Read Mizo_Old_version Deuteronomy 2 Bible Online

Deuteronomy 2 - Mizo_Old_version bible

Deuteronomy 2

¹“Tin, kan insuan a, LALPAN ka hnêna a sawi angin Tuifinriat Sen lamah thlalêrah kan lût ta a; Seir tlâng chu rei tak kan vêl a.

²Tin, LALPA chuan mi bia a,

³‘He tlâng hi in vêl rei tâwk tawh e; hmâr lam panin insuan tawh rawh u.

⁴Mipuite chu Seir tlânga awm, Esauva thlah in unaute ramah in kal tlang dâwn a ni; anni chuan an lo hlau vang che u a; chuvângin, fîmkhur hle ula;

⁵bei suh ang che u; an ram chu a khawii lai mah, kephaha rah khawp lek pawh ka pe dâwn hauh lo a che u; Seir tlâng chu a pualah Esauva ka pe tawh a ni.

⁶An chaw te chu in eiah sumin in lei ang a; tin, an tuite chu in inah sumin in lei bawk tûr a ni.

⁷LALPA in Pathian chuan in thawh apiangah te mal a sâwm ṭhîn che u a, he thlalêr zau tak hi in kal tlang dân te chu a hre si a; hêng kum sawmli chhûng zawng hian LALPA chu in hnênah a awm a, eng mah in tlâkchham loh kha, tiin thu pe rawh,’ tiin.

⁸Chutichuan, Elath leh Ezion-geber aṭangin Araba kawnga kalin Seir tlânga awm Esauva thlah kan unaute ram kan pal tlang a. “Tin, kan insuan a, Moab thlalêr lamah kan kal a.

⁹Tin, LALPA ka hnênah, ‘Moab-ho chu tibuai suh ula, râl beihin bei suh u; an ram chu in pualah ka pe dâwn lo a che u, Lota thlahte pualah Ar chu ka pe tawh a ni.’ ”

¹⁰(Tûn hma lam chuan Anak-ho angin mi lian leh tam leh mi sâng pui pui Em-ho an awm thîn a;

¹¹chûngho pawh chu Anak-ho ang bawka Repha-ho tih an ni a; nimahsela, Moab-ho chuan Em-ho an ti ṭhîn a ni.

¹²Tûn hma lam chuan Seir tlângah hian Hor-ho pawh an awm bawk ṭhîn a; nimahsela, Esauva thlahte hian an luahsak a; an that a, a hmunah chuan an awm ta a, Israel-hovin LALPAN an puala a pêk ram an tih ang khân.)

¹³“ ‘Chutichuan, tho ula, Zered lui chu kân rawh u khai,’ a ti a. Tichuan, Zered lui chu kan kân ta a.

¹⁴Kadesh-barnea aṭangin kan chhuak leh a, Zered lui kan kân a, LALPAN an hnêna chhia a chham anga, mipui zînga chumi chhuana râl kâp mi zawng zawng an mang vek inkâr chu, kum sawmthum leh kum riat a ni.

¹⁵Mipui zîng ata an boral dêr hma loh chuan anmahni tiboral tûrin LALPA kutin a tai reng bawk a.

¹⁶“Chutianga mipui zîng ata râl kâp mi zawng zawng an borala, an lo thih zawh hnu chuan heti hi a ni a,

¹⁷LALPAN min bia a,

¹⁸‘Vawiinah hian Moab ram, Ar chu i kal tlang tûr a ni a;

¹⁹tin, Amona thlahte ep i va thlen hnaih pawhin tibuai suh la, bei hek suh; Amon-ho ram chu i pualah ka pe dâwn lo che, Lota thlahte pualah ka pe tawh a ni.

²⁰(Chu pawh chu Repha-ho rama ngaih a ni bawk; chutah chuan tûn hma lamin Repha-ho an awm ṭhîn a. Nimahsela, Amon-ho chuan Zamzum-ho an ti ṭhîn a,

²¹Anak-ho anga mi lian leh tam leh mi sâng pui pui an ni a; nimahsela, LALPAN a tihboralsak a, an luah ve ta thung a, an hmunah chuan an awm ta a;

²²Seir tlânga awm Esauva thlahte chu Hor-ho a tihboralsak laia a tih ang khân; tichuan, an luah ve ta thung a, an hmunah chuan tûn thleng hian an la awm ta a ni.

²³Tin, Gaza thlenga khaw tê têa awm Av-ho chu Kaptor aṭanga lo chhuak Kaptor-hovin an tiboral a, an hmunah chuan an awm ta a.)

²⁴Tho ula, kal chhuak ula, Arnon ruam kân rawh u; ngai teh u, Amor mi Hesbon lal Sihona leh a ram chu ka pe tawh che u a ni. Luah phawt ula, râl beihin bei rawh u.

²⁵Vawiinah hian, vân hnuai chhîna hnam tin chungah chuan nangmah ṭihna leh hlauhna ka awm ṭantîr ang a, i chanchin an lo hria ang a, an khûr ang a, nangmah avângin na tak tuarin an awm ang,’ tiin.

²⁶“Tin, Kedemoth thlalêr aṭangin Hesbon lal Sihona hnênah rem thu kengin mi ka tîr a,

²⁷‘I ramah hian mi kal tlangtîr rawh khai; lamlianah zêl ka kal ang a, ding lamah emaw, vei lamah emaw pawh ka pêng lo vang e.

²⁸Ka eiah chaw a leiin sumin mi leitîr ang a, ka inah tui pawh sumin mi leitîr bawk ang a; Jordan ka kâna LALPA kan Pathianin min pêk ram ka luh hma loh chuan, Seir-a awm Esauva thlahte leh Ar-a awm Moab-hote mi tih ang khân mi kal tlangtîr ringawt mai rawh khai,’ tiin.

³⁰Nimahsela, Hesbon lal Sihona chuan a ramah min kal tlangtîr phal lo va; LALPA in Pathian chuan in kuta a pêk theihna tûr che uin a rilru a tikhauh va, a tiluhlul a ni, in hriat tâk ang hian.

³¹Tin, LALPAN ka hnênah, ‘Ngai teh, Sihona leh a ram chu ka pe dâwn ta che a ni, a ram chu nei tûrin luah phawt mai rawh,’ mi ti a.

³²Tichuan, Sihona leh a mite zawng zawng chu Jahaz-a min bei tûrin an lo thawk a.

³³Tin, LALPA kan Pathian chuan min pe a; tichuan, amah leh a fapate leh a mite zawng zawng chu kan that a.

³⁴Tin, chumi ṭum chuan a khua zawng zawng chu kan la a, chûng khuaa mihring zawng zawng chu, hmeichhia leh an fanau tê tête nên lam kan tiboral vek a, zuah rêng rêng kan nei lo va;

³⁵kan lâk khuaa râllaka kan lâk thil leh rante chauh kan pualah kan la a ni.

³⁶Arnon ruam fêma Aroer aṭanga Gilead thlengin, kan tân sâng lutuk khua a awm hauh lo mai a, LALPA kan Pathianin min pe vek a ni.

³⁷Amona thlahte ram chauh in hnaih lo a ni, Jabok lui lehlam kam zawng zawng leh tlâng rama khuate leh, LALPA kan Pathianin min khapna apiangte nên.