Read Mizo_Old_version CHANCHIN ṬHA JOHANA ZIAK 1 Bible Online

CHANCHIN ṬHA JOHANA ZIAK 1 - Mizo_Old_version bible

CHANCHIN ṬHA JOHANA ZIAK 1

¹A tîrin Thu a awm, Thu chu Pathian hnênah a awm, Thu chu Pathian a ni.

²Chu mi chu a tîrin Pathian hnênah a awm.

³Engkim a zain ama siam a ni; thil siam zawng zawng hi ama siam loh eng mah a awm lo.

⁴Amahah chuan nunna a awm; chu nunna chu mihringte ênna a ni a.

⁵Êng chu thim zîngah a lo êng a; thimin chu chu a hre lo.

⁶Pathian tirh mi pakhat a lo awm a, a hming chu Johana a ni.

⁷Chu mi chu hriattîr tûrin a lo kal a, êng thu chu hriattîr tûrin; amah avânga mi zawng zawngin an rinna tûrin.

⁸Ani chu êng chu a ni lo, êng thu chu hriattîr tûra lo kal a ni zâwk e.

⁹Êng tak, mi tin tiêng ṭhîn kha a awm a, khawvêlah a lo kal mêk a ni.

¹⁰Ani chu khawvêlah a awm, khawvêl ama siam a ni, khawvêlin amah a hre si lo.

¹¹Ama mite hnênah a lo kal a, ama miten an lo lâwm si lo.

¹²Nimahsela, amah lâwm apiang chu, an hnênah Pathian fate nih theihna tûr a pe, a hming ringtute chu;

¹³chûng mite chu thisen hrin an ni lo va, tisa duh zâwnga hrin an ni hek lo, mipa duh zâwng pawha hrin an ni hek lo, Pathian hrin an ni zâwk e.

¹⁴Tin, Thu chu tisaah a lo chang a, kan zîngah a awm ta a (Pa fa mal neih ropui angin a ropuizia kan hmu), khawngaih leh thutakin a khat.

¹⁵Johanan a thu a hriattîr a, a au va, “ ‘Ka hnunga mi zui tûr khân mi lehkhalh tawh a ni, ka hmaa awm tawh reng a nih avângin,’ tia a thu ka sawi kha amah hi a ni,” a ti a.

¹⁶A famkimna kan chang ṭheuh, khawngaih chunga khawngaih lehchhâwnna nên.

¹⁷Dân thu Mosian a pe, khawngaihna leh thutak Isua Krista avângin a lo awm.

¹⁸Tu mân eng lai mahin Pathian an hmu lo, a Fapa mal neih, Pa ângchhûnga awm ngei khân a chanchin a hril tawh a ni.

¹⁹Tin, Juda-ten, “Tu nge i nih?” tia zâwt tûra Jerusalem khua ata a hnêna puithiamte leh Levia chia mite an tirh lai khân, hêng hi Johana thu lo hriattîr chu a ni;

²⁰ṭang lovin a inpuang a, “Krista chu ka ni lo ve,” tiin a inpuang a.

²¹Tin, anni chuan a hnênah, “Tu nge i nih le? Elija i ni em?” an ti a, an zâwt a. Tin, ani chuan, “Ka ni lo ve,” a ti a. “Zâwlnei kha i ni em?” an ti a. Tin, ani chuan, “Ni lo ve,” a ti a, a chhâng a.

²²Tin, anni chuan a hnênah, “A nih leh, tu nge i nih? Min tîrtute kan chhân theih nân min hrilh ta che. I chanchin rêng eng nge i sawi dâwn?” an ti a.

²³Tin, ani chuan, “ ‘Lalpa kalkawng tirual rawh u,’ tia thlalêra autu aw ka ni, zâwlnei Isaia sawi ang khân,” a ti a.

²⁴An mi tirhate chu Pharisaite hnêna mi an ni a.

²⁵Tin, anni chuan a hnênah, “Krista tal, Elija tal, zâwlnei tal chu i nih si loh chuan engati nge i baptis ṭhin le?” an ti a, an zâwt leh a.

²⁶Tin, Johanan an hnênah, “Keiin tuiin ka baptis ṭhîn, in zîngah mi pakhat in hriat loh a ding a ni,

²⁷ani chu ka hnua lo kal tûr chu a ni a, a pheikhawk hrui phelh tlâk pawh ka ni lo ve,” a ti a, a chhâng a.

²⁸Chûng thil chu Jordan râla Bethani khuaah, Johana baptisnaah khân an ti a ni.

²⁹Tin, a tûkah chuan Johanan Isua a hnênah lo kal dâwnin a hmu a. Tin, a sawi a, “En teh u, Pathian Berâmno, khawvêl sual kalpuitu tûr saw!

³⁰Saw mi saw a ni, ‘Mi pakhat mi lehkhalh khân mi zui dâwn, ka hmaa awm sa rêng a ni,’ ka tiha kha.

³¹Amah chu ka lo hre si lo; nimahsela, Israel-ten amah an hriat theih nân, tuia baptis-in ka lo kal a ni,” a ti a.

³²Tin, Johanan a thu a hriattîr a, a sawi a, “Thlarau chu ṭhuro angin vân aṭanga chhuk ka hmu a, a chungah a fu reng a.

³³Amah chu ka hre si lo va; nimahsela, tuia baptis tûra mi tîrtu khân ka hnênah, ‘Tu chungah pawh Thlarau zuk fua, a chunga awm reng i hmuh apiang, amah chu Thlarau Thianghlima baptistu tûr chu a ni ang,’ mi ti a.

³⁴Chu chu ka hmu tawh a, he mi hi Pathian Fapa a ni tih ka hriattîr tawh,” a ti a.

³⁵Tin, a tûk lehah Johana a ding a, zirtîrte pahnih nên;

³⁶tin, Isua veivâk lai a en a, “En teh u, Pathian Berâmno saw,” a ti a.

³⁷Tin, a zirtîrte pahnih chuan a thusawi chu an hria a, Isua an zui ta a.

³⁸Tin, Isua chu a hawi a, an rawn zui a hmu a, an hnênah, “Eng nge in zawn?” a ti a. Tin, anni chuan, “Rabbi (Chu chu Zirtîrtu tihna a ni), khawiah nge i awm?” an ti a.

³⁹Anin an hnênah, “Lo kal ula, in hmu ang,” a ti a. Chutichuan, an kal a, a awmna chu an hmu a, chumi ni chuan a hnênah an awm reng a; zanriah chhum hun lai a ni a.

⁴⁰Johana thusawi chu hriaa Isua zuitute pahnih chu, a pakhat zâwk chu Andria, Simon Petera unau a ni.

⁴¹Ani chuan a hmasa berin ama unau Simona a hmu a, a hnênah, “Messia kan hmu ta,” a ti a (chu chu Krista tihna a ni).

⁴²Tichuan, Isua hnênah a rawn hruai a. Isuan ani chu a lo en a, “Johana fapa Simona i ni, Kipha an vuah ang che,” a ti a (chu chu Petera tihna a ni).

⁴³Tin, a tûkah chuan Isua chuan Galili rama kal a tum a, Philipa a hmu a, a hnênah, “Mi zui rawh,” a ti a.

⁴⁴Philipa chu Bethsaida khuaa mi a ni, chu chu Andria leh Petera awmna khua bawk a ni.

⁴⁵Philipa chuan Nathanaela a hmu a, a hnênah, “A chanchin Mosian Dân Lehkhabua a ziak leh zâwlneiten an ziak kha, amah chu kan hmu ta, Nazareth Isua, Josefa fapa chu,” a ti a.

⁴⁶Tin, Nathanaela chuan a hnênah, “Nazareth khuaah thil ṭha a chhuak thei em ni?” a ti a. Philipa chuan a hnênah, “Lo kal la, en rawh,” a ti a.

⁴⁷Isuan Nathanaela a hnêna lo kal dâwnin a hmu a, a chanchin a lo sawi a, “En teh u, Israel mi tak, ngamthlêmna rêng nei lo saw,” a ti a.

⁴⁸Nathanaela chuan a hnênah, “Nangin engtin nge mi hriat?” a ti a. Isuan a hnênah, “Philipan a koh hma chea, theipui bula i awm lai khân ka hmu che asin,” a ti a, a chhâng a.

⁴⁹Nathanaelan a hnênah, “Rabbi, Pathian Fapa i ni, Israel-te Lalber i nih hi,” tiin a chhâng a.

⁵⁰Isuan a hnênah, “ ‘Theipui bulah ka hmu che asin,’ i hnêna ka tih avângin i ring a ni maw? Hêng aia thil ropui zâwk hi i la hmu ang,” a ti a, a chhâng a.

⁵¹Tin, Isua vêkin a hnênah, “Tihtakmeuhvin, tihtakmeuhvin ka hrilh a che u, vân inhawngah, Pathian vântirhkohte Mihring Fapa chungah hian chhuk leh chho in la hmu ang,” a ti a.