Read Mizo_Old_version Deuteronomy 14 Bible Online

Deuteronomy 14 - Mizo_Old_version bible

Deuteronomy 14

¹“LALPA in Pathian fate in ni a; mitthi avângin in inzai tûr a ni lo va, in mit hmul in mêt kâwng tûr a ni hek lo.

²LALPA in Pathian tân hnam thianghlim in ni si a, leilunga hnam zawng zawng zînga a pual bîk ni tûra LALPAN a thlan che u in ni a.

³“Thil tenawm rêng rêng in ei tûr a ni lo.

⁴Hêng sate hi a ni in ei theih tûr chu: bâwngpa te, berâm te, kêl te,

⁵sakhi te, sangai te, sakhipa te, sathâr te, ramkêl te, ramlâwi te, ramberâm te hi.

⁶Tin, sa tinrêng, tin kâka tin kâk chhuak, chaw ṭhial nawn chi tawh phawt zînga mi chu in ei thei ang.

⁷Amaherawhchu, hêng chaw pawh ṭhial nawn si, an tin pawh kâk site hi chu in ei tûr a ni lo: sanghâwngsei te, zupui te, sazupui te hi; chaw chu an ṭhial nawn na a, an tin a kâk loh avângin in tân a bawlhhlawh a ni.

⁸Tin, vawk hi a tin chu a kâk na a, chaw a ṭhial nawn loh avângin in tân a bawlhhlawh a ni; a sa in ei tûr a ni lo va, a ruang pawh in khawih tûr a ni lo.

⁹“Tuia chêng zawng zawngah hêngte hi in ei thei ang: pângparh leh phuhlip nei tawh phawt chu in ei thei ang a,

¹⁰pângparh leh phuhlip nei lo apiang chu in ei thei lo vang, in tân a bawlhhlawh a ni.

¹¹“Sava thianghlim zawng zawng chu in ei thei ang a.

¹²Hêngte erawh hi chu in ei tûr a ni lo: mupui te, lungdûp te, muarla te,

¹³mulukawlh tê te, ngawihûp te, mute chi rêng rêng te;

¹⁴choâk chi rêng rêng te,

¹⁵sava sâng te, vabak te, tuifinriat sava te, mu chi rêng rêng te,

¹⁶hrângkir te, chhimbuk te, chingpirinu te, chhimbuksialki te,

¹⁷tuivalawng te, mulukawlh te, lui dung mû te,

¹⁸kânghlai te, dîl sava chi rêng rêng te, chhuangtuar leh bâkte.

¹⁹Thla nei, kea kal chi zawng zawng chu in tân thil bawlhhlawh a ni a, in ei tûr a ni lo.

²⁰Sava thianghlim zawng zawng chu in ei thei ang.

²¹“Amaha thi chu eng mah in ei tûr a ni lo; in awmpui ram dang mite ei atân in pe thei ang a, hnam dang mite hnênah in hralh thei bawk ang; nangni zawng LALPA in Pathian tâna hnam thianghlim in ni si a. Kêlnotê chu a pui hnutêin in chhûm tûr a ni lo.

²²“Kum tin in lova thlai haw zawng zawng sâwma pakhat in tîl hrang ngei ngei tûr a ni.

²³LALPA in Pathian ṭih nachâng in lo hriat fo theih nân sâwma pakhat, in buh te, in uain te, in hriak te leh in bâwng rual leh in berâm rual zînga piang hmasa berte chu LALPA in Pathian hmaah, a hming awmna tûra a la ruat tûrah chuan in ei tûr a ni.

²⁴LALPA in Pathianin mal a sâwm hun che ua, LALPA in Pathianin a hming awmna tûr a la ruat tûr chu, a hlat lutuk avânga in tân kawng a thui luattuka in ken theih loh chuan,

²⁵pawisaah in chantîr ang a, pawisa chu in keng ang a, LALPA in Pathian hmun ruatah chuan in kal tûr a ni;

²⁶tin, pawisa chu in rilrua in duh ber, bâwngpa emaw, berâm emaw, uain emaw, zupui emaw, in rilrua in châk zâwng ang apiang atân in hmang ang a; chutah chuan LALPA in Pathian hmaah in ei ang a, hlim takin in awm tûr a ni, nangni leh in chhûngte nên;

²⁷Levi-ho in awmnaa awmte chu thlauthla hauh suh ang che u; in zîngah chanvo pawh, rochan pawh an nei ve si lo va.

²⁸“Kum thum a vei kum apiangin, chumi kuma in thil hâwng zawng zawnga sâwma pakhat chu in la khâwm vek ang a, in awmnaah in dah tûr a ni;

²⁹tin, in awmnaa awm Levi-ho pawh, in zînga chanvo, rochan pawh nei ve lote leh ram dang mite leh pa nei lote leh hmeithaite chuan an ei ang a, an lo khawsa ve thei ang; tichuan, LALPA in Pathianin in kutkawih zawng zawngah chuan mal a sâwm dâwn che u nia.