Read Mizo_Old_version Deuteronomy 20 Bible Online

Deuteronomy 20 - Mizo_Old_version bible

Deuteronomy 20

¹“In hmêlmate do tûra in chhuaha, sakawr te, tawlailîr te, mipuite in aia tam in hmuhin, anmahni chu in hlau tûr a ni lo; Aigupta ram ata hruai chhuaktu che u LALPA in Pathian chu in hnênah a awm si a.

²Tin, in indo dâwn hnaih chuan puithiam chuan mipuite chu va pan sela, bia sela,

³an hnênah, ‘Aw Israel-te u, hre rawh u khai, tûnah chuan in hmêlmate in do dâwn ta a ni a, zâm suh ula, ṭih suh ula, khûr hek suh u, anni chu hlau hek suh u;

⁴nangmahni chhandam tûra in hmêlmate beihsak tûr che ua in hnêna awm zêl chu LALPA in Pathian a ni si a,’ ti rawh se.

⁵“Tin, hotute chuan mipuite hnênah, ‘In thar saa la hlân lo in awm em? A inah haw leh rawh se, indonaah a va thi hlauh ang a, mi dangin an hlân dah ang e.

⁶Tin, grêp huan siama, a rah la chhawr lo in awm em? A in lamah haw leh rawh se, indonaah a thi hlauh vang a, mi dangin an chhawr dah ang e.

⁷Tin, nupui huala la nei lo in awm em? A in lamah haw leh rawh se, indonaah a thi hlauh vang a, mi dangin an nei dah ang e,’ tiin sawi rawh se.

⁸Tin, hotute chuan mipuite hnênah, ‘Hlau leh zâm in awm em? A in lamah haw rawh se, a unaute thinlung chu a thinlung angin a tuiral ve dah ang e,’ lo ti zêl rawh se.

⁹Tin, heti hi a ni ang a, hotuten mipuite hnêna thu an sawi zawh chuan mipuite hmahruaitu tûr sipai hotute an ruat tûr a ni.

¹⁰“Bei tûra khua in va hnaih hun chuan remna thu han sawi phawt ula.

¹¹Tin, heti hi a ni ang a, an lo rem che ua, an lo inpêk chuan heti hi a ni ang a, chuta mi awm zawng zawng chu hnathawka in rawih tûr an ni ang a, in rawng an bâwl ang.

¹²Tin, an lo rem duh loh che ua, an lo do dâwn che u chuan in hual ang a;

¹³tin, LALPA in Pathianin in kuta a pêk hun che u chuan, chuta mipa zawng zawng chu khandaihin in tihlum vek tûr a ni.

¹⁴Hmeichhia leh an fanau tê tête, rante leh khuaa thil awm rêng rêngte erawh chu chuta râllâk thil zawng zawng nên lam in pualah in la tûr a ni; tin, LALPA in Pathianin a pêk che u in hmêlmate laka râllâk thil chu in chên tûr a ni.

¹⁵Hêng hnamho khuate ni lo, in awmna aṭanga khaw hla zawng zawng chu chutiang chuan in ti zêl tûr a ni.

¹⁶LALPA in Pathianin luah tûra a pêk che u hêng hnam khuate erawh hi chu, LALPA in Pathianin thu a pêk che u angin, nung tawh phawt chu eng mah in zuah tûr a ni lo va,

¹⁷Hit mi te, Amor mi te, Kanaan mi te, Periz mi te, Hiv mi te, Jebus mi te chu in tiboral vek tûr a ni;

¹⁸an pathiante chunga an tih ṭhin thil tenawm zawng zawng chu an zirtîr lohna tûr che uin; chuti lo chuan, LALPA in Pathian chungah thil in tisual dah ang e.

¹⁹“Lâk tuma in beiha, khua chu rei tak in hual pawhin chûnga thingte chu hreipuiin in kit tûr a ni lo; in ei atân a ni a, in kit tûr a ni lo. Thing chu mihring em an niha in hual ni?

²⁰A rah ei loh mi thing a ni tih in hriatte erawh zawng in tichhiain in kit ang a, dotu che u khua chu a chhiat hma loh chuan kulhin in hung hnan tûr a ni.