Read Mizo_Old_version Deuteronomy 28 Bible Online

Deuteronomy 28 - Mizo_Old_version bible

Deuteronomy 28

¹“Tin, heti hi a lo la ni ang a, LALPA in Pathian awkâ chu ngun taka in ngaihthlâka, vawiina thu ka pêk che u thupêk zawng zawng fîmkhur taka in zawm chuan, LALPA in Pathian chuan khawvêl hnam zawng zawnga chungnung berah a siam ang che u;

²tin, LALPA in Pathian thu in pawm phawt chuan hêng malsâwmna zawng zawng hi in chungah a lo awm ang a, a zui zêl ang che u.

³In lam leh ram lamahte chuan malsâwmin in awm ang a.

⁴In rîla rah te, in lei rah te, in ran rual pung, in bâwngpui leh in berâm rual pungte chu malsâwmin a awm ang.

⁵In bâwm leh in chhang hmehna thlêngte malsâwmin a awm ang a.

⁶In chhuakvâk te chu malsâwmin in awm ang a, in lo hâwng te pawh malsâwmin in awm ang.

⁷In hmêlma, nangmahni beitute chu LALPAN a tihtlâwmsak ang che u a; a bei tûr che uin kawng khatah an lo lût ang a, kawng sarihah an tlânchhia ang.

⁸LALPAN in buh in chungah te, in kutkawih zawng zawng chungahte malsâwmna thu a pe ang a; LALPA in Pathianin ram a pêk che uah chuan mal a sâwm ang che u.

⁹“In hnêna chhia a lo chham tawh angin, LALPA chuan ama tâna hnam thianghlimah a tinghet ang che u, LALPA in Pathian thupêkte in zawma, a kawngte in zawh phawt chuan.

¹⁰Tichuan, khawvêl hnam tinin LALPA ta in nih an hria ang a, an hlau vang che u.

¹¹Tin, nangmahni pêk tûra in pi leh pute LALPAN a lo tiam ramah chuan in rîla rahah te, in ran rualah te, in lei rahahte LALPAN nasa takin a tipung ang che u.

¹²LALPA chuan a hun taka in ram châwm tûr ruahtui pe tûr che u leh, in kutkawih zawng zawng malsâwm tûrin vân, a ro bâwm ṭha chu, a hawnsak ang che u a; tichuan, hnam tam tak in pûktîr ang a, nangni erawh chuan in pûk lo vang.

¹³Tin, LALPAN mei ni lovin lu-ah a siam ang che u a, a hnuaihnung ni lovin a chungnung zêl in ni ang; LALPA in Pathian thupêk awiha, tûna ka pêk che u hi fîmkhur taka pawma, vawiina thu ka pêk che u,

¹⁴a thute hi a enga mah, ding lam emaw, vei lam emawa pathian dangte zui leh rawngbâwl tûra in pênsan loh phawt chuan.

¹⁵“Amaherawhchu, heti hi a lo la ni ang a, LALPA in Pathian awkâ chu ngun taka in ngaihthlâk lohva, vawiina thu ka pêk che u thupêk zawng zawng hi fîmkhur taka in zawm loh chuan, hêng ânchhia zawng zawng hi in chungah a lo awm ang a, a nangchîng ang che u.

¹⁶In lam leh ram lamahte chuan ânchhia in dawng ang.

¹⁷In bâwm leh in chhang hmehna thlêngte chu ânchhe dawngin a awm ang.

¹⁸In rîla rah te, in lei rah te, in bâwngpui leh in berâm rual pungte chu ânchhe dawngin an awm ang.

¹⁹In vâk chhuak te chu ânchhe dawngin in awm ang a, in lo hâwng te pawh ânchhe dawngin in awm ang.

²⁰LALPAN in chungah, in kutkawih zawng zawngah ânchhia te, buaina te, zilhhaunate a rawn tîr ang a, in tlâwm ang a, in boral thuai ang; in thil tihsualte avânga mi hnuchhawn avângin.

²¹Luah tûra in luhna ram ata chu a tihboral hma loh che u chuan LALPAN hri a vawntîr tlat ang che u.

²²LALPAN ngawrna te, khawsik te, vûnna te, sat huam huamna te, khandaih te, rona te, ṭawihnatein a hrem ang che u a, in boral hma loh chuan a ûm zêl ang che u.

²³In chung lama in vân chu dâr a ni ang a, in hnuai lama lei chu thîr a ni ang.

²⁴In ram ruah chu vaivut leh vaivut khu-ah LALPAN a chantîr ang a; in boral hma loh chu vân aṭangin in chungah a lo tla ang.

²⁵“LALPAN in hmêlmate lakah a titlâwm ang che u a; anmahni bei tûrin kawng khatah in chhuak ang a, kawng sarihah in tlânchhia ang a; khawvêl hnam tin zîngah kil tin kil tangah in vâk in vâk ang.

²⁶In ruang chu chunglêng sava zawng zawng leh ramsa zawng zawng chaw a ni ang a, a hnawt botu an awm hauh lo vang.

²⁷Tihdam theih loh Aigupta khawihli te, ngâwtna te, vûnna te, uithaktein LALPAN a hrem ang che u.

²⁸Âtna te, mitdelna te, zâmnatein LALPAN a hrem ang che u a;

²⁹mitdelin thimthama a dap a dap angin chhûn ênah pawh in dap in dap ang a, in khawsak thu-ah chuan in hmuingîl lo vang; tin, hnehchhiah atân leh râllâk atân ngawt in ni châmchî ang a, chhanchhuak tûr che u tu mah an awm lo vang.

³⁰Nupui in hual ang a, mi dangin an mutpui ang; in in sa ang a, in luah lo vang; grêp huan in siam ang a, a rah chu in chhawr lo vang.

³¹In mit hmuhah in bâwngpate chu thah a ni ang a, a sa chu in ei lo vang; in sabengtungte chu an lâk luihsak ang che u a, an pe leh lo vang che u; in berâmte chu in hmêlmate pêk a ni ang; chhantu che u tu mah in nei lo vang.

³²In fanute, in fapate chu hnam dangte pêk an ni ang a, nilêngin anmahni ngaiin in thlîr reng ṭhîn ang a; in thlîrna lamah in mitte a chau vang a, eng mah tih theih in nei si lo vang.

³³In lei rahte leh in thawh rim rahte chu in hriat loh hnamin an ei zo vang a, hnehchhiah atân leh nêksâwr atân ngawt in ni châmchî ang;

³⁴chutichuan, chûng thil chu in hmuhin in ât phah ang.

³⁵LALPAN in khûpah te, in keah te, tihdam theih loh khawihli na chi a veitîr ang che u, in kephah aṭanga in chhîp thlengin.

³⁶“Nangmahni leh in lal chawpin in pi leh pute chena in hriat ngai loh hnam hnênah LALPA chuan a hruai ang che u a; chutah chuan pathian dang, thing leh lung rawng te in bâwl ang.

³⁷Tichuan, LALPAN a la hruai bona tûr che u hnam zawng zawng zîngah chuan mak tih leh hau bûr leh a chhe lama tehkhinna in lo la ni ang.

³⁸Lovah buh chi tam tak in feh chhuahpui ang a; tlêm tê chauh in seng ang, khauvin a ei zo vek dâwn a ni.

³⁹Grêp huan in siam ang a, in enkawl ang a; nimahsela, a uain chu in in lo vang a, grêp chu in lo hek lo vang, changpâtin a ei zo dâwn a ni.

⁴⁰In ram zawng zawngah olive thing in chîng ang a; nimahsela, a hriak chu in thih lo vang, in olive rahte chu a hlamtla zo vang.

⁴¹Fanu fapa in hring ang a; nimahsela, in ta an ni lo vang, salah an la hruai dâwn a ni.

⁴²In thei kûng zawng zawng leh in lei rah chu khau chan a ni ang.

⁴³“Ram dang mi, in zînga awmte chuan an sân khalh telh telh ang che u a, nangni chu in hnuai telh telh ang.

⁴⁴An pûktîr ang che u a, nangni chuan in pûktîr ve lo vang. Anni chu lu an ni ang a, nangni chu mei in ni ang.

⁴⁵Hêng ânchhia zawng zawng hi in chungah a lo awm ang a, a ûm ang che u a, a nangchîng ang che u, a tihboral zawh thleng che uin; a thupêkte leh a dân a pêk che u zâwm tûra LALPA in Pathian awkâ chu in ngaihthlâk loh avângin.

⁴⁶In chungah leh in thlahte chungah kumkhuaa chhinchhiahna leh mak tih atân a la awm ang.

⁴⁷Thil engkima in lo muk pawha LALPA in Pathian chu rilru lâwm tak leh hlim taka a rawng in bâwl loh avângin,

⁴⁸nangmahni bei tûra LALPAN a la rawn tirh tûr in hmêlmate rawng chu rilṭâm chung te, tuihâl chung te, saruak chung te, thil engkim tlachham chungtein in bâwl ang a; an tihboral hma loh che u chuan in nghâwngah thîr nghâwngkawl an bât ang.

⁴⁹Hla tak aṭangin kâwlkil ata nangmahni bei tûr hnam, LALPAN mupui bir angin a rawn tîr ang; an ṭawng in hriat loh hnam;

⁵⁰upate pawh pawisa lo leh ṭhalaite pawh duhsak chuang lo hnam kawlhsen tak chu.

⁵¹Tin, in ran rual pung te, in lei rah te, in boral hma loh zawng an ei ang a, buh te, uain te, hriak te, in bâwng pung te, in berâm rual note an zuahsak lo vang che u, in boralna an thlensak thleng che uin.

⁵²In ram zawng zawnga in rin pui, in kulh sângte a chim thlengin in kulh kawngka zawng zawngah an hual ang che u a, LALPA in Pathianin a pêk che u in ram zawng zawnga in kulh kawngka zawng zawngah an hual ang che u.

⁵³“In hmêlmaten an dan chêpna che u avângin an hualna che u leh an dan chêpnaah che u chuan in rîla rah, LALPAN a pêk che u in fanute leh in fapate sa in ei ang.

⁵⁴In zînga mi nun tluang, mi tlang takte pawhin an unaupa te, an nupui duh tak te, an la awmpui an fanaute takngial pawh an hmu mawh ang a;

⁵⁵eng mah an neih tawh loh avângin an fate sa an ei tûr chu a tuate mah an pe lo vang; an hualna che u leh an dan chêpna che u avangin.

⁵⁶In zînga hmeichhe awm no leh chhiaṭhate, an chhiaṭhat leh an awm no avânga lei pawh rap duh lote chuan an pasal duh tak te, an fanu te, an fapa te,

⁵⁷an pawm lai fa sên leh an fa la piang tûrte pawh an hmu mawh ang a; engkim an tlâkchham tawh avângin a rûkin an ei ang; an hualna che u leh an dan chêpna che u, in hmêlmaten in kulh kawngkaa an dan chêpna che u avângin.

⁵⁸“LALPA IN PATHIANA tih hming ropui tak leh hlauhawm tak hi, in hlauh theihna tûra he lehkhabua chuang thu zawng zawng hi fîmkhur taka in zawm loh chuan,

⁵⁹LALPAN nangmahni leh in thlahte chungah hri mak tak, hripui lêng reng, natna hrehawm tak lêng reng chi a lêntîr ang.

⁶⁰In hlauh hle ṭhin Aigupta ram hrite kha in chungah a lêntîr leh ang a, a vuan tlat ang che u.

⁶¹He dân lehkhabua chuang lo, natna leh hri tinrêng pawh in boral hma loh chu LALPAN in chungah a lêntîr ang.

⁶²Vâna arsi zât ni ṭhînte kha tlêm tê chauh in lo ni tawh ang, LALPA in Pathian awkâ chu in zawm loh avângin.

⁶³Tin, heti hi a ni ang a, a tiṭha tûr che u leh a tipung tûr che ua LALPA chu a lâwm ang khân, a tiboral tûr che u leh a tichhe tûr che uin LALPA chu a lâwm ang a, in va luah tûr in luhna ram ata chu sawn bo in ni ang.

⁶⁴“Tin, LALPA chuan kâwlkil aṭanga kâwlkil lehlam thlengin chi tin zîngah a tidarh ang che u a, chutah chuan thing leh lung - in pi leh pute chena in hriat ngai loh pathian dangte rawng in bâwl ang.

⁶⁵Chûng hnam zîngah chuan hahdamna rêng rêng in hmu lo vang a, in ke tân chawlhna rêng rêng a awm lo vang a; chutah chuan LALPAN khurhna rilru te, mit chauhna te, nguina rilrute a pe zâwk ang che u.

⁶⁶In nunna chu hlauthâwng rêng rêngin a awm ang a, chhûn leh zân hlau rengin in awm ang a, in nunnain ngaihngam taka awm a nei lo vang.

⁶⁷Zîng lamah chuan, ‘Tlai ni tawh sela aw!’ in ti ang a, tlai lamah chuan, ‘Zîng ni tawh sela aw!’ in ti ang; thil hlauhawm in thinlungin a hlauh tûr avâng leh in mita in thil hmuh tûr avâng chuan,

⁶⁸‘In hmu leh tawh lo vang,’ in hnêna ka tih kawngah chuan lawngin Aigupta ramah LALPAN a hruai leh ang che u; tin, chutah chuan in hmêlmate bawihpa atân te, bawihnu atân te in inzuar ang a, tu mân an duh dâwn lo che u a ni,” tiin.