Read Mizo_Old_version Deuteronomy 9 Bible Online

Deuteronomy 9 - Mizo_Old_version bible

Deuteronomy 9

¹“Aw Israel mite u, ngaithla teh u, ‘Anak-ho chu tuin nge chelh ang i?’ an tih ṭhin, in aia ropui leh thiltithei zâwk hnam, khawpui vân tawnga kulh nei leh ropui tak, mi lian tak, sâng pui pui, in hriat tawh sa Anaka thlahte ram chu va luah tûrin tûnah chuan Jordan lui chu in kân dâwn ta a.

³Chuvângin, LALPA in Pathian chu kan ral hmang mei anga in hmaa kal ṭhîna chu a ni tih tûnah hian hre rawh u; ani chuan anni chu a tiboral ang a, a tihtlâwmsak ang che u a; tichuan, LALPAN in hnêna a sawi tawh ang khân, anni chu in hnawt chhuak ang a, in tiboral thuai mai ang.

⁴“LALPA in Pathianin a hnawh chhuahsak hnu che u chuan, ‘Kan felna avângin he ram hi luah tûrin LALPAN min hruai lût a ni,’ in rilruin ti hauh suh u; hêng hnamte hi an sual avâng zâwkin a ni, LALPAN a hnawh chhuahsak dâwn che u ni.

⁵In fel avâng emaw, in rilru dik avâng emawin an ram chu in luah dâwn lo va, hêng hnam sual avâng leh LALPAN in pu Abrahama te, Isaaka te, Jakoba te hnêna a chhechham thu tinghet tûrin, LALPA in Pathianin anni chu a hnawh chhuahsak che u a ni zâwk e.

⁶Chuvângin, he ram ṭha tak hi in fel avânga luah tûrin LALPAN a pe che u a ni lo tih hre rawh u; hnam luhlul tak in ni si a.

⁷“Thlalêra LALPA thin in tihur ṭhinzia te kha hre reng ula, theihnghilh suh u; Aigupta ram ata in chhuah nî aṭanga hemi hmun in lo thlen thleng hian LALPA chunga hel hmang in ni a.

⁸Horeb-ah pawh khân LALPA thin tiura, tiboral hial tûr che uin LALPA a thinrim a.

⁹Lungphêk, in hnêna LALPAN thuthlunna lungphêk, la tûra tlânga ka han chhoh lai khân ni sawmli leh zan sawmli tlângah chuan ka han awm a; chhang pawh ka ei lo va, tui pawh ka in hek lo.

¹⁰Tin, LALPA chuan lungphêk pahnih, Pathian kutzunga ziak chu mi pe a; chumiah chuan in pun khâwm nîa tlâng chunga mei aṭanga LALPAN in hnêna thu a sawi zawng zawng kha a chuang a.

¹¹Tin, ni sawmli leh zan sawmli hnuah chuan heti hi a ni a, lungphêk pahnih, thuthlunna lungphêk chu mi pe a.

¹²Tin, LALPA chuan ka hnênah, ‘Tho la, heta ta hi chhuk thuai rawh; Aigupta ram ata i hruai chhuah, i mite chu an intihchhiat zawh tâk khu; zawh tûra thu ka pêk kawng ata chu an pêng ta pang mai a, milem chhûn chawp an insiam tâk mai khu,’ a ti a.

¹³Tin, LALPA chuan, ‘He mite hi ka en ka enin, ngai teh, hnam luhlul tak an ni;

¹⁴anmahni tiboral tûr leh vân hnuai ata an hming thai bo tûrin ka tih tihin ka han ti teh ang: tin, nang hi anmahni aia hnam thiltithei leh ropui zâwkah ka siam teh ang che,’ tiin min be bawk a.

¹⁵“Chutichuan, tlâng ata chu ka lêt thla a, tlâng chu a kâng ta a; thuthlunna lungphêk pahnih chu ka kut khinghnihin ka keng a.

¹⁶Tin, ka han thlîr a, ngai teh u, LALPA in Pathian chungah in lo sual ta a; bâwngno lem chhûn chawp in insiam a, LALPAN thu a pêk che u kawng ata chu in pêng ta pang mai a.

¹⁷Tin, lungphêk pahnih chu ka chawi a, ka kut khinghnih ata chu ka paih a, in mit hmuhah ka tikeh a.

¹⁸Tin, hmâna ka tih ang khân ni sawmli leh zan sawmli LALPA hmaah ka bawkkhup a; a thin tiur tûra LALPA mit hmuha in thil tihsual tâk, in sualna zawng zawng avângin chhang pawh ka ei lo va, tui pawh ka in hek lo.

¹⁹Nangmahni tiboral tûra LALPA thinurna, a thinrimna leh lungnihlohna nasa tak chu ka hlau si a. Nimahsela, chumi ṭum pawh chuan LALPAN ka thu chu mi ngaihthlâksak a.

²⁰Tin, LALPA chu Arona tiboral duh hial khawpin a thinur a; nimahsela, Arona pawh ka ṭawngṭaisak nghâl bawk a.

²¹In sualna avânga in siam bâwngno lem chu ka la a, ka hâl a, ka chhu sawm a, vaivut angin ka râwt dip derh a; tin, a dip chu tlâng aṭanga lui lo luangah chuan ka paih a.

²²“Tin, Tabera-ah te, Masa-ah te, Kibroth-hat-tava-ah te pawh LALPA chu in tithinur a.

²³Tin, LALPAN, ‘Ram ka pêk che u chu han luah rawh u,’ tia Kadesh-barnea aṭanga a tirh lai che u khân LALPA in Pathian thupêk chu in helsan a, amah chu in ring lo va, a aw chu in ngaithla bawk hek lo.

²⁴Ka hriat tirh che u ata LALPA chunga hel hmang mi in ni reng a.

²⁵Chutichuan, LALPAN, ‘Ka tiboral dâwn,’ a tih che u avâng khân LALPA hmaah ka bawkkhup a, ni sawmli leh zan sawmli ka bawhkhuh kha.

²⁶Tin, LALPA hnênah chuan ka ṭawngṭai a, ‘Aw Lalpa PATHIAN, ropuinaa i tlan, kut chak taka Aigupta ram ata i tlan chhuah, i mite leh i rochante chu tiboral suh ang che.

²⁷I chhiahhlawh Abrahama te, Isaaka te, Jakoba te chu hre reng la, he miteho hi an luhlulzia te, an suahsualzia te, an sualzia teah en suh ang che;

²⁸chuti lo chuan, i mi hruai chhuahna rama mite chuan, LALPAN a ram tiamah chuan a hruai theih loh avâng leh a huat avângin, thlalêra thah tûrin a hruai chhuak a ni, an ti dah ang e.

²⁹I thiltihtheihna ropui tak leh i bân phara i hruai chhuah, i mite leh i rochante an ni miau si a,’ ka ti a.