Read Mizo_Old_version Deuteronomy 31 Bible Online

Deuteronomy 31 - Mizo_Old_version bible

Deuteronomy 31

¹Tin, Mosian Israel mi zawng zawng hnênah hêng thu hi a va sawi a.

²An hnênah, “Tûnah chuan kum za leh sawmhnih ka lo ni ta a; ka chhuakvâk thei tawh lo va; tin, LALPAN, ‘He Jordan lui hi i kân lo vang,’ mi ti a.

³LALPA in Pathian chuan in hma a hruai ang a; hêng hnamte hi a tihbosak ang che u a, an ram chu in luah ang; tin, LALPAN a lo sawi tawh angin Josuan in hma a hruai ang.

⁴Tin, LALPAN Amor-ho lalte, Sihona leh Oga leh an ram chunga a tih ang khân an chungah a ti ang; anni chu a tiboral a nih kha.

⁵LALPAN anni chu a hlân ang che u a, thu ka pêk che u thupêk ang zawng zawng khân an chungah in ti tûr a ni.

⁶Chhel tak leh huai takin awm ula, ṭih suh ula, anni chu hlau hek suh u; in hnêna kala chu LALPA in Pathian a ni si a; a tithlâwn lo vang che u a, kal pawh a kalsan tawp lo vang che u,” a ti a.

⁷Tin, Mosian Josua chu a ko va, Israel mite zawng zawng mit hmuhah a hnênah, “Chak tak leh huai takin awm rawh, hêng mite hnênah hian an pi leh pute LALPAN chhechhama pêk a lo tiam tawh ramah chuan i kal tûr a ni a, anniho hi i luahtîr tûr a ni.

⁸Tin, i hmahruaitu chu LALPA a ni ang a, i hnênah a awm zêl ang a, a tithlâwn lo vang chia, kal pawh a kalsan tawp lo vang che; hlau suh la, zâm hek suh,” a ti a.

⁹Tin, Mosia chuan chu dân chu a ziak a, LALPA thuthlung bâwm zâwntu Levia fapa puithiamte leh Israel upateho zawng zawng chu a pe a.

¹⁰Tichuan, Mosian, “Kum sarih kum, ngaihdam kum apianga bâwkte kûtah,

¹¹hmun a la ruat tûra Israel mi zawng zawng LALPA in Pathian hmaa an rawn inlan hunah, he dân hi Israel mi zawng zawng hriatah in chhiar tûr a ni.

¹²“Mipuiho a hmei a pa, in fanau tê tê te, in awmpui ram dang mi te, anni chuan an ngaihthlâka, an zira, LALPA in Pathian chu an ṭiha, he dân thu zawng zawng hi fîmkhur taka an zawm theih nân leh,

¹³an fate, la hre ve lote pawhin an hriata, Jordan lui kâna in va luah tûr rama in awm chhûng zawng zawnga LALPA in Pathian ṭih an zir theih nân ko khâwm rawh u,” tiin thu a pe a.

¹⁴Tin, LALPAN Mosia hnênah, “Ngai teh, i thih hun a lo hnai ta a; Josua chu ko la, inbiakna puan inah chuan va inlan rawh u, thu ka pe dâwn e,” a ti a. Tin, Mosia leh Josua chu an kal a, inbiakna puan inah chuan an va inlan a.

¹⁵Tin, LALPA chu Puan Inah chuan chhûmdingin a inlâr a; tin, chhûmding chu Puan In kawngka lu chungah chuan a ding a.

¹⁶Tin, LALPAN Mosia hnênah, “Ngai teh, i pi leh pute hnênah i muhîl dâwn ta a, hêng mite hi an tho vang a, an va awmna tûrte zînga ram dang pathiante lakah chuan an uirê ang a, mi hawisan ang a, ka thuthlung an hnêna ka thlun chu an bawhchhia ang.

¹⁷Chutichuan, chumi hun chuan an chungah ka thin a thawk ang a, ka hawisan ang a, ka bîkbosan ang a, an ral ang a, thil ṭha lo leh manganna tam tak an chungah a thleng ang a; chutichuan, chumi ni chuan, ‘Kan Pathian kan zînga a awm loh avângin hêng thil ṭha lo hi kan chungah a lo thleng a ni lâwm ni?’ an ti ang a.

¹⁸Pathian dangte lam hawia thil ṭha lo an la tih tûr zawng zawng avâng chuan, an lakah chumi hun chuan ka inthup ngei ngei dâwn a ni.

¹⁹“Chuvângin, hetiang hla hi in tân phuah la, Israela thlahte zirtîr rawh; Israela thlahte chungchâng thu-ah he hla hi mi hriatpuitu a nih theih nân vawntîr rawh.

²⁰An pi leh pute hnêna chhechhama ka tiam, hnutetui leh khawizua luang ramah chuan ka hruaia, ei leh bâra an awma, an tlaia, an lo thau hun meuh chuan pathian dangte lam an hawi ang a, an rawng te an bâwl ang a, mi hmusit ang a, ka thuthlungte an bawhchhe dâwn a ni.

²¹Tin, heti hi a ni ang a, thil ṭha lo leh manganna tam tak an chunga a lo thlen hunin, he hla hi a hriat chhuahtîrtu a ni ang; an thlahte kâ aṭangin theihnghilh theih a ni dâwn si lo va; tûnah ka chhechham rama ka hruai hma rêng pawhin an suangtuah vêl dân chu ka hre sa tawh reng a ni,” a ti a.

²²Chutichuan, Mosian chu hla chu chumi ni la la chuan a phuah a, Israela thlahte a zirtîr a.

²³Tin, Nuna fapa Josua chu a fuih a, “Chhel tak leh huai takin awm rawh khai; Israela thlahte chu an hnêna chhechhama ka tiam ramah chuan i hruai lût dâwn a ni; tin, i hnênah ka awm zêl ang,” a ti a.

²⁴Tin, heti hi a ni a, Mosian he dân thute hi lehkhabua a ziak zawha peih diam a nih hnuin,

²⁵thuthlung bâwm zâwntu Levi-hote chu Mosian,

²⁶“He dân bu hi la ula, in chungchâng thua hretu atân LALPA in Pathian thuthlung bâwm sîrah dah rawh u.

²⁷Hel in chînzia leh in luhlulziate ka hria a ni; ngai teh u, tûna ka la dampui lai che u mahin LALPA chungah in hel ṭhîn a; ka thih hnu lek phei chuan eng ti takin nasa ang maw!

²⁸An beng hriata hêng thu hi ka sawia, an chungchâng thua hretua lei leh vân ka koh theih nân in hnam puipa zawng zawngte, in hotute mi koh khâwmsak rawh u.

²⁹Ka thih hnu chuan nasa takin in intichhia ang a, ka thupêk che u kawng ata hi in pêng ang tih ka hre reng a ni; tin, a tâwpah phei chuan thil ṭha lovin a tlâkbuak ang che u; in kut thiltiha tithinur tûra LALPA mit hmuha thil ṭha lo in tih dâwn avângin,” tiin thu a pe a.

³⁰Tichuan, Mosian Israel pung khâwmho zawng zawng beng hriatah chuan he hla thu hi a tâwp thlengin a sawi vek a: