Read Mizo_Old_version Deuteronomy 18 Bible Online

Deuteronomy 18 - Mizo_Old_version bible

Deuteronomy 18

¹“Puithiam Levi-ho, Levi hnam zawng zawng chuan Israel-te zîngah chanvo leh rochan an nei tûr a ni lo va; LALPA hnêna meia thilhlan leh a puala mi an ei tûr a ni.

²An unaute zîngah rochan chu an nei tûr a ni lo; an rochan chu an hnêna a sawi angin LALPA a ni si a.

³Inthawina hlântu mipuite laka puithiam pual tûr chu hêng hi a ni ang: bâwngpa pawh, berâm pawh, a dâr leh a bekbawr khinghnih leh a pumpui puithiam an pe tûr a ni.

⁴In buhbâl te, in uain te, in hriak haw hmasa te, in berâm hmul meh hmasak ber te in pe bawk tûr a ni.

⁵LALPA in Pathianin LALPA hminga rawngbâwla awm kumkhua tûrin, in hnam zawng zawng zîng ata a thlan an ni si a, anmahni leh an fapate nên.

⁶“Tin, Levi mi tu pawh a awmna Israel ram, in awmna a khawii pawh chhuahsana, a rilrua châk taka LALPAN a la ruat tûr hmunah a lo kal chuan,

⁷chuta LALPA hmaa awm ṭhîn Levi-ho, a unaute ang bawkin LALPA a Pathian hmingin rawng a bâwl tûr a ni.

⁸An puithiam man tiam lovin, mi dang pual ang ei tûr chu an chang ve tho vang.

⁹“LALPA in Pathianin a pêk che u ram in va thlen hun chuan, chûng hnamte thil tenawm tih ang chu in chîng ve tûr a ni lo.

¹⁰A fapa emaw, a fanu emaw meia kal tlangtîr te, aien chîng te, ṭhumvâwr chîng te emaw, mitlâkdawi hmang emaw te, dawithiam te,

¹¹dawi ât te, ramhuaizâwl rawih te, dawithiam te, mitthi biak chîng mite in zîngah an awm tûr a ni lo.

¹²Hêng thil ti mi apiangte hi LALPA ngaihin mi tenawm an ni si a; tin, hêng thil tenawm avâng hian a ni, LALPA in Pathianin a hnawh chhuahsak che u ni.

¹³LALPA in Pathian hmaah in ṭha famkim tûr a ni.

¹⁴“Chûng in va luah tûr rama hnamte chuan ṭhumvâwr leh aien chîngte an pawm ṭhîn a; nangni zawng LALPA in Pathianin chutiang tih chu a phal lo a ni.

¹⁵LALPA in Pathianin keimah ang hi in unaute zînga mi zâwlnei a siamsak ang che u. A thu chu in ngai tûr a ni,

¹⁶‘LALPA kan Pathian aw chu min hriattîr tawh suh la, he mei nasa tak hi min hmuhtîr leh tawh suh la, kan thi dah ang e,’ tia Horeb tlânga pun khâwm nîa LALPA in Pathian in duh dân ang khân.

¹⁷Tin, LALPA chuan ka hnênah, ‘An thusawi chu an sawi ṭha hle a.

¹⁸An unaute zînga nangmah ang zâwlnei ka siamsak a; a kâah ka thute ka dah ang a, a hnêna thu ka pêk apiang chu an hnênah a sawi ang a.

¹⁹Tin, heti hi a ni ang a, ka hminga ka thu a sawi pawm lo apiang chu ka ngaihtuah ang.

²⁰Ka hminga sawi tûr ka pêk loh sawi luitu zâwlnei emaw, pathian dangte hminga thusawitu zâwlnei emaw, chu zâwlnei chu tihhlum tûr a ni,’ a ti a.

²¹Tin, in thinlunga, ‘Engtin nge thu chu LALPA sawi a ni lo tih kan hriat ang?’ in tih chuan,

²²zâwlneiin LALPA hminga thu a sawia, a thil sawi chu a thlen lohva, a hlawhtlin loh chuan, chu chu a ni LALPA sawi lohva chu; zâwlnei chuan uangthuang takin an sawi mai mai a ni, amah chu in hlau tûr a ni lo.