Read Mizo_Old_version Deuteronomy 29 Bible Online

Deuteronomy 29 - Mizo_Old_version bible

Deuteronomy 29

¹Horeb tlânga an hnêna thu a thlun tiam lova, LALPAN Moab rama Israela thlahte hnêna Mosia thu a thluntîr, a thuthlung thute chu hêng hi a ni.

²Tichuan, Mosian Israel mi zawng zawng chu a ko va, an hnênah, “Aigupta rama Pharaoa chungah te, a mite zawng zawng chungah te, a ram zawng zawng chungah te in mit hmuh ngeia LALPAN thil a tih zawng zawng kha in hmu a;

³fiahna nasa tak te, chhinchhiahna te, thil mak te in mit ngeia in hmuh kha.

⁴Nimahsela, LALPAN vawiin thleng hian hriat thiamna thinlung te, hmuh theihna mit te, hriat theihna beng te a la pe lo che u a ni.

⁵Thlalêrah kum sawmli ka hruai ta che u a; in silhfênte chu in sin chul lo va, in pheikhawkte chu in bun chul lo bawk a.

⁶Kei hi LALPA in Pathian ka ni tih in hriat theih nân chhang in ei lo va, uain pawh, zupui pawh in in lo va.

⁷Tin, he hmun in lo thlen hian, Hesbon lal Sihona leh Basan lal Oga chu min do tûrin an lo thawk a, anni chu kan lo hneh a;

⁸tin, an ram chu kan la a, Reuben-ho te, Gad-ho te, Manase hnam zâtvete luah atân kan pe a.

⁹Chutichuan, in thiltih zawng zawnga in hmuingil zêl theih nân he thuthlung thute hi pawm ula, zâwm rawh u.

¹⁰“Tûnah hian in zain - in hnam puipa te,

¹¹in upa te, in hotu te leh Israel mi dang zawng zawng, in fanau tê tê te, in nupui te, in awmpui ram dang mi, in thing kittu leh in tui chawitute chenin LALPA hmaah in ding a ni.

¹²LALPA in Pathianin in pawm tûra thuthlung a siamah hian vawiinah in lût dâwn ta a;

¹³in thlahtu Abrahama te, Isaaka te, Jakoba te hnênah leh in hnêna a lo tiam tawh anga in Pathian a nih theih nân, ama mi atân a tinghet che u a ni.

¹⁴He chhechham leh thuthlung thu hi in hnênah chauh thlung ka ni lo va,

¹⁵vawiina LALPA kan Pathian hmaa dingte leh tûna kan hnêna awm ve lote hnênah pawh hian a ni

¹⁶(Aigupta rama kan awm dân te, hnam dangte tâwn tlanga in kal tlang dânte in hria a;

¹⁷an zînga an thil tenawmte leh an milem, thing leh lung te, tangkarua leh rangkachakte in hmu bawk a).

¹⁸“Chuti lo chuan, in zînga mipa emaw, hmeichhia emaw, chhûngkua emaw, hnam emaw, chûng hnam pathiante be tûr chuan an thinlungin tûnah hian LALPA kan Pathian chu hawisanin, in zîngah thil khâ leh sai chawr chhuahna bul te in lo awm dah ang e;

¹⁹tin, chuti a nih zawngin he chhechham thu hi hre reng sia, luhlul taka duh ang anga a awm pawha a tân eng mah pawi lo tûr anga mahni inthlamuan chawp chu,

²⁰chutiang mi chu LALPAN a ngaidam dâwn hauh lo va, LALPA thinurna leh a thîkna chuan chu mi chu a ur ang a, he lehkhabua ânchhe chuang zawng zawng hi a chungah a awm ang a, LALPAN vân hnuai ata a hming chu a thai bo zâwk ang.

²¹He dân bua chuang ânchhe thuthlung zawng zawng ang hian, Israel hnam zawng zawng zîng ata tihrangin thil ṭha lo lamah LALPAN a teltîr ang.

²²“Tin, ṭhangthar lo la awm tûr, in hnua in fate lo la awm tûr leh, ram dang mi hla tak aṭanga lo kal tûrte chuan, chumi rama hri leh LALPAN natna a veitîrte,

²³a ram pum pui chu kât leh chi leh kâng hlum, eng mah chîn lohna, eng mah chawr lohna, hlobette pawh chawr lohna, Sodom leh Gomorra leh Adma leh Zeboiim tihchhiat, LALPAN thinur leh thinrima a tihchhiat anga chhia a nih an hmuh hun chuan,

²⁴hnam tinin, ‘Eng vângin nge he ram hi hetianga LALPAN a tih? He thinur ling nasa tak hi engtizia nge ni?’ an ti ang.

²⁵Chutichuan, miin, ‘Aigupta ram ata a hruai chhuah laia a thuthlun, LALPA an pi leh pute Pathian thuthlung chu an hawisana,

²⁶pathian dang, an hriat ngai loh pathiante, anin a ruatsak ni lote rawng an bâwla, an biak vâng a ni.

²⁷Chu vâng chuan he lehkhabua chuang ânchhia zawng zawng thlentîr tûrin he ram chungah hian LALPA thin a thawk a ni.

²⁸Tin, thinrim leh thinur leh thinrim tak maiin an ram ata a pawt chhuak vek a, ram dangah a theh lût a ni, tûna an awm dân ang hian,’ an ti ang.

²⁹Thil inthupte chu LALPA kan Pathian ta a ni a; thil tihlante erawh chu, he a dân thu zawng zawng hi kan zawm theih nân keini leh kan thlahte ta kumkhua tûr a ni.