Read Mizo_Old_version Deuteronomy 8 Bible Online

Deuteronomy 8 - Mizo_Old_version bible

Deuteronomy 8

¹“Nungdama in awma, in lo pun zêla, pêk tûr che ua in pi leh pute hnêna LALPAN chhia a chham ram chu in va luah theih nân, thupêk vawiina ka pêk che u hi zâwm tûrin in fîmkhur tûr a ni.

²Tin, a thupêkte chu in zâwm dâwn nge dâwn lo, in rilru hriat nân fiah tûr leh tihrehawm tûr che u a, thlalêra kum sawmli a hruaina zawng zawng che u kawng chu hre reng rawh u.

³Mihring hi chhang chauhvin an nung lo va, LALPA kâa thu tin chhuakin an nung zâwk a ni tih a hriattîr theih nân che u, a tihrehawm che u a, in ṭâm te a phal a, in hriat ngai loh, in pi leh pute pawhin an hriat ngai bîk loh manna chuan a châwm che u a.

⁴Hêng kum sawmli chhûng hian in silhfênte chu in sin chul lo va, in kete pawh a vûng lo va.

⁵Tin, miin a fa a thunun ṭhîn angin, LALPA in Pathian chuan a thunun ṭhîn che u a ni tih hi in rilruin hre reng rawh u.

⁶Tin, a kawng zawh tûr leh amah chu ṭih tûrin LALPA in Pathian thupêkte chu in zâwm tûr a ni.

⁷LALPA in Pathian chuan ruam leh tlâng aṭanga lo chhuak lui tui te, tuikhur leh tui thûk tak awmna ram,

⁸buh te, barli te, grêp te, theipui te, pawmgranet te awmna ram, hriak nei olive leh khawizu awmna ram,

⁹chham lova chhang in ei ṭhinna tûr ram, eng mah in tlâkchham lohna tûr, a lungte chu thîr, a tlângte chu dâr laih chhuah theihna ram ṭha takah chuan a hruai lût dâwn si che u a.

¹⁰In eia, in tlai hle hun chuan, ram ṭha tak a pêk che u avâng chuan LALPA in Pathian chu in fak ang.

¹¹“A thupêk te, a rorêl te, a dân te, vawiina ka pêk che u hi zâwm lovin LALPA in Pathian chu in theihnghilh dah rual ang e, fîmkhur rawh u;

¹²chuti lo chuan, in eia, in tlaia, in ṭha takte in saka, in luah hun leh,

¹³in ran rual te, in berâm rual te a lo puna, in tangkarua te, in rangkachak te a lo puna, in thil neih zawng zawngte a lo pun hun chuan,

¹⁴in rilrute a lo chapo vang a, bâwih ata Aigupta ram aṭanga hruai chhuaktu che u LALPA in Pathian chu in theihnghilh mai ang.

¹⁵Ani chuan thlalêr zau tak leh râpthlâk tak, rûl chuk na mite leh khawmualkaikuangte awmna, tui awm lohna, ram rovah a hruai tlang che u a; meilung lungpui aṭangin tui a tihchhuahsak che u a,

¹⁶in pi leh pute hriat ngai loh manna chuan a châwm che u a, tûn hnu lam thua in ṭhat theih nân a tihrehawm che u a, a fiah theihna tûr che uin.

¹⁷Tin, ‘Hêng kan sum leh paite hi keimahni chakna leh kan kutkawih a ni,’ in ti rilru dah ang e, fîmkhur bawk rawh u.

¹⁸Tûna a ngheh anga in pi leh pute hnêna chhechhama thuthlun chu a tihnghehna tûrin, LALPA in Pathian chu hre reng rawh u, sum leh pai deh chhuah theihna petu che u chu amah chu a ni zâwk asin.

¹⁹Tin, heti hi a ni ang a, LALPA in Pathian chu in theihnghilha, pathian dangte in zuia, an rawngte in bâwla, in biak vaih chuan in boral ngei ngei ang tih vawiinah hian ka hriattîr a che u.

²⁰In hmaa hnam dangte a tihboral angin nangni pawh in boral ang, LALPA in Pathian aw chu ngaithla duh lo in nih dâwn avângin.