Read Mizo_Old_version Deuteronomy 15 Bible Online

Deuteronomy 15 - Mizo_Old_version bible

Deuteronomy 15

¹“Tin, kum sarih a vei kum apiangin ngaihdamna in siam tûr a ni.

²Ngaihdam dân chu hetiang hi a ni: leiba neitu apiangin an ṭhenawmte an lo pûktîr chu an ngaidam tûr a ni; a ṭhenawm pawh, a unau pawh a ṭhîng lui tûr a ni lo, LALPA ngaihdamna chu puan a nih tawh avângin.

³Hnam dang mi chu in ṭhîng lui thei ang a; amaherawhchu, in ta eng pawh in unaute lo hman chu in ngaidam tûr a ni.

⁴Hêng thupêk, tûna ka thupêk zawng zawng che u hi, pawm tûra LALPA in Pathian aw chu ṭhahnemngai taka in zawm phawt chuan, mi rethei rêng rêng in awm hauh lo vang a (LALPA in Pathianin luah tûra a pêk che u ramah chuan, LALPAN mal a sâwm ngei ngei dâwn che u a ni);

⁶LALPA in Pathian chuan a tiam che u angin mal a sâwm ang che u a, hnam tam tak in pûktîr ang a, nangni erawh chuan in pûk lo vang; hnam tam tak chungah ro in rêl ang a, in chungah erawh chuan ro an rêl ve lo vang.

⁷“LALPAN ram a pêk che u in awmnaah in unaute zîngah rethei an awm chuan, in unau retheite lakah chuan in rilru tikhauh suh ula, kawm hek suh u,

⁸an lakah chuan in thilphal ngei ngei tûr a ni a, an tlâkchhamnaa an mamawh phuhrûkna khawp in pûktîr tûr a ni.

⁹‘Ngaihdam kum, kum sarihna chu a lo thleng dâwn ta,’ tiin, in unau retheite chu hmu mawha eng mah pe duh lovin, in thinlungah dik lo taka ngaihtuahna awm lo tûrin fîmkhur rawh u; chuti lo chuan, ani chuan i chungchâng thu-ah LALPA a au vang a, in tân sual a lo ni dah ang e.

¹⁰In pe ngei ngei tûr a ni a; tin, in pêk hunah pawh in thinlung a hnûr hauh lo tûr a ni; chutiang thil avâng chuan a ni, LALPA in Pathianin in thiltih zawng zawngah leh, in kutkawih zawng zawngah mal a sâwm dâwn che u ni.

¹¹Chu ramah chuan mi retheite awm loh lai a awm dâwn si lo va; chuvângin, ‘In rama in unaute chungah te, tlachhamte chungah te, in mi retheite chungah te in thilphal ngei ngei tûr a ni,’ tiin thu ka pe che u a ni.

¹²“In unau, Hebrai pa emaw, Hebrai nu emaw, in hnêna an hralha, kum ruk in rawng an bâwl chuan, kum sarih kum chuan in chhuahtîr tûr a ni.

¹³Tin, in chhuahtîr hun chuan kutbêngin in chhuahtîr tûr a ni lo;

¹⁴in berâm ruala mi te, in hruiha mi te, in uain sâwr khura mi te ui lo takin in pe tûr a ni; LALPA in Pathianin mal a sâwm dân che u ang zêlin in pe tûr a ni.

¹⁵Aigupta ramah khân bâwih in ni tawh a, LALPA in Pathianin a tlan che u tih kha in hre reng tûr a ni; chu vâng chuan a ni, tûnah hian hêng thu hi ka pêk che u ni.

¹⁶Tin, heti hi a ni ang a, nangmahni leh in chhûngkua an ngainat avâng leh in intihthiam avânga in hnêna, ‘Ka chhuahsan lo vang che u,’ an tih tlat chuan,

¹⁷thîr zum in la ang a, kawngkhâr chhanah an beng in vit ang a; tichuan, kumkhuain in bâwih an ni ang. Tin, in bâwihnu pawh chutiang bawk chuan in ti tûr a ni.

¹⁸Chhuahtîr chu thil harah in ngai tûr a ni lo. Inhlawhfa thawh leh hnih thawkin kum ruk in rawng an bâwlsak tawh si che u a; tin, LALPA in Pathianin in thiltih apiangah mal a sâwm zêl ang che u.

¹⁹“In ran rual te, in berâm rualte zînga a pa, piang hmasa ber apiangte chu LALPA in Pathian pualah in pe tûr a ni; in bâwngpa piang hmasa ber chu hnathawkah in chhawr tûr a ni lo va, in berâm rualte zînga piang hmasa ber hmul chu in mêt tûr a ni lo.

²⁰LALPA in Pathian hmaah kum tinin LALPAN hmun a la ruat tûrah chuan in ei tûr a ni, nangni leh in chhûngte nên.

²¹Sawisêl kaina nei, a ke bai emaw, a mit del emaw, sawisêl kaina nei tawh phawt chu LALPA in Pathian hnêna inthawi nân in hmang tûr a ni lo.

²²Nangmahni awmhmunah in ei tûr a ni; thianghlim lote leh thianghlimte pawhin hêng sangai te, sakhi te ang hi chu in ei thei ang.

²³A thisen erawh chu in ei hauh lo tûr a ni; tui angin leiah in leihbaw mai tûr a ni.