Read Mizo_Old_version Deuteronomy 5 Bible Online

Deuteronomy 5 - Mizo_Old_version bible

Deuteronomy 5

¹Tin, Mosian Israel-ho zawng zawng chu a ko khâwm a, an hnênah, “Aw Israel mite u, in zira in pawm tûra dân te, rorêl te in beng hriata vawiina ka sawi hi ngaithla rawh u.

²LALPA kan Pathianin Horeb-ah chuan kan hnênah thu a thlung a.

³LALPA chuan he thu hi kan pi leh pute hnênah khân a thlung lo va, keiniho, tûn thlênga mi nungdama la awm zawng zawngte hnênah ngei hian a ni, a thlun zâwk ni.

⁴LALPA chuan tlângah mei aṭangin inhmatawnin a bia che u a

⁵(chumi lai chuan LALPA thu kawhhmuh tûr che uin LALPA nêna in inkârah ka ding a; mei avâng chuan in hlau si a, tlângah chuan in han chho lo va):

⁶“ ‘Kei hi LALPA i Pathian, Aigupta ram ata, bâwih ata hruai chhuaktu che ka ni.

⁷“ ‘Keimah lo chu pathian dang rêng rêng i nei tûr a ni lo.

⁸“ ‘Milem siam chawp, chung lam vâna mi emaw, hnuai lam leia mi emaw, lei hnuai lama tuia mi emaw, a eng anpui mah i insiam tûr a ni lo;

⁹chung chu chibai i bûk tûr a ni lo va, an rawng i bâwl tûr a ni hek lo. Kei LALPA i Pathian hi Pathian thîkthuchhia, pate khawlohna avânga fate hrem ṭhîn, mi hawtute chu chhuan thumna leh chhuan lîna thlenga hrem thîn leh,

¹⁰mi hmangaiha ka thupêkte pawmtu sâng tam takte chunga khawngaihna lantîr ṭhîn ka nih hi.

¹¹“ ‘LALPA i Pathian hming chu i lam mai mai tûr a ni lo. LALPA chuan a hming lam mai maitu chu thiam loh chantîr lohvin a chhuah dâwn si lo va.

¹²“ ‘LALPA i Pathianin thu a pêk che angin Chawlhni chu thianghlim reng tûrin serh rawh.

¹³Ni ruk chhûngin i thawk ang a, i hna zawng zawng chu i thawk tûr a ni;

¹⁴a ni sarih nî erawh chu LALPA i Pathian tân Chawlhni a ni e; chumi nî chuan hna rêng rêng i thawk tûr a ni lo, nang pawhin, i fapa pawhin, i fanu pawhin, i bâwihpa pawhin, i bâwihnu pawhin, i bâwngpa pawhin, i sabengtung pawhin, i ran a enga pawhin, i ina ram dang mite pawhin; nangmah ang bawka i bâwihpa te, i bâwihnu te pawh an chawlh theih nân.

¹⁵Nang pawh Aigupta ramah khân bâwih i ni tawh a, LALPA i Pathianin chuta ta chu kut chak tak leh bân phara a hruai chhuah che i ni tih hre reng rawh; chu vâng chuan a ni, LALPA i Pathianin Chawlhni serh tûr thu a pêk che ni.

¹⁶“ ‘LALPA i Pathianin thu a pêk che angin i nu leh i pa chawimawi rawh; tichuan, LALPAN ram a pêkah che hian i hmuingîl ang a, i dam rei dâwn nia.

¹⁷“ ‘Tual i that tûr a ni lo.

¹⁸“ ‘I uire tûr a ni lo.

¹⁹“ ‘I ru tûr a ni lo.

²⁰“ ‘I vêngte chungah hretu derah i insiam tûr a ni lo.

²¹“ ‘I vêngte nupui i awt tûr a ni lo va, i vêngte in emaw, a lo emaw, a bâwihpa emaw, a bâwihnu emaw, a bâwngpa emaw, a sabengtung emaw, i vêngte thil a enga mah i awt tûr a ni lo,’ tiin.”

²²“Hêng thute hi tlângah mei te, chhûm te, thim chhah mup aṭangtein LALPAN aw ring takin in zavaia pung khâwmho hnênah a sawi a, a belhchhah leh chuang lo va. Chûng chu lungphêk pahnihah a ziak a, mi pe a.

²³“Tin, tlâng chu a kan laia, thim aṭanga aw chu in han hriat chuan heti hi a ni a, min rawn hnaih a, in hnam puipa zawng zawng leh in upate chuan;

²⁴tin, ‘Ngai teh, LALPA kan Pathian chuan kan hnênah a ropuizia leh a lenzia a lantîr a, mei aṭanga a aw chu ka hria a; Pathianin mihring a biak pawha thihna a nih chuan lohna chu vawiinah kan lo hre ta a.

²⁵Chuvângin, engah nge kan thih ang? Hemi mei nasa tak hian min kâng ral mai ang asin; LALPA kan Pathian aw chu kan hriat leh chuan ka thi mai ang.

²⁶Mei aṭanga Pathian nung aw kan hriat anga hre vea dam si, tisa pu zawng zawng zîngah tu nge awm?

²⁷Nangin va hnaih la, LALPA kan Pathianin a sawi tûr zawng zawng chu va ngaithla teh khai; tin, LALPA kan Pathianin i hnêna a sawi zawng zawng chu nangin kan hnênah i sawi ang a; tichuan, kan lo ngaithla ang a, kan zâwm dâwn nia,’ in ti a.

²⁸“Tin, mi biak laia in thusawi chu LALPAN a lo hria a; tichuan, LALPAN ka hnênah, ‘Hêng mipuiten i hnêna thu an sawi chu ka lo hria a; an thusawi zawng zawng chu a ṭha hle mai.

²⁹Chutiang rilru chu pu ṭhîn sela aw, mi ṭih ang a, ka thupêkte chu an zâwm fo vang a, anmahni leh an fate pawh kumkhuain an hmuingîl hle tûr.

³⁰An hnênah, “In puan inahte va haw rawh u,” ti rawh.

³¹Nang erawh chu ka kiangah ding la, luah tûra ram ka pêkah an pawm tûra i zirtîr tûr thupêk zawng zawng te, dân te, rorêl te chu ka hrilh ang che,’ a ti a.

³²Chuvângin, LALPA in Pathianin thu a pêk che u anga ti tûrin fîmkhur rawh u; ding lamah emaw, vei lamah emaw in pêng tûr a ni lo.

³³In va luah tûr ramah in awma, in hmuingîlna tûr leh in chên rei theih nân LALPA in Pathianin thu a pêk che u kawng in zawh tluan chhuak tûr a ni.