a rawng bâwl tûra ka thupêk, tûna ka pêk che u hi ṭhahnemngai taka in zawm chuan,

¹⁴in ram ruahtui chu a hun takah, ruahtui tla hmasa leh ruahtui tla hnuhnûng chu ka pe ang che u a; tichuan, in buh te, in uain te, in hriak te in seng lût thei ang.

¹⁵In rante tân pawh in ramah hlobet te ka awmtîr bawk ang a, nangni pawhin in ei ang a, in tlai ang.

¹⁶Fimkhur rawh u khai; chuti lo chuan, in thinlung chu bumin a awm ang a; in pêng ang a, pathian dang rawng te in bâwl ang a, in be mai dah ang e;

¹⁷chuti a nih chuan LALPA thin in chungah a lo thawk ang a, vân chu a khâr ang a, ruah a sûr lo vang a, lei chuan a rah a chhuah lo vang a; tichuan, LALPA pêk che u, ram ṭha tak ata hi in boral thuai mai ang.

¹⁸“Chuvângin, hêng ka thute hi in thinlung leh in rilruah khung ula, chhinchhiahna atân in bân in zem ang a; tin, in mit leh mit inkâra chal hrênna atân a awm bawk tûr a ni.

¹⁹Chûng chu in fate in zirtîr ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhîn tûr a ni.

²⁰Tin, in kawngka biangah te, in kawngkhârah te in ziak tûr a ni;

²¹tichuan, in pi leh pute pêk tûra chhia a chham ramah chuan in dam chhûng nî leh, in fate dam chhûng nî chu lei chunga vân nî ang khian a tisei ang.

²²LALPA in Pathian chu hmangaih tûr leh a kawng zawng zawng zawh tûr leh, amah vuan tlat tûra ṭhahnemngai taka hêng thu ka pêk che u thupêk zawng zawng hi in zawm phawt zawngin,

²³LALPA chuan hêng hnam zawng zawng hi a hnawh chhuahsak ang che u a, in aia ropui zâwk leh thiltithei zâwk hnamte ram chu in luah ang.

²⁴In kephaha in rah apiang chu in ta a ni ang a, thlalêr aṭang leh Lebanon tlâng aṭangin lui, Euphrates lui aṭang chuan thlang lam tuifinriat thlengin in ram a ni ang.

²⁵Tu mah rêng rêngin an chelh lo vang che u; LALPA in Pathianin in hnêna a sawi tawh ang khân, in va rah tûr ram zawng zawngah chuan nangmahni ṭihna leh hlauhna a awmtîr ang.

²⁶“Ngai teh u, vawiinah hian in hmaah malsâwmna leh ânchhia ka dah a:

²⁷LALPA in Pathian thupêkte, tûna ka pêk che u hi in zawm chuan, malsâwmna;

²⁸LALPA in Pathian thupêkte chu in zawm lohva, in hriat ngai loh pathian dangte be tûra ka thupêk che u in pênsan erawh chuan, ânchhia.

²⁹“Tin, heti hi a ni ang a, in va luah tûr rama LALPA in Pathianin a hruai luh che u hnuah chuan, malsâwmna chu Gerizim tlângah in dah ang a, ânchhia chu Ebal tlângah.

³⁰Ni tlâkna piah, Araba-a awm Kanaan-ho ram, Gilgal zâwn More sasaw sîr, Jordan râla mi a ni lâwm ni?

³¹LALPA in Pathianin a pêk che u ram va luah tûr chuan Jordan chu in kân tûr a ni a, in luah ang a, chutah chuan in awm ang.

³²Tin, tûna in hmaa ka dah, dân leh rorêl zawng zawng chu zâwm tûrin in fîmkhur tûr a ni.