Read Mizo_Old_version Deuteronomy 17 Bible Online

Deuteronomy 17 - Mizo_Old_version bible

Deuteronomy 17

¹“Bawngpa emaw, berâm emaw, sawisêl kai leh ṭhat lohna nei rêng rêng chuan LALPA in Pathian hnênah in inthawi tûr a ni lo; chu chu LALPA in Pathian tân thil tenawm a ni si a.

²“In zîngah LALPA in Pathianin a pêk che u in awmna khawiah pawh mipa emaw, hmeichhia emaw pawh, thuthlung bawhchhiaa pathian dang rawng va bâwla, ka thupêk loh, nî emaw, thla emaw, vâna mi rêng rêng biaa, LALPA in Pathian mit hmuha thil ṭha lo ti an awma,

⁴an hrilh chia, nangin i lo hriata, ṭhahnemngai taka in zawha, tin, ngai teh, a lo dika, thu a chian chiaha chutiang thil tenawm Israel-te zînga tih a lo nih chuan,

⁵chu thil sual titu, mipa emaw, hmeichhia emaw chu in kulh kawngkhâr pâwnah, mipa emaw, hmeichhia emaw ngei chu in hruai chhuak ang a, lungin in dêng hlum tûr a ni.

⁶Hretu pahnih emaw, pathum emaw kâ aṭangin thi tûra chu tihhlum tûr a ni a, hretu pakhat kâ aṭang chuan tihhlum tûr a ni lo.

⁷Tihhlumna tûrah chuan hretute chuan kut an thlâk hmasa ang a, chumi hnuah mipui zawng zawngin. Chutiang chuan in zîng ata chu thil ṭha lo chu in tibo tûr a ni.

⁸“Thisen inchhuah thu-ah te, sum leh pai thu-ah te, invuak thu-ah te, in awmnaa inkhinna thu rêng rêngtea in tâna rêl harsa lutuk a lo awm chuan, LALPA in Pathianin hmun a la ruat tûrah chuan in kal ang a,

⁹chumi huna puithiam Levi-hote leh rorêltute hnênah chuan in kal ang a, in râwn ang a; tin, annin thu tihthlûk dân an lo kawhhmuh dâwn che u nia;

¹⁰tichuan, nangnin LALPAN hmun a la ruat tûr aṭanga thu tihthlûk dân an lo kawhhmuh che u ang chuan in ti ang a, an zirtîr che u ang zêlin fîmkhur takin in ti dâwn nia.

¹¹Thu tihthlûk dân an lo zirtîr che u leh rorêl dân an lo hrilh che u ang zêl chuan in ti ang a; thu tihthlûk dân an lo kawhhmuh che u chu ding lamah emaw, vei lamah emaw in pênsan tûr a ni lo.

¹²LALPA in Pathian hmaa rawngbâwla ṭang ṭhîn puithiam leh rorêltu thu pawm lova, tilui apiang, chu mi chu tihhlum tûr a ni. Israel zîng ata, chu thil ṭha lo chu in tibo tûr a ni.

¹³Tichuan, mi zawng zawngin an hria ang a, an hlau vang a, an tilui leh tawh lo vang.

¹⁴“LALPA in Pathianin ram a pêk che u in va thlena, in va luaha, in va awma, ‘Kan vêla hnam zawng zawngte ang bawkin lal i nei ang u,’ in tih hunah chuan,

¹⁵LALPA in Pathianin a thlana ngei chu lalah in nei tûr a ni a; in unau zînga mi pakhat in lalah in siam tûr a ni; hnam dang mi, in unau ni lo chu nangmahni awptu atân in siam tûr a ni lo.

¹⁶Amaherawhchu, sakawr a ngah tûr a ni lo vang a, sakawr a ngah theih nân Aigupta rama mite nên chuan inthurual tûr a ni bawk hek lo; LALPA chuan, ‘Tûn achinah chuan chumi lamah chuan in lêt leh tawh tûr a ni lo,’ in hnênah a ti tawh tlat si a.

¹⁷A rilru a vah bo loh nân nupui pawh a ngah tûr a ni lo va, tangkarua leh rangkachak pawh a ngah tûr a ni hek lo.

¹⁸Tin, heti hi a ni ang a, a ram lalṭhutthlênga a ṭhut hun chuan puithiam Levi-hote kawl ṭhin dân hi lehkhabuah a ziak chhâwntîr ang a;

¹⁹a kawl ang a, a dam chhûng zawng a chhiar ṭhîn tûr a ni, hêng dân leh hêng thuruat zawng zawng hi pawma, zâwma, ti tûra LALPA a Pathian ṭih dân a zir theiha,

²⁰a rilru a unaute chungah a dah lohva, ding lamah emaw, vei lamah emaw thupêk chu a pênsan lohna tûr leh, Israel-te zînga amah leh a thlahte a ramah hian an dam rei phah nân a chhiar ṭhîn tûr a ni.