Read Mizo_Old_version Deuteronomy 32 Bible Online

Deuteronomy 32 - Mizo_Old_version bible

Deuteronomy 32

¹“Beng lo chhi ru, vânte u, ka hril dâwn e; Ka ṭawngkam chhuak leilungin ngai se:

²Ruahtui angin ka thu chu a sûr ang, Dai angin ka thusawi chu a far ang; Hlobet no dep chunga ruah ang leh, Hnim hnah chunga ruah angin.

³ LALPA hming chu ka puang dâwn e: Ropuina kan Pathian pe ru.

⁴“Lungpuia chu, a thiltih a fel famkim; A awm dân zawng zawng chu dân a ni a, Pathian rinawm, khawlohna nei lo, Fel leh ṭha a ni.

⁵ṭha lo takin a chungah an ti a, a fate an ni lo, an sawisêl kaina a ni: Chhuan bengtlalo leh tihmawh an ni.

⁶Aw, mi â leh fing lote u, Chutin maw, LALPA chu in thungrulh dâwn? A hringtu che, i pa a ni lâwm ni? A siam chia, a din nghet che a ni lâwm ni?

⁷“Hmasâng nite chu hre reng la, Chhuan tam tak kumte chu ngaihtuah teh. I pa zâwt la, a kawhhmuh ang che; I upate pawh, an hrilh ang che.

⁸Chungnungberan hnamte ram a pêk laia, Mihring fate a ṭhen lai khân Hnamte ramri a kham a, Israela thlahte zâtin.

⁹ LALPA chanvo chu a mite an ni a; Jakob-ho chu a rochan an ni.

¹⁰“Thlalêr ramah a chhar a, Thlalêr ruak rûm vung vungah; A vêla awm chilhin a enkawl a, A mitnautê angin a vawng.

¹¹Mupuiin a bua no a chawk thova, A no chunga thla a zâpa, A thlate a zâra, a laa, A thlaa a chawi ṭhîn angin,

¹² LALPA chauhvin a hruai ṭhîn a, Ram dang pathian ni lovin.

¹³Lei hmun sângah te a chuantîr a. Lova thil hâwng a eitîr ṭhîn a; Lungpui ata khawizu a dâwttîr ṭhîn a. Lung chang ata hriak nên.

¹⁴Bâwnghnute khal, berâm hnutê, Berâmno thaute nên; Basan ram berâmpa leh kêlte, Buh kal thaute nên; Grêp thisen, uain i in a.

¹⁵“Mahse, Jesurun-ho an lo thau va, an inchhek a; I lo thau va, i lo chum a, i lo maih ta! A siamtu Pathian a hawisan ta a, A chhandamna Lungpui chu a ngainêp.

¹⁶Ram dang pathiantein a thîkthu a chawk tho va, Thil tenawmin a chawk thinrim.

¹⁷Pathian ni lo, ramhuaite hnênah an inthawi a, An hriat ngai loh pathiante hnênah, Pathian tharte tlaikhawhnua lo awm, In pi, in pute hlauh ngai loh hnênan.

¹⁸A hringtu che Lungpui i ngaisâng lo, A siamtu che Pathian i theihnghilh bawk.

¹⁹“Chu chu LALPAN a hmu a, a hua, A fanu leh fapate tihthinur vângin.

²⁰‘Ka bîkbosan ang a, Engtin nge an awm dâwn teh rêng,’ a ti; Chhuan bengtlalo an ni, Rin kai lo fanaute.

²¹Pathian ni lo thilin ka thîkthu an chawk tho va; An thil lawilovin mi tithinur a. Chia sawi lohtein ka thîktîr ang a. Hnam âtein ka tithinrim ang.

²²Ka thinur a alh a, Seol mawng kil lam a kâng, Leilung, a thil hâwng chawpin a kâng zo, Tlâng nghahchhante a kâng.

²³“An chungah chhiatna ka tiang khâwm ang a, An chungah thal ka thlah ang.

²⁴Rilṭâmin an râwp ang a, meipui leh chhiatna namênlovin a kâng ral ang, An chungah ramsa hâte ka tîr ang a, Vaivuta tleng mite tûr nên.

²⁵Pâwn lamah khandaihin an thi ang a, Chhûng lamah thlabârin, Nula tlangvâl, hnute hne lai, Lua kêlsam ṭote nên lam.

²⁶An hmêlmate chuan ngai sualin, ‘Kan kut chu chawisânin a awm ta, Hêng zawng zawng hi LALPA tih a ni tawp lo,’ hmêlma thinrim chuan an ti ang tih hlauthâwng lo ila chuan, ‘Ka tidarh vek ang a, Mihring zînga anmahni hriat rengna ka tibo teh daih ang,’ ka ti mai tûr.

²⁷

²⁸“Finna nei lo hnam an ni a, Anmahniah hriat thiamna a awm lo.

²⁹Aw, fing sela chuan hêng hi an hre thiam ang a, An tûn hnu lam thu an ngaihtuah tûr.

³⁰Engtin nge pakhatin sâng a ûm ang a, Pahnihin sîng an tlânchhiattîr ang, An Lungpuiin a hralha, LALPAN a hlan a nih si loh chuan?

³¹An lungpui chu kan Lungpui ang a ni si lo, Kan hmêlmate ngei ngaih dân pawhin.

³²A grêp hrui chu Sodom grêp hrui, Gomorra rama mi a ni; A grêpte chu mît grêp a ni, A bâwrte chu a khâ.

³³An uain te chu dragon tûr leh Rûlrial tûr ṭha tak a ni.

³⁴“Chu chu ka khâwl khâwm, Ka ro bâwma châr chiah a ni lâwm ni?

³⁵Phuba lâk leh thungrulh chu keima tih tûr a ni; An rahbi a la tleu ngei dâwn e; An chhiatna ni chu a lo hnai ta, An chunga thil lo thleng tûrte chu a lo thleng thuai ang.

³⁶ LALPA chuan a mite ro a rêl dâwn a, A chhiahhlawhte pawh a tihsak ang, A thiltihtheihna bova, Khuahkhirh leh khirh loh tu mah rêng awm lova a hmuh hun chuan.

³⁷Khawiah nge an pathian, An rin lungpui,

³⁸An inthawina thau eitu, An in tûr thilhlan uain intute chu? Lo thovin rawn pui che u sela, Nangmahni humtu ni rawh se.

³⁹“Kei, keimah ngei ka nih hi hria ula, Pathian dang an awm lo ve; Ka tihlum ṭhîn a, ka tinung bawk ṭhîn; Ka hliam ṭhîn a, ka tidam bawk ṭhîn; Ka kut ata mi chhuhsak thei rêng rêng an awm lo.

⁴⁰Vân lamah ka kut ka phar a, Ka nunna chhâlin ka sawi e,

⁴¹Ka khandaih tlê ka tah hriama, Ka kutin rorêlna a vawn chuan, Ka hmêlmate chungah phuba ka la ang a, Mi hawtute chu ka thungrûl ang.

⁴²Ka thalte chu thisenin ka tirui ang a, Ka khandaihin tisa a lem ang; Thahte leh salte thisen nên Hmêlma hotute lu aṭangin, ka ti, a ti ang.

⁴³“Aw, nangni hnam tinte u, a mite nên lâwm rawh u; A chhiahhlawhte thisen phuba chu a la dâwn a ni; Amah dotute chungah phuba a la dâwn, A ram leh a mite tân inremna famkim a siam ang.”

⁴⁴Tin, mipuite beng hriatah chûng hla thu zawng zawng chu Mosian a va sawi a, amah nên, Nuna fapa Hosea nên.

⁴⁵Tin, Mosian chûng thu zawng zawng chu Israel mi zawng zawng hnêna a sawi zawh chuan,

⁴⁶an hnênah, “Tûna in hnêna ka thu hriattîr che uah hian in thinlung nghat tlat ula, hêng dân thu zawng zawng hi fîmkhur taka zâwm tûrin in fate thu pe rawh u.

⁴⁷In tân thil engmahlo mai mai a ni lo va, in nunna a ni si; tin, hêng thil ti hian luah tûra Jordan in va kân ramah chuan in dam rei dâwn a ni,” a ti a.

⁴⁸Tin, chumi ni vêk chuan LALPAN Mosia a bia a,

⁴⁹“Moab rama Jeriko zâwna Abarim tlângdunga Nebo tlângah chuan han chho la, Israela thlahte luah tûra ka pêk Kanaan ram chu han thlîr rawh;

⁵⁰tichuan, i unaupa Arona Hor tlânga a thia, a chite hnêna hruai a ni ta ang bawk khân i lâwn chhohna tlângah chuan i thi ang a, i chite hnêna hruai i ni ang;

⁵¹Zin thlalêra Kadesh-a Meriba tuia Israela thlahte zînga ka chunga in sual avâng leh, Israela thlahte zînga mi chawimawi loh avâng khân.

⁵²Ram chu i han hmu ang a; nimahsela, Israela thlahte ka pêk ramah chuan i lût lo vang,” tiin.