Read Mizo_Old_version Deuteronomy 34 Bible Online

Deuteronomy 34 - Mizo_Old_version bible

Deuteronomy 34

¹Tin, Mosia chu Moab phai aṭangin Jeriko zâwna Nebo tlâng, Pisga tlâng chhipah chuan a han chho va. Tin, LALPAN Gilead ram zawng zawng, Dan thlengin a entîr a;

²Naphtali leh Ephraim ram zawng zawng, Manase leh Judai ram zawng zawng, a thlang lam tuifinriat thleng,

³Chhim ram leh tûm khawpui Jeriko phai ruam, Zoar thlengin,

⁴Tin, LALPAN a hnênah, “He ram hi a ni, Abrahama te, Isaaka te, Jakoba te hnêna, ‘I thlahte ka la pe ang,’ tia chhechhama ka lo tiam kha; a hmuh zawng ka hmuhtîr phawt chia; nimahsela, chutah chuan i kal lo vang,” a ti a.

⁵Chutichuan, LALPA chhiahhlawh Mosia chu LALPA thu angin Moab ramah chuan a thi ta a.

⁶Tin, Beth-peor zâwna Moab rama ruamah a phûm a; nimahsela, a thlân chu tûn thlengin tu mahin an hre lo.

⁷Mosia chu a thih chuan kum za leh kum sawmhnih mi a ni; a mit a thim lo va, a tha pawh a ṭhum chuang lo.

⁸Tin, Israela thlahte chuan Mosia chu Moab phaiah ni sawmthum an ṭah a; chutichuan, Mosia sûna ṭah nite chu a lo tâwp ta a.

⁹Tin, Nuna fapa Josua chu finna thlarauvin a khat a, Mosia chuan a chungah a kut a nghah avângin; tin, Israela thlahte chuan a thu an zâwm a, LALPAN Mosia thu a pêk ang chuan an ti a.

¹⁰Tin, chuta chin chu Israel-te zîngah, Mosia anga LALPAN hmaichhan meuhva a biak zâwlnei rêng rêng an awm ta lo va,

¹¹chhinchhiahnate zawng zawng leh thil mak zawng zawng, Pharaoa leh a chhiahhlawh zawng zawng hnên leh Aigupta ram zawng zawnga entîra,

¹²kut chak tak leh hlauhawm tak taktea Israel mi zawng zawng mit hmuha Mosian a tih ang ti vete.