Read Mizo_Old_version Deuteronomy 4 Bible Online

Deuteronomy 4 - Mizo_Old_version bible

Deuteronomy 4

¹“Khai le, aw Israel mite u, LALPA, in pi leh pute Pathianin ram a pêk che u chu nungdama in luah theihna tûra in pawm tûra ka zirtîr ṭhin che u dânte leh rorêlte chu ngaithla rawh u.

²LALPA in Pathian thupêk ka pêk che u hi in pawm theihna tûrin, thu ka pêk che u hi in belhchhah tûr a ni lo va, in tikiam tûr a ni hek lo.

³Baal-peor avânga LALPA thiltih chu in mitin a hmu a; Baal-peor betu zawng zawngte chu LALPA in Pathianin in zîng ata a tiboral a.

⁴LALPA in Pathian vuantu apiangte erawh chu tûn thleng hian nungdamin in la awm ṭheuh va.

⁵Ngai teh u, in va luah tûr ramah pawh in zawm zêl tûrin, LALPA ka Pathianin thu mi pêk ang takin dânte leh rorêlte chu ka zirtîr che u a.

⁶Chutichuan, pawm ula, zâwm rawh u; chu tak chu, hêng dân zawng zawngte hi hriaa, ‘He hnam ropui tak hi mi fing tak leh thil hre mi tak an ni ngei mai,’ titu hnamte mit hmuhah chuan in finna leh thil hre mi in nihna a ni ang.

⁷“Kan koh apianga LALPA kan Pathianin min hnaih anga anmahni hnaih ṭhîn Pathian nei hnam ropui tu nge awm ve?

⁸Heti taka fel, dânte leh rorêlte, tûna in hmaa ka zam zawng zawng ang dân nei hi hnam ropui dang tu nge awm ve?

⁹Eng pawh ni sela, fîmkhur ula, ngun takin invawng phawt mai rawh u; chuti lo chuan, in mitin a thil hmuhte chu in theihnghilh ang a, in dam chhûngin in thinlung ata a bo dah ang e. In fate leh in tute zirtîr rawh u;

¹⁰tin, Horeb tlânga LALPA in Pathian hmaa in dina, LALPAN ka hnêna, ‘Mipuite chu min koh khâwmsak rawh, leilunga an awm chhûng zawnga mi ṭih dân an zîr theih nân leh an fate zirtîr tûrin ka thute ka lo hriattîr ang e,’ mi tih ni pawh kha in theihnghilh dah ang e.

¹¹Tichuan, in lo hnai a, tlâng bulah chuan in lo ding a, vânlaizâwl tawngin tlâng chu thim te, chhûm te, thim chhah mup te awmtîrin a kâng ta a.

¹²Tin, LALPA chuan mei aṭang chuan a rawn bia che u a. A thusawi chu in hria a; nimahsela, riruang eng mah in hmu lo va, aw chauh in hria a ni.

¹³A thuthlung zawm tûra thu a pêk che u, thu sâwm pêk chu in hnênah a puang a, lungphêk pahnihah a ziak a.

¹⁴Tin, chumi lai chuan luah tûra in va kaina rama in zawm tûrin dânte leh rorêlte zirtîr tûrin LALPAN thu mi pe a.

¹⁵“Chuvângin, fîmkhur hle rawh u; milemte insiam chawpin, a pa ang emaw, a nu ang emaw, leia ran ang emaw, boruaka thlâwk ṭhîn, sava thla nei ang emaw, leia a vaha vâk mi ang emaw, lei hnuai tuia sangha zînga mi ang emawte siamin in intichhe dah rual ang e; Horeb tlânga mei aṭanga LALPAN a rawn biak ni che u khân riruang eng mah in hmu si lo va; a nih loh leh vân lam in han hawia, ni te, thla te, arsi te, vâna mi zawng zawngte rêng pawh in han hmuhin, LALPA in Pathianin vân hnuai chhîna mi zawng zawng a ruatsakte chuan a hîp ang che u a, in bia ang a, an rawng te in bâwl mai dah rual ang e.

²⁰LALPA chuan a mite, a ro ni tûrin thîr rawh tuina ata, Aigupta ram ata chu a hruai chhuak zâwk che u a ni, tûna in nih ang hi.

²¹Chuti chang pawh ni lovin, nangmahni avângin LALPA chu ka chungah a thinur a, Jordan lui chu ka kân lohva, in luah atâna ram ṭha tak LALPA in Pathianin a pêk che uah chuan ka luh loh nân chhia a chham bawk a.

²²Kei chu he rama thi tûr ka ni a, Jordan lui chu ka kai dâwn lo a ni; nangni erawh chu in kai ang a, chu ram ṭha tak chu in luah ang.

²³Fîmkhur hle rawh u, LALPA in Pathian thuthlung, in laka a thlun chu in theihnghilh ang a, LALPA in Pathianin eng anpui maha siam a phal loh milemte in insiam chawp dah rual ang e.

²⁴LALPA in Pathian chu kan ral hmang mei, thîkthuchhe tak Pathian a ni si a.

²⁵“Tu leh fate in han neiha, chu rama rei fe in awm hnua, in intihkhawlohva, eng emaw anpuitea milem siam chawp maite in dina, a thin tiur tûra LALPA in Pathian mit hmuha thil ṭha lo in tih vaih chuan,

²⁶Jordan kâna in va luah tûr ram ata chu in boral thuai mai ang tih, in chungchâng thu-ah min hriatpuitu atân tûnah hian lei leh vân ka sâwm a ni; in chêng rei lo vang a, in boral vek mai ang.

²⁷LALPA chuan hnam tin zîngah a tidarh ang che u, hnamte zîngah chuan tlêm tê chauhvin in awm ang.

²⁸Chutah chuan, pathian, thing leh lunga mihring siam, hmu thei hlei lo, hre thei hlei lo, ei thei hlei lo, rim pawh hre thei hlei lote in bia ang a.

²⁹Nimahsela, chutah pawh chuan LALPA in Pathian chu in zawna, in thinlung zawng zawng leh in rilru zawng zawnga in zawn chuan in hmu leh ang.

³⁰Hrehawma in awma, in chunga chûng thil zawng zawng chu a lo thlen hunah, a tâwp a tâwpah chuan LALPA in Pathian lam in lo hawi leh ang a, a thu chu in pawm tawh ang a;

³¹LALPA in Pathian chu zahngai thei tak Pathian a ni si a; a thlahthlam lo vang che u a, a tiboral lo vang che u a, in pi leh pute hnêna chhechhama a thuthlun chu a theihnghilh hek lo vang.

³²“In awm hma, tûn hma lam te chu han chhût ula, leilunga Pathianin mihring a siam achin vân hnuai chhînah, hetianga thil ropui hi a awm ngaiin, hriat a ni ngai emaw chu?

³³Mei aṭanga thu rawn sawi in hriata in la nun cheu sina pathian aw miin an hre ngaiin,

³⁴hnam dang zing ata fiahna te, chhinchhiahna te, thil mak te, indona te, kut chak tak te, bân phar te, thil râpthlâk tea LALPA in Pathianin in mit hmuha Aigupta rama a tih zawng zawng anga hnam hruai chhuak ngam pathian an awm ngai emaw chu?

³⁵LALPA chu Pathian a ni tih in hriat theih nân in hnêna tihlan a ni a; amah lo chu a dang rêng an awm lo.

³⁶A zirtîr nân che u vân aṭangin a aw a rawn hriattîr che u a, lei chungah hian a meipui chu a hmuhtîr che u a; mei aṭanga a thu chu in lo hria a.

³⁷In pi leh pute a hmangaih avângin an hnua an thlahte chu a thlang che u a, amah telin, a thiltihtheihna ropui takin hnam dang in aia ropui leh thiltithei zâwk a hnawh chhuahsak che u a, an ram chu luah tûra luhtîr che uin Aigupta ram ata chu a hruai chhuak che u a, tûna in nih ang hi.

³⁸

³⁹Chuvângin, tûnah hian in thinlungah vawng ula, chung lam vânah leh hnuai lam leiah hian LALPA chu Pathian a ni tih hre rawh u; a dang rêng an awm lo.

⁴⁰Kumkhua atâna LALPA in Pathianin a pêk che u ramah chuan, nangmahni leh in thlahte tâna ṭha tûr leh in chên rei theih nân, a dânte leh a thupêkte, tûna ka pêk che u hi in zâwm tûr a ni,” tih hi.

⁴¹Chutichuan, Mosia chuan tualthattu, a ṭhenawm khawvêng, tûn hma pawha a huat lêm loh that palhtu tualtlânna, Jordan râl ni chhuahna lampangah khaw pathum a ruat a; chûng khua, a engah pawh a tlân chuan a him ang a:

⁴²

⁴³chûng chu Reuben-ho pualah thlalêra tlâng zâwla Bezer te, Gad-ho pualah Gilead-a Ramoth te, Manase-ho pualah Basan-a Golan te a ni a.

⁴⁴Tin, hei hi Mosian Israela thlahte dân a pêk chu a ni;

⁴⁵hêng hi, Aigupta ram ata an lo chhuah laia Israela thlahte hnêna Mosian Jordan râla, Mosia leh Israela thlahten Aigupta rama an lo chhuah laia an thah, Hesbon-a awm Amon-ho lal Sihona rama Beth-peor zâwn ruama a sawi hriattîrna te, dân te, rorêl te chu a ni;

⁴⁶

⁴⁷a ram leh Basan lal Oga ram, Jordan râl ni chhuahna lama Amor-ho lal pahnihte ram chu an luah a;

⁴⁸Arnon ruam fêma Aroer aṭanga Sion tlâng (Hermon an ti bawk) thleng leh

⁴⁹Jordan râl chhak lampang Araba zawng zawng, Pisga pangpêr hnuaia Araba tuifinriat thlengin.