Read Mizo_Old_version Deuteronomy 25 Bible Online

Deuteronomy 25 - Mizo_Old_version bible

Deuteronomy 25

¹“Mi an inkhin chuan, rorêlnaah an kal ang a, rorêltuten an lo rêlsak ang a, mi fel chu thiam an chantîr ang a, mi sual chu thiam loh an chantîr tûr a ni;

²tin, heti hi a ni ang a, mi sual chu vuak âwm a nih chuan, rorêltu chuan a muttîr ang a, a hmaah a vuaktîr tûr a ni, a sual dân azirin vuak zat tûr chu thliah a ni ang.

³Vawi sawmli thlenga vuak theih a ni ang a, chu aia chuangliam chu ni lovin; hei aia chuanga a vuak chuan in unaupa chu in mualpho lu dah ang e.

⁴“Sebâwngpain buh a chîl laiin a hmui in phuar tûr a ni lo.

⁵“Unauza awm ho sela, fapa nei lovin an zînga mi chu thi sela, a thia nupui chuan pâwn lama mi, mi dang a nei tûr a ni lo; a pasal unau chuan a rochung ang a, nupuiah a nei ang a, pasal unau tih tûr chu a chungah a ti tûr a ni.

⁶Tin, heti hi a ni ang a, a fa tîr hrinsak chuan Israel zînga a hming a bo loh nân a unau thi taa hming chu a pu tûr a ni.

⁷Tin, ani chuan a unaupa nupui chu neih a duh loh chuan, a unaupa nupui chu kulh kawngkaa upate hnênah a han chho vang a, ‘Ka pasala unaupain Israel zîngah a unau hming awmtîr zêl a duh lo va, pasal unaupa tih tûr chu ka chungah a ti duh lo,’ a han ti tûr a ni.

⁸Chutichuan, an khaw upate chuan ani chu an ko vang a, an bia ang a; tin, ani chuan, ‘Ka nei duh lo a ni,’ tia a ṭan tlat chuan,

⁹a unaupa nupui chuan upate hmaah a han pan ang a, a pheikhawk a hlihsak ang a, a hmaiah chil a chhâk ang a, ‘A unaupa chhûngkaw din duh lotu chungah chuan heti anga tih ni zêl rawh se,’ a ti ang a, a chhâng tûr a ni.

¹⁰Tichuan, ‘Chhûngkaw pheikhawk hlihsaka’ tiin Israel-te zîngah chuan a hming puttîr tûr a ni ang.

¹¹“Mi insual sela, a pakhat zâwka nupui chuan a sualpui lak ata a pasal chhanchhuak tûrin a zahmawhah pawhsak sela,

¹²a kut chu in tansak tûr a ni a, in khawngaih tûr a ni lo.

¹³“In ipah chuan khîn chi dang dang, a rit leh a zâng in nei tûr a ni lo.

¹⁴In inah tehna chi dang dang, a lian leh a tê in kawl tûr a ni lo.

¹⁵Khîn dik tak leh fel tak in nei tûr a ni. Tehna dik tak leh fel tak in nei tûr a ni si; tichuan, LALPAN ram a pêk che uah hian in dam rei dâwn nia.

¹⁶Chutiang thil titu, fel lo taka titu zawng zawng chu LALPA in Pathian ngaihin tenawm an ni.

¹⁷“Aigupta ram ata in lo chhuahna kawnga Amalek-ho lo tih dân che u kha hre reng rawh u;

¹⁸Pathian pawh hlau lovin in chauh lai leh in ngui laia kawnga an lo tawh che ua, in zînga hnufual mi chhiaṭhaho a hnufualte zawng an lo beih dân te kha.

¹⁹Chuvângin, heti hi a ni ang a, LALPA in Pathianin luah tûra ram a pêk hun che ua, in vêla in hmêlmate zawng zawng laka LALPA in Pathianin râlmuanna a pêk hun che u chuan, vân hnuai chhîna Amalek-ho hriat rengna chu in tibo hlauh tûr a ni; in theihnghilh hauh tûr a ni lo.