Read Mizo_Old_version Deuteronomy 6 Bible Online

Deuteronomy 6 - Mizo_Old_version bible

Deuteronomy 6

¹“Tin, luah tûra in va kaina rama in zawm tûr leh nangni leh in fapate leh in tupaten LALPA in Pathian chu in ṭiha, in dam chhûng zawnga a dân zawng zawng leh a thupêk ka pêk che u hi in zawmna tûr leh, in lo chên rei theihna tûra LALPA in Pathianin nangmahni zirtîr tûra thu min pêk, thupêk te, dân te, rorêl te chu hêngte hi a ni.

³Chuvângin, aw Israel mite u, in hmuingîla, LALPA in pi leh pute Pathianin a ṭawngtiam che u angin, hnutetui leh khawizu luanna rama nasa taka in lo pun theih nân ngaithla ula, zâwm tûrin fîmkhur rawh u.

⁴“Aw Israel mite u, ngaithla teh u, LALPA kan Pathian chauh chu LALPA a ni a;

⁵LALPA in Pathian chu in thinlung zawng zawngin, in rilru zawng zawngin, in chakna zawng zawngin in hmangaih tûr a ni.

⁶Tin, hêng thu, vawiina ka pêk che u hi in thinlungah a châm reng ang a;

⁷in fate ṭhahnemngai takin in zirtîr ang a, in ina in ṭhut lai te, kawnga in kal lai te, in mut lai te, in thawh hun tein in sawi ṭhîn tûr a ni.

⁸Tin, chhinchhiahna atân in bânah in zem ang a, in mit leh mit inkâra chal hrênna atân a awm bawk tûr a ni.

⁹Tin, in in kawngka biangah te, in kawngkhârah te in ziak tûr a ni.

¹⁰“Tin, heti hi a ni ang a, LALPA in Pathianin in pu, Abrahama te, Isaaka te, Jakoba te hnêna chhechhama a pêk che u ram, in din ni hauh lo, khaw ropui leh mawi tak tak te; in tihkhah ni hauh lo, thil ṭha tinrênga khat in te; in chhun ni hauh lo, tuikhur chhun sa te; in chîn ni hauh lo, grêp huan leh olive thingte awmnaa a hruai luh che ua, in eia, in tlai hle hun chuan,

¹²fîmkhur hle ang che u; chuti lo chuan, Aigupta ram ata, bâwih ata hruai chhuaktu che u LALPA in Pathian chu in theihnghilh mai dah ang e.

¹³LALPA in Pathian chu in ṭih ang a, ama rawng chu in bâwl ang a, a hming chhâlin chhia in chham tûr a ni.

¹⁴Pathian dang, in vêla mite pathiante chu in be tûr a ni lo,

¹⁵in zînga awm LALPA in Pathian chu Pathian thîkthuchhia a ni; LALPA in Pathian thin chu in chungah a thawk ang a, leilung ata hi a tiboral mai dah ang che u.

¹⁶“Masa-a in fiah ang khân LALPA in Pathian chu in fiah tûr a ni lo.

¹⁷LALPA in Pathianin a pêk che u - thupêk te, a thuhriattîr te, a dân te hi fîmkhur takin in zâwm tûr a ni.

¹⁸In hmuingîlna tûr leh LALPAN a sawi tawh anga in hmêlma zawng zawng hnawt chhuak tûra, LALPAN in pi leh pute hnêna chhia a lo chham tawh ram ṭha tak chu in va luah theih nân, LALPA mit hmuha dik leh ṭha chu in ti tûr a ni.

²⁰“Tin, in faten, ‘LALPA kan Pathianin thu a pêk che u thuhriattîr te, dân te, rorêl te hi engtizia nge ni le?’ tia nakin lama an la rawn zawh hun che u chuan,

²¹nangnin in fate hnênah, ‘Aigupta ramah Pharaoa bâwih kan ni a, LALPAN Aigupta ram ata chu kut chak takin min hruai chhuak a;

²²tin, LALPAN kan mit hmuhah Aigupta ram chungah te, Pharaoa chungah te, a chhûngte zawng zawng chungah te, chhinchhiahna leh thil mak nasa tak leh manganthlâk takte a entîr a;

²³keini erawh chu min pêk tûra kan pi leh pute hnêna chhia a lo chham ram chu min pêk theih nân chuta ta chu min hruai chhuak a.

²⁴Tichuan, hêng dân zawng zawng hi zâwm tûr leh kan ṭhat rengna tûra LALPA kan Pathian chu ṭih tûrin LALPA chuan thu min pe a, vawiin anga nungdama min zuah reng theih nân.

²⁵A thu min pêk anga LALPA hmaa a thupêk zawng zawng zâwm tûra kan fîmkhur chuan kan tân damna a ni dâwn a ni,’ in ti tûr a ni.