Read Mizo_Old_version Deuteronomy 27 Bible Online

Deuteronomy 27 - Mizo_Old_version bible

Deuteronomy 27

¹Tin, Mosia leh Israel upate chuan mipuite chu, “Thupêk zawng zawng vawiina ka pêk che u hi pawm rawh u.

²LALPA in Pathianin ram a pêk che ua kal tûra Jordan in kân ni chuan heti hi a ni ang a, lung lian tak tak in phun ang a, lung chârna in hnawih tûr a ni.

³In kai hnuin a chungah chuan he dân thu zawng zawng hi in ziak tûr a ni; tichuan, LALPA, in pi leh pute Pathianin a lo tiam che u ang khân hnutetui leh khawizu luanna ram, LALPA in Pathianin a pêk che u ramah chuan in kal thei ang.

⁴Tin, Jordan lui in kân zawh chuan heti hi a ni ang a, vawiina thu ka pêk che u ang hian Ebal tlângah lungte chu in phun ang a, lung chârna in hnawih tûr a ni.

⁵Tin, chutah chuan LALPA in Pathian tân maichâm, lung maichâm in siam tûr a ni a, thîr hmanrua in hmang tûr a ni lo.

⁶LALPA in Pathian maichâm chu lung chher lohvin in siam tûr a ni a; chumiah chuan LALPA in Pathian tân hâlral thilhlante in hlân ang a;

⁷remna thilhlantein in inthawi ang a, chutah chuan in ei ang a, LALPA in Pathian hmaah chuan hlim takin in awm tûr a ni.

⁸Tin, lung chungahte chuan he dân thu zawng zawng hi fiah takin in ziak tûr a ni,” tiin thu an pe a.

⁹Tin, Mosia leh puithiam Levi-hote chuan Israel mi zawng zawng chu an bia a, “Aw Israel mite u, ngun takin ngaithla rawh u; vawiinah hian LALPA in Pathian mite in lo ni ta a.

¹⁰Chuvângin, LALPA in Pathian thu chu in awih tûr a ni a, vawiina thu ka pêk che u, a thupêkte leh a dânte chu in zâwm tûr a ni,” tiin.

¹¹Tin, chumi nî vêk chuan Mosian mipuite chu thu a pe a,

¹²“Jordan lui râl in kai hnu chuan mipuite malsâwm tûrin Gerizim tlângah hêngho hi an ding tûr a ni: Simeon hnam te, Levi hnam te, Juda hnam te, Isakar hnam te, Josef hnam te, Benjamin hnamte hi;

¹³tin, ânchhe lawh tûrin hêngho hi Ebal tlângah an ding tûr a ni: Reuben hnam te, Gad hnam te, Aser hnam te, Zebulun hnam te, Dan hnam te, Napthali hnamte hi.

¹⁴Tin, Levi-hote chuan an han sawi ṭan ang a, Israel mi zawng zawng hnênah chuan aw ring takin:

¹⁵“ ‘Themthiamte kutchhuak LALPA tâna tenawm milem din chawp emaw, chhûn chawp emaw vawng ru apiang chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti ang a, an lo chhâwn tûr a ni.

¹⁶“ ‘A nu emaw, a pa emaw zah lo apiang chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti tûr a ni.

¹⁷“ ‘A ṭhenawm ramri sawntu chu ânchhe dawngin awm rawh se,’ an ti ang a. Tin, mipui zawng zawng chuan, ‘Amen!’ an lo ti tûr a ni.

¹⁸“ ‘Kawng ata mitdel kawng lova kaltîrtu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.

¹⁹“ ‘Ram dang mi te, pa nei lo te, hmeithaite ro dik lo taka rêlsaktu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.

²⁰“ ‘A pa nupui mutpuitu chu ânchhe dawngin awm rawh se, a pa timualpho a nih avângin,’ an ti ang a. Mipui zawng zawng chuan, ‘Amen!’ an lo ti tûr a ni.

²¹“ ‘Ran eng pawh pâwltu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.

²²“ ‘A farnu, a pa fanu emaw, a nu fanu emaw mutpuitu chu ânchhe dawngin awm rawh se,’ an ti ang a. Mipui zawng zawng chuan ‘Amen!’ an lo ti tûr a ni.

²³“ ‘A pizawn mutpuitu chu ânchhe dawngin awm rawh se,’ an ti ang a. Mipui zawng zawng chuan ‘Amen!’ an lo ti tûr a ni.

²⁴“ ‘A ṭhenawm that rutu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.

²⁵“ ‘Pawi khawih lo thah nâna thamna latu chu ânchhe dawngin awm rawh se,’ an ti ang a. Mipui zawng zawng chuan, ‘Amen!’ an lo ti tûr a ni.

²⁶“ ‘He dân thu pawm nghehpui lotu chu ânchhe dawngin awm rawh se,’ an ti ang a. Mipui zawng zawngin, ‘Amen!’ an lo ti tûr a ni.