Read Mizo_Old_version Deuteronomy 7 Bible Online

Deuteronomy 7 - Mizo_Old_version bible

Deuteronomy 7

¹“LALPA in Pathianin in va luah tûr rama a hruai luh che ua, in hmaa hnam tam tak - Hit-ho te, Girgas-ho te, Amor-ho te, Kanaan-ho te, Periz-ho te, Hiv-ho te, Jebus-ho te, in aia ropui leh thiltithei zâwk hnam sarihte a hnawh chhuah hun leh,

²LALPA in Pathianin a pêk hun che ua, in thah hunah chuan, in tiboral vek tûr a ni; anmahni nên thu in thlung tûr a ni lo va, in khawngaih tûr a ni hek lo;

³nupui pasalah in nei tûr a ni hek lo, in fanute chu an fapate in neihtîr tûr a ni lo va, an fanute chu in fapate in neihtîr tûr a ni hek lo.

⁴In fapate, mi zui lai hi pathian dangte biakna lamah an hruai kawi mai ang a; tin, LALPA thin pawh chu in chungah a thawk ang a, a tiboral thuai mai ang che u.

⁵An chungah hetiang hian in ti zâwk tûr a ni: an maichâmte in tichim ang a, an lungphunte in tikeh sawm ang a, an Aseri-te in kit ang a, an milem siam chawpte in hâl vek tûr a ni.

⁶LALPA in Pathian tân hnam thianghlim in ni si a; leilunga hnam ahluana a pual bîk ni tûra LALPA in Pathianin a thlan che u in ni a.

⁷“Hnam dang aia in tam avângin LALPAN in chungah a hmangaihna a fûktîr a, a thlang che u a ni lo va; hnam zawng zawnga hnam tlêm ber in ni asin;

⁸LALPAN a hmangaih che u avâng leh in pi leh pute hnêna chhia a lo chham chu hlen a duh avâng zâwkin asin, LALPAN Aigupta lal Pharaoa kut ata kut chak takin bâwih ata a tlan chhuah che u ni.

⁹Chuvângin, LALPA in Pathian chu Pathian a ni tih hre rawh u; Pathian rinawm, amah hmangaiha a thu zâwmtu chunga chhuan sâng thlenga thuthlung leh khawngaihna nghat renga,

¹⁰amah hawtute tiboral tûra anmahni chung la laa thungrûl ṭhîn a ni; amah hawtute chu a rial rei lo vang a, anmahni chung la laah a thungrûl ang.

¹¹Chuvângin, thupêk te, dân te, rorêl te zawm tûra vawiina thu ka pêk che u hi in zâwm tûr a ni.

¹²“Tin, heti hi a ni ang a, hêng rorêlte hi in ngaihthlâka, in zawma, in tih avângin LALPA in Pathianin in pi leh pute hnêna chhia a lo chham, thuthlung leh khawngaihna chu in chungah a nghat ang a;

¹³a hmangaih ang che u a, mal a sâwm ang che u a, a tipung ang che u; pêk tûra in pi leh pute hnêna chhia a chham ramah chuan in rîla rah leh in lei rah pawh mal a sâwm ang, in buh te, in uain te, in hriak te, in bâwngno leh in berâmnote pawh.

¹⁴Hnam zawng zawnga malsâwmna dawng nasa ber in ni ang a; in zîngah a hmei a pa ching rêng rêng an awm lo vang, in ran zîngah pawh.

¹⁵Tin, LALPAN hri zawng zawng a tihkiansak vek ang che u a, in hriat tawh hnu Aigupta ram hrite chu in chungah a lêntîr lo vang a, a hawtute che u zawng zawng chungah a lêntîr zâwk ang.

¹⁶LALPA in Pathianin a pêk tûr che u hnam zawng zawng in tiboral vek tûr a ni; in khawngaih tûr a ni lo va, an pathian rawng pawh in bâwl tûr a ni lo; in tân thang a ni dâwn si a.

¹⁷“In rilrua, ‘Hêng hnamte hi kan aiin an tam si a, engtin nge kan luhchhuah theih ang?’ ti in nih chuan,

¹⁸anni chu hlau suh ula; LALPA in Pathianin Pharaoa leh Aigupta mi zawng zawng chunga a thiltihte kha hre rawh u,

¹⁹fiahna nasa tak in mit ngeia in hmuh te, chhinchhiahna te, thil mak te, kut chak tak te, bân phar tea LALPA in Pathianin a hruai chhuahna che u kha; khatiang khân LALPA in Pathianin in mi hlauhte chungah chuan a ti zêl ang.

²⁰LALPA in Pathian chuan an zîngah khawinghal a tîr leh nghâl ang, a la dam, in laka birute chu an boral vek thlengin.

²¹Anni chu in hlau tûr a ni lo; LALPA in Pathian chu in zîngah a awm si a, Pathian ropui tak, ṭihbaiawm tak mai chu.

²²LALPA in Pathian chuan chûng hnamte chu zawi zawiin a hnawh chhuahsak hret hret ang che u a; in tiboral nghâl mai tûr a ni lo va; chuti lo chuan, ramsate in pawi khawih khawpin an lo pung mai ang.

²³An boral hma loh chu LALPA in Pathianin a pe ang che u a, buai namênlovin a tibuai ang.

²⁴An lalte chu in kutah a pe ang a, an hming chu vân hnuai ata hi in thai bo daih tûr a ni; in tihboral dêr thlengin a chelh tûr che u tu mah rêng rêng an awm lo vang.

²⁵An pathian lem siam chawpte chu in hâl tûr a ni; chumia tangkarua emaw, rangkachak emaw chu in ît tûr a ni lo va, in tân in la tûr a ni hek lo; chuti lo chuan, in âwk dah ang e; LALPA in Pathian ngaihin thil tenawm a ni si a;

²⁶in in chhûnga thil tenawm la lûtin, chu thil ang chuan ânchhe dawngah i insiam tûr a ni lo; ten namênlova tenin in haw hle tûr a ni, ânchhe dawng thil a ni si a.