Read Mizo_Old_version Deuteronomy 23 Bible Online

Deuteronomy 23 - Mizo_Old_version bible

Deuteronomy 23

¹“Mi, a tilmu keh leh a zahmawh tan chu LALPA mite pung khâwm zîngah an tel tûr a ni lo.

²Sâwn chu LALPA mite pung khâwm zîngah an tel tûr a ni lo; chhuan sâwmna thlengin a thlahte chu LALPA mite pung khâwm zîngah an tel tûr a ni lo.

³“Amon mite leh Moab mite chu LALPA mite pung khâwm zîngah an tel tûr a ni lo. Chhuan sâwmna thlengin an zînga mi chu LALPA mite pung khâwm zîngah an tel hauh lo tûr a ni;

⁴Aigupta ram aṭanga in lo chhuah laia chhang leh tuia an lo hmuah loh che u avâng leh, ânchhe lawh tûr che ua Mesopotamia rama Pethor khuaa Beora fapa Balaama an rawih avâng khân.

⁵Nimahsela, LALPA in Pathian chuan Balaama thu chu a pawm duh lo va, LALPA in Pathian chuan a hmangaih che u avângin, LALPA in Pathian chuan ânchhia chu in tân malsâwmnaah a chantîr ta zâwk a.

⁶In dam chhûng zawng anmahni nêna inremna leh an hmuingîlna eng tikah mah in ngaihtuahpui tûr a ni lo.

⁷“Edom mite chu in lungten tûr a ni lo, in unaute an ni si a; Aigupta mite chu in lungten tûr a ni lo, an ramah chuan in va mikhual tawh avângin.

⁸An thlahte chu chhuan thumna aṭangin LALPA mite pung khâwm zîngah chuan an tel tûr a ni.

⁹“In hmêlmate beia in va riahna hmunah chuan thil ṭha lo tinrêng lakah in inthiarfihlîm tûr a ni.

¹⁰In zîngah tu pawh zâna amaha thil chhuak avânga bawlhhlawh an awm chuan, riahhmun ata a chhuak ang a, riahhmunah chuan a lût leh tûr a ni lo va;

¹¹amaherawhchu, khua a lo tlai lamin a inbual ang a; tin, ni tlâkah riahhmunah a lût leh tûr a ni.

¹²Tin, riahhmun pâwn lamah hmun in ruat ang a, chutah chuan in kal ṭhîn tûr a ni;

¹³tin, in hmanraw zîngah chuan suahdûr in nei ang a; tin, heti hi a ni ang a, chu chuan in va ṭhutna tûr chu in lai khuar ang a, in zunram thiar chu in vûr leh tûr a ni;

¹⁴LALPA in Pathian chu in riahhmunah nangmahni chhanhim tûr leh, in hmêlmate hlân tûr che uin a lo tel zêl si ṭhîn a; chuvângin, in riahhmun chu a thianghlim tûr a ni; chuti lo chuan, in zînga thil bawlhhlawh a hmu ang a, a kal bosan dah ang che u.

¹⁵“Chhiahhlawh, in hnêna a pu rawn tlân chhuahsan chu a pu hnênah in pe lêt leh tûr a ni lo.

¹⁶In awmnaa a duh ber a thlan apiangah chuan in zîngah a awm ve mai tûr a ni; in hnehchhiah tûr a ni lo.

¹⁷“Israela fanute zîngah nawhchizuar an awm tûr a ni lo va, Israela fapate zîngah mipa inzuar an awm tûr a ni hek lo.

¹⁸Nawhchizawrh man emaw, uicho man emaw, thutiam nân LALPA in Pathian inah in keng tûr a ni lo; a eng ve ve pawh chu LALPA in Pathian ngaihin thil tenawm a ni.

¹⁹“A pung ûmin in unaute in pûktîr tûr a ni lo; tangka lama pung emaw, ei tûr lama pung emaw, eng pawh a pung ûma pûktîr rêng rêng chu.

²⁰Ram dang mite chu a pung ûmin in pûktîr thei ang; nimahsela, in unaute chu a pung ûmin in pûktîr tûr a ni lo; chutichuan, in va luah tûr rama in kutkawih zawng zawngah LALPA in Pathianin mal a sâwm dâwn che u nia.

²¹“LALPA in Pathian hnêna thu in tiamin, rei rial lovin pêk nghâl tûr a ni; LALPA in Pathian chuan a phût dâwn ngei si che u a, in tân sual a lo ni mai ang.

²²Thutiam kawnga in insûm chuan in tân sual a ni lo vang.

²³In kâa chhuak tawh chu in ti ngei tûr a ni; duh thua thilhlan in kaa in tiam, LALPA in Pathian hnêna in tiam ang zêlin.

²⁴“In ṭhenawm grêp huana in kalin, in duhtâwkin in ei thei a; amaherawhchu, in êmah in khung tûr a ni lo.

²⁵In ṭhenawm buh ding lai hmuna in kalin, a vui chu in thliak thei a; amaherawhchu, in ṭhenawm buh ding laiah chuan favah in ruai tûr a ni lo.