Read Mizo_Old_version Deuteronomy 24 Bible Online

Deuteronomy 24 - Mizo_Old_version bible

Deuteronomy 24

¹“Miin nupui a neiha, a chunga thil mawi lo eng emaw a hriat avânga a mit a tlun loh chuan heti hi a ni ang a, inmâkna lehkha a ziaksak ang a, a pe ang a, a in ata a chhuahtîr tûr a ni.

²Tin, a in ata a chhuah hnu chuan mi dang a va nei thei ang.

³Tin, a pasal hnuhnûng zâwk chuan a huata, inmâkna lehkha a ziaksaka, a pêka, a in ata a chhuahtîr emaw, a pasal hnuhnûng zâwk, nupuia neitu chu a thi emaw a nih chuan,

⁴a pasal hmasa, amah kaltîrtu khân, tibawlhhlawh tawh a ni a, a nei leh thei lo vang; LALPA ngaihin tenawm a ni, LALPAN luah tûra a pêk che u ramah chuan sual in luhtîr tûr a ni lo.

⁵“Mi, nupui nei hlim chu sipaiah a kal tûr a ni lo va, eng hna thawkah mah phût tûr a ni lo; a in lamah kum khat chu a duh ang angin a awm ang a, a nupui nên hlim takin an awm tûr a ni.

⁶Buh râwt sawmna emaw, a chung lam lung emaw tu mah in hrênsak tûr a ni lo, mi nunna hrênsak in ni dâwn si a.

⁷“Tu pawh, Israela thlah, a unaute zînga mi rua, sal deha dek emaw, zuar emaw hriat chhuah an nih chuan, chu rûkrupa chu tihhlum tûr a ni; chutiang chuan in zîng ata, chu thil ṭha lo chu in tibo tûr a ni.

⁸“Phâr hri chungchâng thu-ah chuan, ngun taka dap chhuaka, puithiam, Levi-hote zirtîr dân ang zêla ti tûrin fîmkhur rawh u; anmahni thu ka pêk angin fîmkhur takin in ti tûr a ni.

⁹Aigupta ram ata in lo chhuahna kawnga LALPA in Pathianin Miriami chunga a tih dân kha hre reng rawh u.

¹⁰“Eng pawh in ṭhenawm in pûktîrin, a hrêng la tûrin a inah in lût tûr a ni lo.

¹¹Pâwnah in ding ang a, in pûktîra chuan hrêng chu pâwnah a rawn lâksak tûr che u a ni.

¹²Mi rethei a nih chuan a hrêng chu in mutpui tûr a ni lo;

¹³a silhfênah chuan a muta, a fak theih nân che u a hrêng chu ni tlâkah in pe kîr leh ngei tûr a ni; tichuan, LALPA in Pathian ngaihin in tân thil fel a ni ang.

¹⁴“In mi rawih, mi rethei leh tlachhamte chu in unau emaw, in ram, in awmnaa awm ram dang mi emaw pawh ni sela, in hnehchhiah tûr a ni lo;

¹⁵a thawh ni chuan a hlawh chu in pe tûr a ni a, niin a tlâk hnan tûr a ni lo; mi rethei a ni a, chutah chuan a rilru a dah ṭhîn a ni; chuti lo chuan, in chungchâng thu-ah LALPA a au vang a, in tân sual a lo ni dah ang e.

¹⁶“Fate avângin pate tihhlum tûr a ni lo va, pate avângin fate tihhlum tûr a ni hek lo; mi tin mahni sual avâng ṭheuhva tihhlum tûr an ni.

¹⁷“Ram dang mite leh pa nei lote ro chu dik lo takin in rêlsak tûr a ni lo va, hmeithai puan chu hrêngah in lâksak tûr a ni hek lo;

¹⁸nangni pawh Aigupta ramah khân bawih in ni tawh a, LALPA in Pathianin chuta ta chu a tlan che u a ni tih in hre reng tûr a ni; chu vâng chuan a ni hêng thil hi ti tûra thu ka pêk che u ni.

¹⁹“In lova buh in senga, buhphal in khâwm hmaih chuan in la leh tûr a ni lo, ram dang mi te, pa nei lo te, hmeithaite ta tûr a ni; tichuan, LALPA in Pathian chuan in kutkawih zawng zawngah mal a sâwm dâwn che u nia.

²⁰In olive thing in vuakin a zârte chu in vaw nawn tûr a ni lo; ram dang mi te, pa nei lo te, hmeithaite ta tûr a ni.

²¹In grêp, huana mi in lawhin a ṭo in zawng tûr a ni lo; ram dang mi te, pa nei lo te, hmeithaite ta tûr a ni.

²²Tin, Aigupta ramah khân bawih in ni tawh tih in hre reng tûr a ni; chu vâng chuan a ni, hêng thil hi ti tûra thu ka pêk che u ni.