Read Mizo_Old_version Deuteronomy 30 Bible Online

Deuteronomy 30 - Mizo_Old_version bible

Deuteronomy 30

¹“Tin, LALPAN a hnawh darhna che u hnam dang zînga in awm laia, in chungah hêng tûna malsâwmna leh ânchhia in hnêna ka sawi hi a lo thlenin, duh thlan tûr in neih hi hre reng ang che u.

²LALPA in Pathian lam in hawi leha, tûna thu ka pêk che u ang hian, nangni leh in fate nên, in thinlung zawng zawng leh in rilru zawng zawnga a awkâ in zawm hunah chuan,

³LALPA in Pathianin in sal nihna a tibo vang a, a khawngaih ang che u a, LALPA in Pathianin hnam tin zînga a tihdarhna che u ata a hruai khâwm leh ang che u.

⁴In zînga mi, vân tawp thlenga hnawh chhuah an awm chuan, LALPA in Pathianin chuta ta chu a hruai khâwm ang che u a, chuta ta chu a hruai chhuak ang che u;

⁵tin, LALPA in Pathianin in pi leh puten an luah ramah khân a hruai lût leh ang che u a, in luah ang a; ani chuan a tihmuingîl ang che u a, in pi leh pute khûmin a tipung ang che u.

⁶Tin, in nun theihna tûra LALPA in Pathian chu in thinlung zawng zawng leh, in rilru zawng zawnga in hmangaih theihna tûrin, LALPA in Pathianin in thinlung leh in thlahte thinlung serh a tansak ang che u.

⁷Tin, LALPA in Pathianin hêng ânchhia zawng zawng hi a tiduhdahtu che u, in hmêlmate leh a hawtu che u chungah a awmtîr ang.

⁸Tin, in lo hawi leh ang a, LALPA awkâ hi in pawm ang a, vawiina thu ka pêk che u, a thupêk zawng zawngte hi in zâwm ang.

⁹“Tin, LALPA in Pathian chuan in kutkawih zawng zawngah te, in rîla rahah te, in bâwng rual pungah te, in lei rahahte nasa takin a tipung ang che u a, in pi leh pute chunga a lâwm ang khân in chungah LALPA a lâwm leh ang;

¹⁰he dân bua chuang a thupêkte, a dânte zâwm tûra LALPA awkâ in zawma, in thinlung zawng zawng leh in rilru zawng zawnga LALPA in Pathian lam in hawi phawt chuan.

¹¹“He thupêk, tûna ka pêk che u hi in tân a har lutuk lo va, a hlat lo bawk che u a ni.

¹²“ ‘Kan hriata kan zawm theihna tûrin tu nge vânah min kalsak ang a, min han lâksak ang?’ tih tûrin vâna mi a ni lo va.

¹³‘Kan hriata kan zawm theihna tûrin tuifinriat râlah tu nge min kalsak ang a, min rawn lâksak ang?’ tih tûrin tuifinriat râla mi a ni hek lo.

¹⁴In zawm theih nân thu chuan a hnaih hle che u a, in kâah leh in thinlungah a awm a ni.

¹⁵“Tûnah hian in hmaah nunna leh ṭhatna, thihna leh thil ṭha lo ka dah a;

¹⁶LALPA in Pathian hmangaih tûr te, a kawng zawh tûr te, a thupêk te, a dân te, a rorêlte pawm tûra tûna thu ka pêk che u hi in zawm chuan nungdamin in awm ang a, in lo pung ang a, in va luah tûr ramah chuan LALPA in Pathianin mal a sâwm dâwn che u a ni.

¹⁷Amaherawhchu, in thinlungin khaw dang a hawia, in ngaihthlâk lohva, hruai bova in awma, pathian dangte in biaka, a rawng te in bâwl chuan,

¹⁸in boral ngei ngei ang tih tûnah hian ka hrilh che u a ni; Jordan lui kâna, luah tûra in va luhna ramah chuan in dam rei lo vang.

¹⁹In hmaah nunna leh thihna, malsâwmna leh ânchhia ka dah tih tûnah hian in chungchâng thua hretu atân lei leh vân ka ko a ni; chutichuan, nunna chu thlang rawh u, in nun theih nân, nangni leh in thlahte nên;

²⁰LALPA in Pathian hmangaiha, a awkâ awiha, amah vuan tlatin; amah chu in nunna, in dam reina a ni si a; tichuan, in pu Abrahama te, Isaaka te, Jakoba te chhechhama pêk a tiam ramah chuan in awm dâwn a ni,” a ti a.