Read Mizo_Old_version Deuteronomy 33 Bible Online

Deuteronomy 33 - Mizo_Old_version bible

Deuteronomy 33

¹He malsâwmna hian a ni, Pathian mi Mosian a thih hmaa Israela thlahte mal a sâwm ni:

²“Sinai aṭangin LALPA chu a lo kal a, Seir aṭangin an hnênah a thawk a, Paran tlâng aṭangin a êng chhuak a, Mi thianghlim sângsâwm zîng aṭangin a lo kal; A kut ding lamah chuan an tân dân alh thei a awm a.

³A ni, chi tinte chu a hmangaih a, A mi thianghlim zawng zawng chu i kutah an awm a, I ke bulah an ṭhu a; I thu chu an pawm ṭheuh vang.

⁴Mosia chuan dân min pe a, Jakob-ho mipui tân ro luah tûr.

⁵Jesurun-ah a lal a, Mipuiho puipate an pung khâwm a, Israel chi zawng zawng a huhovin.

⁶“Reubena chu dam reng sela, thi lovin, A mite erawh chu tlêm thung rawh se,” a ti a.

⁷Tin, hei hi Juda-ho mal a sâwmna a ni: “LALPA, Juda aw chu ngaithla la, A mite hnênah hruai lût rawh; A kutin a tân a chuh a, A hmêlmate beihpuitu i ni ang,” tih hi.

⁸Tin, Levi-ho chungthuah chuan: “I Thumim leh i Urim chu i mi thianghlim hnênah a awm, Masa-a i fiaha, Meriba tuiahte i beih kha;

⁹‘Ka nu leh ka pa ka hre lo,’ titu khân, A unaute a hre lo, Ama fate ngei pawh a hre hek lo; I thu chu an pawm a, I thuthlung an zâwm a ni.

¹⁰Jakob-ho chu i rorêlte an zirtîr ang a, Israel-hote, i dân. I hmaah rimtui an dah ang, I maichâmah pumhâl thilhlan.

¹¹Malsâwm rawh, LALPA, a sum a pai, A kutkawihte lo pawm la; A beitute kâwng chu vua la, A hawtute kâwng nên, an chêt leh tawh loh nân,” a ti a.

¹²Tin, Benjamin-ho chungthuah chuan: “LALPA duh taka chu a kiangah himin a awm ang, Nilêngin a awp ang a, A paw ṭhîn ang,” a ti a.

¹³Tin, Josef-ho chungthuah chuan: “A ram chu LALPA malsâwmin awm rawh se, Vân thil hlu, daitein, Tui thûk tak hnuai lama tuitein,

¹⁴Ni rah chhuah thil hlutein, Thlaten thil hlu a chhuahtein,

¹⁵Hmasâng tlângtea thil duhawm bertein, Chatuan tlânga thil hlutein,

¹⁶Leilung leh a chunga thil hlutein, Hnimbuka awma duhsaknain; Malsâwmna chu Josef-ho lu chungah lo awm rawh se, A unaute hnên ata tihhrana chhîpah chuan.

¹⁷A ropuina chu a bâwngpa piang hmasa ropuina ang a ni a, A kî chu selechal kî ang a ni; Chûng chuan hnam tin a si ang, kâwlkil thlengin; Ephraim-ho sângsâwmte an ni a, Manase-ho sângte an ni,” a ti a.

¹⁸Tin, Zebulun-ho chungthuah chuan: “Lâwm rawh, Zebulun, i chhuahvahnaah te, Tin, Isakar, i puan inahte.

¹⁹Tlângah chi tin an ko vang a, Tah chuan felna inthawinate an hlân ang; Tuifinriat mukna an tlân dâwn si, ṭiauva ro inphûmte nên,” a ti a.

²⁰Gad-ho chungthuah chuan: “Gad-ho tizautu chu fakin awm rawh se. Sakeibakneipui angin a châng a, Bân a ham thlêr a, a ni, chhîp zawl te pawh.

²¹A ṭha lai ber a tân a thlang a. Rorêltu chanvo chu vohvin a awm si a. Puipahote hnênah a kal a, LALPA rorêlna fel a zui a; Israel-te hnêna a rorêlnate chu,” a ti a.

²²Dan-ho chungthuah chuan: “Dana chu sakeibakneino a ni, Basan aṭanga lo zuang chhuak chu,” a ti a.

²³Naphtali-ho chungthuah chuan: “Aw, Naphtali, duhsaknaa lungawi, LALPA malsâwmnaa tlai, Chhim leh thlang luah rawh,” a ti a.

²⁴Aser-ho chungthuah chuan: “Asera chu fanauva malsâwmin awm sela, A unaute zîngah tlatlum sela; Hriakah a ke chiah rawh se.

²⁵I kalhnate chu thîr leh dâr a ni ang, I dam chhûng ni angin i chakna pawh a awm ang,” a ti a.

²⁶“Pathian ang tu mah rêng an awm lo, aw Jesurun, A pui tûr chea vâna chuang, Ropui taka vâna chuang chu.

²⁷Chatuan Pathian chu i awmna a ni a, Hnuai lamah chuan chatuan bân a awm, Hmêlmate chu a vai kiansak chia, ‘Tiboral rawh,’ a ti.

²⁸Tin, Israela chu râlmuang takin a awm a, Jakoba tuichhunchhuah a pumbil; Buh leh uain ramah chuan, A ni, a vânten daifîm an fartîr.

²⁹I nihlawh e, aw Israel, Nang ang rêng tu nge awm, LALPA chhandam mite? Nangmah puitu phaw, I ropuina khandaih a ni. I hmêlmate i hnênah an intulût ang a, An hmun sângte i chîl ang,” a ti a.