Read Mizo_Old_version Deuteronomy 13 Bible Online

Deuteronomy 13 - Mizo_Old_version bible

Deuteronomy 13

¹“In zîngah zâwlnei emaw, mang neitu emaw an lo awma, chhinchhiahna emaw, thil mak emaw an entîr che ua,

²chhinchhiahna emaw, thil mak emaw an entîr che u a lo thlena, in hriat ngai loh, ‘Pathian dang i zui ang u khai, an rawng i bâwl ang u,’ in hnêna an tih chuan,

³chu zâwlnei emaw, mang neitu emaw thute chu in pawm tûr a ni lo; LALPA in Pathian chuan in thinlung zawng zawng leh in nunna zawng zawngin, LALPA in Pathian chu in hmangaih nge hmangaih lo tih hriat nân a fiah che u a ni e.

⁴LALPA in Pathian chu in zui ang a, amah chu in ṭih ang a, a thupêkte chu in zâwm ang a, a thusawite chu in pawm ang a, a rawng te in bâwl ang a, amah chu in vuan tlat tûr a ni.

⁵Tin, chu zâwlnei emaw, mang neitu emaw chu tihhlum tûr a ni. Aigupta ram ata hruai chhuaka, bâwih ata tlantu che u, LALPA in Pathianin zawh tûr thu a pêk che u kawng ata chu tipêng tûr che ua, LALPA in Pathian chunga helna thu a sawi avângin. Chutiang chuan in zînga thil ṭha lo chu in tibo tûr a ni.

⁶“I unaupa emaw, i fapa emaw, i nupui pawm lai emaw, i ṭhian bul emaw pawhin in thlahtute la biak ngai loh pathian dangte be tûrin an thlêm thei che u a,

⁷in bul hnaia chêngte pathian emaw, ram hla taka chêngte pathian emaw be tûrin an râwn thei che u a.

⁸Mahse, chutiang mi chuan an thlêm thlu tûr che u a ni lo, an thurâwn chu ngaithla suh ang che u. In thupin in zuah tûr a ni hek lo.

⁹In tihlum ngei ngei tûr a ni zâwk a; a tihlum tûrin kut i thlâk hmasa ang a, chumi hnuah mipui zawng zawngin.

¹⁰Lungin in dêng hlum tûr a ni, Aigupta ram aṭanga bâwih ata hruai chhuaktu che u LALPA in Pathian hnên ata tihpênna che u a zawn avângin.

¹¹Tichuan, Israel mi zawng zawngin an hria ang a, an hlau vang a, in zîngah chutiang suahsual rêng rêng chu an chîng tawh lo vang.

¹²“LALPA in Pathianin in awmna tûra a pêk che u in khaw pakhatah chuan,

¹³in zîng ata mi dukdaklo ṭhenkhat lo chhuaka, chumi khawpuia mite chu in hriat ngai loh pathian dangte be tûrin an hruai bo tih thu sawi in hriat chuan,

¹⁴zâwt vêl ula, zawng chhuak ula, ṭhahnemngai takin zâwt rawh u; tin, ngai teh u, thu dik a lo niha, chutiang thil tenawm in zîngah tih a ni tih hriat chian a nih chuan,

¹⁵khandaihin chumi khuaa awmte chu in tihlum ngei ngei tûr a ni a; a chhûnga awm zawng zawng, ran rualte nên khandaihin in tiboral vek tûr a ni.

¹⁶Tin, râllâk sum zawng zawng chu khawlaiah in la khâwm ang a; tin, khua leh râllâk sum zawng zawng chu LALPA in Pathian hnênah pumhâl thilhlanah in hâl ang a, lei pâwng mai a ni kumkhua ang a, din a ni leh tawh lo vang.

¹⁷Râllâk sum chu a enga mah in khawih tûr a ni lo; LALPA chuan a thinurna nasa tak chu a lamlêt ang a, zahngaihna a hmuhtîr ang che u a, a khawngaih ang che u a, LALPA in Pathian mit hmuha thil ṭha ti tûra thupêk zawng zawng, tûna ka pêk che u hi, in zawm phawt chuan a tipung dâwn che u nia, in pi pute hnêna chhia a lo chham tawh ang khân.