Read Mizo_Old_version Deuteronomy 22 Bible Online

Deuteronomy 22 - Mizo_Old_version bible

Deuteronomy 22

¹“In unaute bâwngpa emaw, an berâm emaw bo chu in hmuhin in ngawihsan mai tûr a ni lo va, in unaute inah in hruai hawsak leh ngei tûr a ni.

²Tin, in unaute chu in kiang hnaia awm an nih lohva, a neitu chu in hriat loh emaw a nih chuan, in in lamah in hruai haw ang a, in hnênah a awm reng ang a, in unauvin a rawn zawn hun hunah in lo pe leh tûr a ni.

³An sabengtung pawh chutiang bawk chuan in ti tûr a ni a, chutiang bawk chuan an silhfênte pawh in ti tûr a ni a, chutiang bawk chuan in unau thil hloh in chhar tawh phawt chu in ti tûr a ni a, in ngawih bopui tûr a ni lo.

⁴“In unaute sabengtung emaw, an bâwngpa emaw, kawnga tlu in hmuhin in ngawihsan mai tûr a ni lo va, in tun thawhpui ngei tûr a ni.

⁵“Hmeichhiain mipa thuamhnaw an inbel tûr a ni lo va, mipain hmeichhe silhfên an inbel tûr a ni hek lo; tu pawh chutiang ti apiang chu LALPA in Pathian ngaihin mi tenawm an ni.

⁶“Kalkawnga thingah emaw, leiah emaw sava bu, a puiin a no emaw, a tui emaw awm a awp lai in hmuh chuan a no chu a pui chawpin in la tûr a ni lo va,

⁷a pui chu chhuah ngei ngei tûr a ni a, a no erawh chu in la thei ang; chutichuan, in tân a ṭha ang a, in dam rei dâwn nia.

⁸“In thar in sak chuan, chuta mi an tlâka in in chu thisen chhuahna in a nih loh nân, in in chung in hung tûr a ni.

⁹Tin, in grêp huanah thil chi hnih in chîng tûr a ni lo; chuti lo chuan, in chi tuh leh in grêp huana thil hâwng zawng zawng chu LALPA pual a ni mai ang.

¹⁰“Bâwngpa leh sabengtung lei in leh duntîr tûr a ni lo.

¹¹Sahmul leh la tah pawlh in inbel tûr a ni lo.

¹²“In intuamna puan chu a tlâng paliah fêm in neihtîr tûr a ni.

¹³“Miin nupui a neiha, a pâwla, a huat leh sia,

¹⁴‘He hmeichhia hi ka nei a, ka han pâwl a, nula thianghlim a nihna ka hmu lo va,’ tia mualpho taka a siama, a hming a tihchhiat chuan,

¹⁵nula nu leh pa chuan kulh kawngkaah chumi khaw upate hnênah nula thianghlim a nihna chu an rawn tilang tûr a ni a;

¹⁶tin, nula pa chuan upate hnênah, ‘He mi hi ka fanu ka neihtîr a, a haw leh si a;

¹⁷tin, ngai teh u, “I fanu hi nula thianghlim a nihna ka hmu lo ve,” tiin mualpho takin a siam a; mahse, hêngte hi ka fanu nula thianghlim a nihna chu a ni alâwm,’ a ti ang a. Tichuan, chumi khaw upate hmaah chuan puan an phah ang a.

¹⁸Tin, chu khaw upate chuan chu mi chu an hrem ang a;

¹⁹Israel nula thianghlim a tihhmingchhiat avângin tangkarua sekel za an chawitîr ang a, nula pa chu an pe tûr a ni. Ani chu a nupui a ni ang a, a dam chhûngin a ṭhen thei lo vang.

²⁰Amaherawhchu, chumi thu chu a lo dika, nula chu nula thianghlim a nihna a lan loh chuan,

²¹nula chu a pa kawngkaah an hruai chhuak ang a, a awmna khuaa mite chuan lungin an dêng hlum ang, a pa ina nawhchizuara Israel-te zînga thil sual âtthlâk tak a tih avângin. Chutiang chuan in zîng ata, chu thil ṭha lo chu in tibo tûr a ni.

²²“Miin pasal nei a mutpui an hmuh chuan an pahnih chuan an thi tûr a ni, a mutpuitu mipa leh hmeichhia chu; chutiang chuan Israel zîng ata, chu thil ṭha lo chu in tibo tûr a ni.

²³“Nula thianghlim, mi nupui hual, miin khuaah a hmuha, a mutpui chuan,

²⁴an pahnihin khaw kulh kawngkaah in hruai chhuak ang a, lungin in dêng hlum tûr a ni; hmeichhia chu khuaa awm sia, a au loh avângin; tin, mipa chu a ṭhenawm nupui a tihhminghliau avângin; chutiang chuan in zîng ata, chu thil ṭha lo chu in tibo tûr a ni.

²⁵“Amaherawhchu, miin ramhnuaiah nula, mi hual a hmuha, a tihluiha a mutpui chuan, a mutpuitu mipa chauh chu tihhlum tûr a ni a,

²⁶a nula chu eng mah in tih tûr a ni lo, nula chungah chuan thihna khawp sual a awm lo; hetiang hi chu, mi a ṭhenawm beia that ang a ni a;

²⁷ramah a va tawng fuh a, mi hual nula chu a au va, chhantu an awm si lo va.

²⁸“Miin nula thianghlim, hual loh a hmuha, a mana, a mutpui an hmuh chuan,

²⁹a mutpuitu mipa chuan nula pa chu tangkarua sekel sawmnga a pe tûr a ni a; tin, ani chu a nupui a ni ang, a tihhminghliau tawh avângin; a dam chhûngin a ṭhen thei lo vang.

³⁰“Tu mân mahni pate nupui mutpuiin an pate an timualpho tûr a ni lo.