Read Mizo_Old_version Deuteronomy 19 Bible Online

Deuteronomy 19 - Mizo_Old_version bible

Deuteronomy 19

¹“LALPA in Pathianin an ram a pêk che u hnam LALPAN a tihbova, in luaha, an khuaah te, an inah te in awm hunah chuan,

²LALPA in Pathianin luah tûra a pêk che u, in ramah chuan in tân khaw pathum in ruat tûr a ni.

³Tualthat apiang an tlân luhna tûrin, LALPAN a luahtîr tûr che u ram chu hmun thumah in ṭhen ang a, in ramrite in siam ang a, kawngte in buatsaih tûr a ni.

⁴“Tin, tualthat chuta tlân lûta him theite chu hêngte hi an ni: mi a ṭhenawm khawvêng tûn hma lama huatna pawh nei lêm lova that palh apiangte,

⁵mi a ṭhenawm khawvêng nên thing kit tûra ram kala, thing kit tûra a hrei han chêka, hreifang thlawnin ṭhenawm khawvêng chu vawm hlum ta ang te hi, chumi zînga khaw pakhatah chuan a tlân ang a, a him ang a,

⁶thisen phuba latu chuan a thinur lin laia tualthattu chu a ûma, kawng a thui avânga ûmphâkin a va vaw hlum hlauh dah ang e; tûn hma lama huatna te lo nei lêm lo a nih avângin thi âwm a ni si lo.

⁷Chuvângin, ‘Khaw pathum in tân in ruat tûr a ni,’ tiin thu ka pe che u a ni.

⁸Tin, LALPA in Pathianin in pi leh pute hnêna chhia a lo chham anga in pi leh pute pêk a lo tiam ram chu a pêk che ua, LALPA in Pathian chu hmangaih tûr leh a kawng zawh fo tûra a thupêk zawng zawng, tûna thu ka pêk che u hi in pawma, in ram chu a tihzau chuan hemi khaw pathum tiam lovin in tân khaw pathum dang in belhchhah leh ang,

¹⁰LALPAN luah tûra a pêk che u in ram chhûngah chuan pawi khawih lo thisen chhuah a awm lohva, in chunga thisen a awm loh nân.

¹¹“Amaherawhchu, miin a ṭhenawm khawvêng a huata, a châna, a beiha, thi khawp hiala a vuaka, chumi khaw zînga pakhata a tlân chuan,

¹²an khaw upaten mi tîr sela, chuta ta chu va hruai sela, tihhlum tûrin thisen phuba latu kutah hlân rawh se.

¹³In khawngaih tûr a ni lo va, in tâna ṭha tûrin Israel ram ata pawi khawih lo thisen chhuahna chu in tibo tûr a ni.

¹⁴“LALPA in Pathianin luah tûra a pêk che u ram, in luah tûr rama a hmaa an lo phun tawh in ṭhenawm ramri chu in sawn tûr a ni lo.

¹⁵“Mi a khawlohna emaw, a sualna rêng rêng emaw hretu pakhat chu a tâwk lo vang; hretu pahnih kâ emaw, hretu pathum kâ emawa thuin tihngheh tûr a ni.

¹⁶Hretu fel lo takin mi thil tidik lova a puh chuan,

¹⁷an inkhinnaah an pahnihin LALPA hmaah chumi huna puithiamte leh rorêltute hmaah chuan an ding tûr a ni;

¹⁸tin, rorêltute chuan ngun takin an dap ang a; tin, ngai teh, thuhretu chu hretu der a niha, a unau chu dâwta puh a nih chuan,

¹⁹a unau chunga tih a lo tum ang chuan a chungah in ti tûr a ni; chutiang chuan in zînga thil ṭha lo chu in tibo tûr a ni.

²⁰A la awmhote chuan an hria ang a, an hlau vang a, tûn hnuah chutiang thil ṭha lo rêng rêng chu in zîngah an ti tawh dâwn lo nia.

²¹In khawngaih tûr a ni lo va: nun aiah nun, mit aiah mit, ha aiah ha, kut aiah kut, ke aiah ke a ni ang.