Read Mizo_Old_version CHANCHIN ṬHA JOHANA ZIAK 10 Bible Online

CHANCHIN ṬHA JOHANA ZIAK 10 - Mizo_Old_version bible

CHANCHIN ṬHA JOHANA ZIAK 10

¹“Tihtakmeuhvin, tihtakmeuhvin ka hrilh a che u, tu pawh berâm huanga kawngkhâra lût lova, dang lama lâwn lût chu, chu mi chu englo rûk hmang leh suam hmang a ni e.

²Tu pawh kawngkhâra lût erawh chu berâm vêngtu a ni.

³Kawngkhâr vêngtuin ani chu a lo hawnsak ṭhîn a; berâmten a aw an hre ṭhîn a; ama berâmte chu an hmingah a ko ṭheuh va, a hruai chhuak ṭhîn.

⁴A ta zawng zawng a chhuahtîr veleh an hma a hruai a, berâmte chuan amah an zui ṭhîn a, a aw an hre si a.

⁵Mi dang zawng an zui lo vang a, an tlân bosan zâwk ang; mi dangte aw zawng an hriat loh avângin,” a ti a.

⁶Chu tehkhin thu chu Isuan an hnênah a sawi a; nimahsela, eng thu nge an hnênah a sawi tih an hre si lo.

⁷Chutichuan, Isuan an hnênah a sawi leh a, “Tihtakmeuhvin, tihtakmeuhvin ka hrilh a che u, kei hi berâm kawngkhâr chu ka ni.

⁸Ka hmaa lo kal zawng zawngte kha rûk hmangte, suam hmangte an ni vek a; nimahsela, berâmte chuan an thu an awih lo.

⁹Kei kawngkhâr chu ka ni; tu pawh keimahah a luh chuan humhimin a awm ang a, a lûtin a chhuak ang a, ei tûr a hmu bawk ang.

¹⁰Rûk hmang chu ru tûr leh tihlum tûr leh tichhe tûr lo chuan a lo kal lo; kei zawng nun an neih nân, tam taka an neih nân lo kal ka ni.

¹¹Kei berâm vêngtu ṭha ka ni; berâm vêngtu ṭhain berâmte tân a nun a pe ṭhîn.

¹²Inhlawhfa, berâm vêngtu tak ni lova, berâmte a ta ni lova chuan, chinghne lo kal a hmuhin berâmte a tlânsan ṭhîn; tin, chinghnia chuan berâmte a seh a, a tidarh ṭhîn;

¹³inhlawhfa a ni a, berâmte a ngaihsak loh avângin a tlân bo ṭhîn a ni.

¹⁴Kei zawng berâm vêngtu ṭha ka ni; Pain mi hriat leh keiin Pa ka hriat ang hian ka ta ka hria a, ka ta pawhin mi hria a ni; tin, beramte tân chuan ka nun ka pe.

¹⁶Tin, he berâm huanga mi lo hi berâm dang ka nei; anni pawh ka la rawn hruai tûr a ni, ka aw pawh an hria ang; chutichuan, pâwl khatin an awm ang a, a vêngtu pakhat nên.

¹⁷“Hemi avâng hian Pain mi hmangaih a ni, lâk leh tûra ka nun ka pêk dâwn avâng hian.

¹⁸Tu mân mi lâksak lo vang, keima thu thuin ka pe zâwk dâwn a ni. Pe thei ka ni, la leh thei pawh ka ni. He thupêk hi ka Pa hnên aṭanga ka hmuh a ni,” a ti a.

¹⁹Chûng thu avâng chuan Juda-te chu an inṭhen a, an inkhing leh a.

²⁰A ṭhen tam takin, “Ramhuai a zâwl a, a â a nih hi; engati nge a thu in ngaihthlâk?” an ti a.

²¹A ṭhenin, “Hêng thu hi ramhuaizâwl thusawi a ni lo ve. Ramhuaiin mitdel mit a tivâr thei em ni?” an ti a.

²²Tin, Jerusalem khuaa inpumpêk kût lai a ni a, chu chu thlasik lai a ni.

²³Tin, Isua chu Pathian biak inah, Solomona hulhliapah a vei a vei a.

²⁴Tin, Juda-te chu a vêlah an lo kal a, a hnênah, “Eng chen nge tuilairapin min siam dâwn? Krista i nih chuan fiah takin min hrilh rawh,” an ti a.

²⁵Isuan an hnênah, “Ka hrilh tawh che u kha, in awih si lo; ka Pa hminga thil ka tih hi, hêng hian ka chanchin a hriattîr a nih hi.

²⁶Nimahsela, in awih si lo, ka berâm zînga mi in nih loh avângin.

²⁷Ka berâmten ka aw an hre ṭhîn, kei pawhin anni chu ka hria, anni chuan min zui ṭhîn;

²⁸an hnênah chatuana nunna ka pe a; kumkhuain an boral lo vang a, tu mân ka kut ata mi chhuhsak hek lo vang.

²⁹Anni mi petu ka Pa chu, mi zawng zawng aia ropui ber a ni a; tu mân Pa kut ata chu an chhuhsak thei lo vang.

³⁰Kei leh Pa chu pumkhat kan ni,” tiin a chhâng a.

³¹Tin, Juda-te chuan a denna tûrin lung an chhar leh a.

³²Tin, Isuan anni chu a bia a, “Pa hnêna chhuak hnathawh ṭha tam tak ka entîr che u a, khâng hnathawhte zîngah khân, hna eng vâng khân nge lunga mi den dâwn hi?” a ti a.

³³Juda-te chuan a hnênah, “Hna ṭha chungah lungin kan den dâwn loh che hi; Pathian i sawichhiat chungah leh, nang, mihring ni sia, Pathiana i insiam vâng zâwk hian a ni,” tiin an chhâng a.

³⁴Isuan an hnênah, “In dân lehkhabuah, ‘Pathiante in ni ka ti,’ tih ziak a ni lo vem ni?

³⁵Pathian thu thlennate mah pathianho an tih chuan (Pathian Lehkha Thu bân theih a ni si lo va),

³⁶Pain a ruata, khawvêla a tirha chungah hian, ‘Pathian Fapa ka ni,’ ka tih avângin, ‘Pathian i sawichhia,’ in ti a ni maw?

³⁷Ka Pa hna thawk ka nih loh chuan mi ring suh u.

³⁸Amaherawhchu, thawk ka nih chuan kei mi ring lo mah ula, hnathawhte tal hi ring rawh u; Pa keimahah a awm tih leh, kei Paah ka awm tih in hriata in rin nân,” a ti a, a chhâng a.

³⁹Chutichuan, ani chu man an tum leh a; nimahsela, an kut ata chu a chhuak a,

⁴⁰Jordan lui râlah, Johanan a tîra mi a baptis-na lamah khân a kal bo leh a, chutah chuan a awm ta reng a.

⁴¹Tin, mi tam tak a hnênah an lo kal a, “Johanan chhinchhiahna eng mah zawng a ti lo va; nimahsela, Johanan he mi chungchâng thu a sawi apiang kha a lo dik hle hi,” an ti a.

⁴²Tin, chutah chuan mi tam takin amah an ring ta a.