Read Mizo_Old_version Deuteronomy 21 Bible Online

Deuteronomy 21 - Mizo_Old_version bible

Deuteronomy 21

¹“LALPA in Pathianin luah tûra a pêk che u ramah hian tâmlakah mi, tihhlumin lo awm ang sela, a tihlumtu hriat ni si lo sela,

²in upate leh in rorêltute an lo kal ang a, an tihhlumna vêl khua aṭang chuan an teh ang a;

³tin, heti hi a ni ang a, a ruang aṭanga khaw hnai ber, chumi khaw upate chuan bâwng rual zînga bâwnglâ, la chhawr loh, nghâwngkawl la bel loh an kai ang a;

⁴tin, chu khaw upate chuan bâwnglâ chu tui luanna, lei la leh loh leh eng mah la chîn lohna ruamah an kai chhuk ang a, ruamah chuan bâwngla ring chu an tan ang a;

⁵tin, Levia fapa puithiamten an rawn pan ang a, anni chu LALPA in Pathianin a rawngbâwltu leh LALPA hminga malsâwmtu atân a ruatte an ni si a; thubuai leh invuak thu chu an rêl ang ang a ni ang;

⁶tin, ruang hnaih ber khaw upate zawng zawng chuan ruama bâwngla ring an tan chungah chuan an kut an sil ang a;

⁷‘Kan kutin he thisen hi a chhuah lo va, kan mitin a hmu bawk hek lo.

⁸Aw Lalpa, i tlan chhuah i mi Israel-hote hi ngaidam la, i mi Israel-hote zîngah hian pawi khawih lo thisen chhuahna hi a awm phal suh ang che,’ an ti ang a, an ṭang tûr a ni. Tichuan, thisen thu-ah chuan ngaihdam an ni ang.

⁹Chutiang chuan LALPA mit hmuha thil ṭha tiin pawi khawih lo thisen chhuahna chu in tikiang tûr a ni.

¹⁰“In hmêlmate rûn tûra in kal chhuaha, LALPA in Pathianin in kuta a pêk che ua, sala in hruaia,

¹¹sal zînga hmeichhe hmêlṭha tak, in mi duh zâwng tak, nupui atâna in mi duh zâwng tak in hmuh chuan,

¹²in inah in hruai hâwng ang a, an lû an mêt ang a, an tin an zai ang a;

¹³an sal kawr chu an hlîp ang a, in inah an awm ang a, thla khat zet an nu leh an pa an sûn ang a, chumi hnuah chuan in pâwl ang a, an pasal in ni ang a, in nupui an ni ang.

¹⁴Tin, in lung a dum loh chuan an duh duhnaah an kal in phal tûr a ni, sum leh paiah in hralh hauh tûr a ni lo va, sal bâwlin in bâwl tûr a ni lo, in tihminghliau tawh si a.

¹⁵“Miin nupui pahnih nei ang sela, pakhat chu duhin pakhat chu hua sela, a duha leh a huata chuan fa hrinsak ve ve sela; tin, fapa upa ber chu a huata fa ni sela,

¹⁶a ro neih chu a fapate a khâwmtîr hunah chuan a duh taka fapa chu a fapa upa, a huata fa aia uah a siam tûr a ni lo.

¹⁷Amaherawhchu, a huata fa, a fa upa ber chu a neih zawng zawnga chan hnih huiah a siam tûr a ni; a chakna bul a ni a, fa tîr nihna chu a pual a ni.

¹⁸“Miin fapa luhlul tak, hel hmang tak nei ang sela, a nu leh a pa thu âwih lovin, an thununna pawm duh lo sela,

¹⁹a nu leh a pa chuan an kai ang a, an khaw upate hnênah an khaw kulh kawngka bulah an hruai tûr a ni.

²⁰Tin, an khaw upate hnênah chuan, ‘He kan fapa hi luhlul tak leh hel hmang tak a ni a, kan thu pawh a âwih duh lo va; inkhawhral hmang leh ruih hmang mi a ni,’ an ti tûr a ni.

²¹Tichuan, khuaa mi zawng zawng chuan lungin an dêng hlum tûr a ni; chutiang chuan in zîng ata, chu thil ṭha lo chu in tibo tûr a ni; tin, Israel mi zawng zawngin an hria ang a, an hlau vang.

²²“Tin, miin thihna khawp sual a tiha, tihhlum a niha thinglêra in khai chuan,

²³a ruang chu thingah chuan zankhuain a awm tûr a ni lo va, chumi nî la la chuan in phûm tûr a ni; thinga khai apiang chu Pathian ânchhe dawng a ni si a; LALPA in Pathianin luah tûra a pêk che u in ram chu in tihbawlhhlawh loh nân.