Read Mizo_Old_version Deuteronomy 26 Bible Online

Deuteronomy 26 - Mizo_Old_version bible

Deuteronomy 26

¹“Tin, heti hi a ni ang a, LALPA in Pathianin rochun leh luah tûra ram a pêk che u in va luha, in va awm hun chuan,

²LALPA in Pathianin a pêk che u in ram leilung rah haw hmasa ber ṭheuhte chu in rawn la ang a; bâwmah in dah ang a, LALPA in Pathianin a hming awmtîrna tûra a la ruat tûrah chuan in kal tûr a ni.

³Tin, chumi huna puithiam hnênah chuan in kal ang a, a hnênah, ‘Min pêk tûra kan pi leh pute hnêna chhia a lo chham ramah kan lo kal ta tih, vawiinah hian LALPA in Pathian hnênah kan tilang a ni,’ in ti ang a.

⁴“Tin, puithiam chuan in kut ata bâwm chu a la ang a, LALPA in Pathian maichâm bulah a hûng ang.

⁵Tin, nangnin LALPA in Pathian hmaah chuan, ‘Kan pu chu Suria mi, mi vâkvai a ni a, Aigupta ramah a zuk chhuk a, a zuk chêng a, tlêm tê an ni a; tin, chutah chuan hnam ropui tak, thiltithei tak, tam tak an lo ni ta a;

⁶tin, Aigupta mite chuan min tinawmnah a, min tirethei a, hna hautak tak min thawhtîr a;

⁷tichuan, LALPA kan pi leh pute Pathian chu kan au va, LALPA chuan kan aw chu a lo hria a, kan retheihzia te, kan rimzia te, hnehchhiah kan nihziate chu a hria a;

⁸tin, LALPA chuan Aigupta ram ata chu kut chak tak te, bân phar te, thil hlauhawm tak te, chhinchhiahna te, thil maktein min hruai chhuak a,

⁹he hmunah hian min hruai lût a, he ram, hnutetui leh khawizu luanna ram hi min pe a.

¹⁰Tin, ngai teh, aw LALPA, nangin min pêk leilung rah hmasa ber ṭheuhte kan rawn la e,’ in va ti tûr a ni. Tin, LALPA in Pathian hmaah chuan in hûng ang a, LALPA in Pathian hmaah chibai bûkin in kûn ang a;

¹¹tin, LALPA in Pathianin in chhûngkua te, nangni te, Levi mi te, in zînga ram dang mite thil ṭha a pêk zawng zawng che uah chuan hlim takin in awm tûr a ni.

¹²“Tin, kum thum kum, sâwma pakhat pêk kuma in thil hâwng zawng zawng sâwma pakhat in pêk zawh chuan, Levi mi te, ram dang mi te, pa nei lo te, hmeithaiten in awmnaah chuan an eia, an lo khawsak ve theihna tûrin in pe tûr a ni;

¹³tin, LALPA in Pathian hmaah, ‘I thu min pêk, i thupêk zawng zawng angin kan in ata thil thianghlimte chu kan dah chhuak a, Levi mi te, ram dang mi te, pa nei lo te, hmeithaite kan pe tawh a; i thupêk chu a enga mah kan bawhchhe lo va, kan theihnghilh hek lo va;

¹⁴kan lusûn laiin chuta mi chu kan ei lo va, kan bawlhhlawh laiin kan thehthang hek lo va, mitthi pualah kan pe hek lo; LALPA kan Pathian aw chu kan ngaichâng a, i thu min pêk zawng zawng ang chuan kan ti a ni.

¹⁵I awmna thianghlim vân aṭang chuan rawn en la, hnutetui leh khawizu luanna ram, kan pi leh pute pêk tûra chhia i lo chham tawh ang khân i mi Israel-te leh i leilung min pêk hi malsâwm ang che,’ in ti tûr a ni.

¹⁶“Vawiinah hian LALPA in Pathian chuan hêng dân leh rorêlte hi zâwm tûrin thu a pe che u a ni; chuvângin, in thinlung zawng zawng leh in rilru zawng zawngin in pawmin in zâwm tûr a ni.

¹⁷Vawiinah hian LALPA chu a kawngte zawha, a dânte, a thupêkte leh a rorêlte zâwma a awte ngaihchân tumin in Pathianah in thlang ta a;

¹⁸tin, vawiinah hian a tiam che u ang khân, a thupêk zawng zawng in zawma, ama pual bîk ni tûr leh,

¹⁹a lo sawi tawh anga LALPA in Pathian tân mi thianghlim in nih theihna tûr leh, hnam a siam zawng zawng zînga fak te, hmingṭhat te, chawimawi te hlawh tûrin LALPAN a thlang che u a ni,” a ti a.