Read Mizo_Old_version Deuteronomy 16 Bible Online

Deuteronomy 16 - Mizo_Old_version bible

Deuteronomy 16

¹“Abib thla chu thla serhah nei ula, LALPA in Pathian tâna kalhlên kût nân hmang rawh u: Abib thla hian a ni, LALPA in Pathian chuan Aigupta ram ata zânah a hruai chhuah che u ni.

²LALPAN a hming awmna a la ruat tûrah chuan, LALPA in Pathian hnênah in berâm rual zînga mi leh ran rual zînga miin, kalhlên kûtah in inthawi tûr a ni.

³Chhang dawidim telh nên in ei tûr a ni lo; in dam chhûng zawnga Aigupta ram ata in chhuah nî chu in hriat reng theih nân ni sarih chhang dawidim telh loh, hrehawmna chhang nên in ei tûr a ni, Aigupta ram aṭang chuan hmanhmawh taka chhuak in nih kha.

⁴In ram chhûngah ni sarih chhûng chu dawidim rêng rêng a awm tûr a ni lo va; tin, ni khat nî tlai lama in inthawina sa chu zankhuain a tûk zîng thlengin eng mah a awm tûr a ni lo.

⁵LALPA in Pathianin a pêk che u in awmna khawiah mah kalhlên kût inthawiin in inthawi thei lo vang a;

⁶LALPA in Pathianin a hming awmna a la ruat tûrah chauh chuan a ni ang; chutah chuan Aigupta ram ata in lo chhuah hun ang tlai lamah, ni tlâkah kalhlên kût inthawiin in inthawi tûr a ni a.

⁷Tin, in rawh ang a, LALPAN hmun a la ruat tûrah chuan in ei ang a; tin, zîngah in haw leh ang a, in puan inah in kal tûr a ni.

⁸Ni ruk chhûng chu chhang dawidim telh loh in ei tûr a ni; tin, a ni sarih nî chu LALPA in Pathian tân inkhâwmpui thianghlim a ni ang a, hna in thawk tûr a ni lo.

⁹“Chawlhkâr sarih in chhût ang a; in buh seng ṭan nî aṭangin chawlhkâr sarih chu in chhût tûr a ni.

¹⁰“LALPA in Pathianin mal a sâwm che u ang zêlin, in deh chhuah zînga mi mahni duh thua thilhlan chu hlânin, LALPA in Pathian tan chawlhkâr kût in nei tûr a ni;

¹¹tin, LALPA in Pathianin a hming awmna a la ruat tûrah chuan nangni nên, in fapa te, in fanu te, in bâwihpa te, in bâwihnu te, in awmnaa awm Levi-ho te, in zînga awm ram dang mi te, pa nei lo te, hmeithaite nên LALPA in Pathian hmaah hlim takin in awm ang a.

¹²Tin, Aigupta ramah khân bâwih in ni tih in hre reng tûr a ni a; tin, hêng dânte hi fîmkhur takin in zâwm tûr a ni.

¹³“In hrui ata leh in uain sâwr khur ata in chhêk khâwm zawhah, ni sarih chhûng bâwkte kût in nei tûr a ni;

¹⁴in kûtah chuan nangni nên, in fapa te, in fanu te, in bâwihpa te, in bâwihnu te, in awmnaa awm Levi-ho te, ram dang mi te, pa nei lo te, hmeithaite nên hlim takin in awm tûr a ni.

¹⁵LALPAN hmun a la ruat tûrah chuan LALPA in Pathian tân ni sarih in kût tûr a ni; LALPA in Pathianin in thil haw zawng zawngah leh in kutkawih zawng zawngahte mal a sâwm ang che u a, lâwm tak hlîrin in awm dâwn nia.

¹⁶Kum tin in mipa zawng zawngte chu vawi thum LALPA hmaah, hmun a la ruat tûrah chuan an inlan tûr a ni: chhang dawidim telh loh kûtah te, chawlhkâr kûtah te, bâwkte kûtah te; tin, LALPA hmaah tu mah kutruakin in inlan tûr a ni lo va,

¹⁷LALPA in Pathianin malsâwmna a dawntîr che u ang zêlin mi tinin an theih ang tâwk an pe tûr a ni.

¹⁸“LALPA in Pathianin a pêk che u in kulh kawngka zawng zawngah, in hnam ang zêlin, rorêltute leh hotute in insiam ṭheuh vang a, mipuite ro fel takin an rêlsak tûr a ni.

¹⁹Dik lo takin ro in rêl tûr a ni lo; tu mah duhsak bîk in nei tûr a ni lo; thilpêk in la tûr a ni hek lo; thilpêk chuan mi fingte mit a tihdelsak a, mi felte thu a tihkhawlohsak si ṭhîn a.

²⁰LALPA in Pathianin a pêk che u ram chu nungdama in luah theih nân a fel chauhva chu in zâwm tûr a ni.

²¹“LALPA in Pathian maichâm in la siam tûr sîrah chuan thing eng chi mahin Aseri in din tûr a ni lo.

²²LALPA in Pathianin a huat zâwng lung pawh in phun tûr a ni hek lo.