Read Mizo_Old_version Deuteronomy 3 Bible Online

Deuteronomy 3 - Mizo_Old_version bible

Deuteronomy 3

¹“Chutichuan, kan insuan a, Basan kawngah kan chho va; Basan lal Oga leh a mite zawng zawng chu Edrei-a min bei tûrin an lo thawk a.

²Tin, LALPAN ka hnênah, ‘Amah chu hlau suh, amah leh a mite zawng zawng leh a ram chu i kutah ka pe tawh diam a ni; Hesbon-a awm Amor-ho lal Sihona chunga i tih ang khân a chungah i ti dâwn nia,’ a ti a.

³“Chutichuan, LALPA kan Pathian chuan Basan lal Oga pawh a mite zawng zawng nên kan kutah a pe a; tichuan, pakhat tê mah zuahsak lovin kan that vek a.

⁴Chumi ṭum chuan a khua zawng zawng khaw sawmruk, Basan-a Oga ram, Argob ram zawng zawng chu kan la vek a; kan lâksak loh khaw pakhat tê mah a awm lo.

⁵Hêng khua zawng zawng hi kulh sâng tak tak, kawngkhâr leh kalhna nei vek a ni a, kulh nei lo khaw tam tak tiam lo pawhin.

⁶Hesbon lal Sihona chunga kan tih ang khân kan tiboral vek a, khuaa mihring zawng zawng chu kan tiboral vek a, hmeichhia leh an fanau tê tête nên lam.

⁷Amaherawhchu, ran zawng zawng leh khuaa râllâka kan lâk thilte chu kan pualah kan la a.

⁸Chumi ṭum chuan Jordan râla awm Amor-ho lal pahnih kut ata chu, Arnon ruam aṭanga Hermon tlâng thlenga ram chu kan la a;

⁹(chu Hermon chu Zidon-ho chuan Sirion an ti a, Amor-ho chuan Senir an ti a ni;)

¹⁰phai ram khua zawng zawng leh Gilead ram zawng zawng leh Basan ram zawng zawng nên, Basan rama Oga ram khua, Saleka leh Edrei thlengin.

¹¹(Basan lal Oga chauh a ni, Repha-ho zînga la awm chhun chu; ngai teh, a khum chu thîr a ni; Amona thlahte khua Raba-ah chuan a la awm reng a ni lâwm ni? Mihring tawnga tehin a dung lam tawng kua, a vâng lam tawng li a ni.)

¹²“Chumi ṭum chuan chumi ram chu kan luah a; Arnon ruam kianga Aroer aṭangin Gilead tlâng ram zâtve thlengin, chuta khaw awmte nên Reuben-ho leh Gad-ho ka pe a;

¹³tin, Gilead ram la awm zawng leh Oga ram Basan zawng zawng chu Manase hnam zâtvete ka pe a; Argob ram zawng zawng leh Basan ram zawng zawng chu. (Hei hi Rephaim-ho ram an ti bawk ṭhîn a.

¹⁴Manasea fapa Jaira chuan Argob ram zawng zawng, Gesur-ho leh Maakath-ho ram thlengin a la a, chûng chu, Basan chu, ama hming chawiin Havoth-jaira a ti a, tûn thlengin a la ti reng.)

¹⁵Tin, Gilead chu Makira ka pe a.

¹⁶Tin, Reuben-ho leh Gad-ho chu Gilead aṭanga Arnon ruam, ruam lai tak thlengin an ram chin atân ka pe a, Amona thlahho ramri, Jabok lui thlengin;

¹⁷tin, Araba leh Jordan pawh ramri atân Kinereth aṭanga Pisga chhak lam pangpêr hnuaia Tuifinriat Al, Araba tuifinriat thlengin.

¹⁸“Tin, chumi lai chuan, ‘LALPA in Pathianin he ram hi in pualah a pe che u a ni, Israela thlah, in unaute hmaah in mi huaisen zawng zawng chu inrâlthuamin han kal ve rawh se.

¹⁹Amaherawhchu, nangmahni anga in unaute chu LALPAN râlmuanga a siam hma leh LALPA in Pathianin Jordan râla ram a pêk chu an luah ve hma loh chuan, in nupuite leh in fanau tê tête leh in rante chu (ran in ngah tih ka hria a) in khua ka pêk tâk che uah hian lo awm sela; tichuan, in pual ṭheuh tûra ka pêk che uah hian in lo haw leh ṭheuh dâwn nia,’ tiin thu ka pe che u a.

²¹Tin, chumi lai bawk chuan Josua chu, ‘LALPA in Pathianin chûng lal pahnihte chunga thil a tih zawng zawng chu i mitin a hmu vek a; chutiang tak bawk chuan in luhna tûr ram zawng zawng chungah LALPAN a ti ang.

²²Anmahni chu hlau suh ang che u; a beihpuitu che u chu LALPA in Pathian a ni si a,’ tiin thu ka pe a.

²³“Tin, chumi lai vêk chuan, ‘Aw Lalpa PATHIAN, i chhiahhlawh hnênah hian i ropuizia leh i kut chak tak chu i lantîr ta phawt chu a ni a; vânah emaw, leiah emaw hian i thiltih ang leh i thiltih ropui tak ang ti thei Pathian hi tu nge awm?

²⁵Mi kaitîr la, Jordan râla ram ṭha tak, chu tlâng mawi tak leh Lebanon chu mi hmuhtîr teh khai,’ tiin, LALPA chu ka ngên chiam a.

²⁶Nimahsela, nangmahni avângin ka chungah LALPA chu a thinur hle a, ka thu chu a pawm lo va; tichuan, LALPA chuan, ‘Tâwk tawh rawh se, he thu-ah hian mi be leh tawh suh;

²⁷Pisga tlâng chhipah han chuang la, thlang lamah te, hmâr lamah te, chhim lamah te, chhak lamah te i mit han lên la, han thlîr rawh; Jordan hi i kân dâwn lo a ni.

²⁸Amaherawhchu, Josua hi thu pe la, fuih ṭha la, tichak rawh; hêng mipuite hi a hruai kai dâwn a, i han hmuh tûr ram chu a luahtîr dâwn a ni,’ mi ti a.

²⁹Chutichuan, Beth-peor ep ruamah chuan kan awm ta a nih kha.