Read Mizo_Old_version Deuteronomy 12 Bible Online

Deuteronomy 12 - Mizo_Old_version bible

Deuteronomy 12

¹“LALPA, in pi leh pute Pathianin a pêk che u ram in luaha, leilunga in awm chhûnga fîmkhur taka in zawm tûr dân te leh rorêl dânte chu hêngte hi a ni.

²In va luah tûr ram hnamten tlâng lian te, tlâng tê te, thing hring tin hnuaitea an pathiante rawng an bâwlna hmun zawng zawng chu in tichhe vek tûr a ni;

³an maichâmte in tichim ang a, an lungphunte in tisawm vek ang a, an Aseri-te in hâl tûr a ni; an pathian lem siam chawpte chu in kihsak ang a, chuta an hming chu in thai bo tûr a ni.

⁴Chutiang chuan LALPA in Pathian chungah in ti tûr a ni lo.

⁵LALPA in Pathianin hnam zawng zawng zînga a hming awmna tûr hmun, a la ruat tûr chu in zawng zâwk ang a, chutah chuan in kal tûr a ni.

⁶Chutah chuan in hâlral thilhlan te, inthawina te, in sâwma pakhat te, in kût thên thilhlan te, in thutiam te, in duh thua thilhlan te, in ran rual leh in berâm rual zînga piang hmasa berte in rawn la tûr a ni;

⁷tin, chutah chuan LALPA in Pathian hmaah in ei ang a, in kutkawih LALPA in Pathianin mal a sâwmna che uah chuan hlim takin in awm tûr a ni, in chhûngkuain.

⁸“Mi tinin mahni ṭha tih zâwng ang maia tûna kan tih ang hian in ti tûr a ni lo.

⁹LALPA in Pathianin a pêk che u ram leh chawlhna chu in la thleng rih si lo va.

¹⁰Jordan lui in kaia, LALPA in Pathianin a luahtîr tûr che ua in awma, him taka in awm theihna tûra in vêla hmêlma zawng zawng laka a chawlhtîr hunah che u erawh chuan heti hi a ni ang a,

¹¹LALPA in Pathianin a hming awmtîrna tûr a ruat hmuna rawn lâk tûra ka tih zawng zawng chu chutah chuan in rawn la tûr a ni, in hâlral thilhlan te, in inthawina te, in sâwma pakhat te, in kût thên thilhlan te, LALPA hnêna in tiam ṭha ṭhate chu;

¹²tin, LALPA in Pathian hmaah chuan hlim takin in awm ang, nangmahni leh in fapate, in fanute nên, in bâwihpate, in bâwihnute nên, in ina awm, Levi-hote nên, anni chuan in zîngah chanvo leh ram nei ve si hek lo.

¹³Hmun in hmuhna apiangah in hâlral thilhlante hlân mai lo tûrin fîmkhur rawh u khai;

¹⁴in hnamte zînga LALPAN a la ruat tûr hmunah chuan in hâlral thilhlante chu in hlân zâwk ang a, chutah chuan thu ka pêk zawng zawng che u chu in ti tûr a ni.

¹⁵Amaherawhchu, LALPA in Pathianin malsâwmna a dawntîr che u ang zêlin, in nunnain a châk ang ang chu in in ṭheuhvah in talh ang a, a sa in ei thei ang; thianghlim lote leh thianghlimte pawhin sangai te, sakhi te ang hi chu an ei thei ang.

¹⁶A thisen erawh chu in ei tûr a ni lo; tui angin leiah in leihbaw tûr a ni.

¹⁷“In inah chuan sâwma pakhat, in buh te, in uain te, in hriak te leh in ran rual leh berâm rual zînga piang hmasa ber te, in thutiama mi te, in duh thua thilhlan te, in kût thên thilhlan te chu in ei thei lo vang a;

¹⁸LALPA in Pathianin hmun a la ruat tûrah, LALPA in Pathian hmaah in ei zâwk tûr a ni, nangmahni leh in fapate leh in fanute, in bâwihpate, in bâwihnute, in khuaa awm Levi-hote nên; LALPA in Pathian hmaah in kutkawih apiangah hlim takin in awm tûr a ni,

¹⁹In rama in awm chhûng zawng Levi-ho chu thlauthla lo tûrin fîmkhur rawh u.

²⁰“LALPA in Pathianin a tiam che u anga in ram a tihzauva, in nunnain sa ei a châk avânga, ‘Sa ka ei ang,’ in tih hunah chuan, in nunnain a châk zâwng apiang sa chu in ei thei ang.

²¹LALPA in Pathianin a hming awmna tûr chu in hlat luattuk chuan, thu ka pêk che u ang khân LALPAN a pêk che u in ran rual leh in berâm rual zînga mi in talh ang a, in nunnain a châk ang zâwng chu in inah in ei tûr a ni.

²²Sangai sa te, sakhi sa te in ei ang maiin in ei ang a, thianghlim lote leh thianghlimte pawhin angkhat rengin in ei ang.

²³Thisen erawh chu ei lo tûrin fîmkhur rawh u; thisen chu nunna a ni si a; nunna chawpin sa chu in ei tûr a ni lo.

²⁴In ei hauh lo tûr a ni; tui angin leiah in leihbaw mai tûr a ni.

²⁵In ei tûr a ni lo; tichuan, LALPA mit hmuha thil dik in tih hian nangmahni leh in hnua in fate tân a la ṭha dâwn nia.

²⁶In thil thianghlimte leh in thutiama mite chauh keng ula, LALPAN hmun a la ruat tûrah chuan kal ang che u.

²⁷Tin, LALPA in Pathian maichâmah in hâlral thilhlan chu, a sa leh a thisen in hlân ang a; in inthawina thisente chu LALPA in Pathian maichâmah chuan in chhûng chhuak ang a, a sa chu in ei ang.

²⁸Hêng thu ka pêk zawng zawng che u hi ngun takin ngaichâng rawh u; tichuan, LALPA in Pathian mit hmuha thil ṭha leh thil dik in tih hian in tân leh in hnua in fate tân kumkhuain a la ṭha dâwn nia.

²⁹“LALPA in Pathianin in va hneh tûr hnamte a tihbosak che ua, an ram in luaha, in khawsak hnuah chuan,

³⁰tihborala an awmna angah khân in awh ve lohna tûrin fîmkhur ula, ‘Hêng hnamte hian engtin nge an pathian rawng an bâwl? An tih angin keini pawhin i ti ve ang u,’ tiin, an pathiante chungchâng thu te zâwt vêl suh u.

³¹Chutiang chuan LALPA in Pathian chungah in ti tûr a ni lo; an pathian chungah chuan LALPA ngaiha thil tenawm tinrêng, a huat tak maite chu an ti ṭhîn a; an fapate, an fanute ngei pawh an pathiante tân an hâl ṭhîn a ni.

³²“Tih tûra thu ka pêk che u apiang chu in ti tûr a ni; in belhchhah tûr a ni lo va, in tikiam tûr a ni hek lo.