Read Mizo_Old_version CHANCHIN ṬHA JOHANA ZIAK 11 Bible Online

CHANCHIN ṬHA JOHANA ZIAK 11 - Mizo_Old_version bible

CHANCHIN ṬHA JOHANA ZIAK 11

¹Tin, mi pakhat, Mari leh a laizâwn Marthi awmna khua Bethani-a mi Lazara, damlo a awm a.

²(Mari, hriak rimtui Lalpa hnawiha, a sama a ke hrutu kha, kha mi nuṭa Lazara kha a ni, damlo chu.)

³Tin, a farnuten Isua hnênah, “Lalpa, ngai teh, i hmangaih kha a damlo ve,” tiin mi an tîr a.

⁴Tin, Isuan chu chu a hria a, “He nâ hi thihna tûr a ni lo, Pathian mawi nân a ni zâwk e, Pathian Fapa chu hemi avâng hian a la mawina tûrin,” a ti a.

⁵Tin, Isuan Marthi te, a laizâwn te, Lazara te chu a hmangaih a.

⁶Amaherawhchu, a damlo tih a hriatin a awmna ngaiah ni hnih a la awm ta cheu va.

⁷Tin, chumi hnuah chuan a zirtîrte hnênah, “Judai ramah i kal leh ang u,” a ti a.

⁸Tin, zirtîrte chuan a hnênah, “Rabbi, hmân lawkah khân Juda-ten lunga den an tum che kha; chuti pawhin chutah chuan i kal leh bawk dâwn em ni?” an ti a.

⁹Tin, Isuan, “Chhûnah dârkâr sâwm leh pahnih a awm lo vem ni? Mi chhûna a lên chuan a pai ngai lo, he khawvêl êng hi a hmuh avângin.

¹⁰Amaherawhchu, mi zâna a lên chuan a pai ṭhîn, amahah chuan êng a awm loh avângin,” a ti a, chhâng a.

¹¹Chûng thu chu a sawi a; tin, chumi hnuah chuan an hnênah, “Kan ṭhian Lazara chu a muhîl ta a; a muhîl kai harh tûrin ka kal dâwn a ni,” a ti a.

¹²Chutichuan, zirtîrte chuan a hnênah, “Lalpa, a muthilh tawh chuan a dam leh ang chu,” an ti a.

¹³(Isua chuan a thih thu a sawi a ni a; nimahsela, anni chuan a chawlh chhûnga a muthilh thu a sawi em maw an ti a.)

¹⁴Chutichuan, Isuan fiah takin an hnênah a sawi a, “Lazara a thi a ni.

¹⁵Chuta ka awm lo chu ka lâwm a ni, nangmahni avângin, in rin theih nân; nimahsela, a hnênah i kal ang u,” a ti a.

¹⁶Tin, Thoma, Phîra an tih chuan a zirtîrpuite hnênah, “A thihnaa thi ve tûrin i kal ang u,” a ti a.

¹⁷Chutichuan, Isuan a thlenin thlânah ni li a lo awm tawh tih a hria a.

¹⁸Bethani khua chu Jerusalem khaw kiang a ni a, fîng sâwm leh fîng nga laia hla a ni;

¹⁹tichuan, an nuṭa thih chunga tithlamuang tûrin Juda-ho tam tak Marthi leh Mari hnênah an lo kal a.

²⁰Tin, Marthi chuan Isua a lo kal dâwn tih a hriat veleh a va hmuak a; Mari erawh chu inah a la ṭhu reng a.

²¹Tin, Marthi chuan Isua hnênah, “Lalpa, heta awm ni la chu ka nuṭa a thi lo tûr.

²²Tûnah pawh Pathian hnêna i ngen apiang Pathianin a pe ang che tih ka hria e,” a ti a.

²³Isuan a hnênah, “I nuṭa a tholeh ang,” a ti a.

²⁴Marthi chuan a hnênah, “Ni kin nia thawhlehnaah chuan a tholeh ang tih ka hria e,” a ti a.

²⁵Tin, Isuan a hnênah, “Kei hi thawhlehna leh nunna chu ka ni; tu pawh mi ring chu thi mah sela a nung reng ang;

²⁶nung apiangin mi ring chu kumkhuain an thi lo vang. Chu thu chu i ring em?” a ti a.

²⁷Ani chuan a hnênah, “Ring e, Lalpa; Krista, Pathian Fapa, khawvêla lo kal tûra chu i ni tih ka ring e,” a ti a.

²⁸Tin, chu thu chu a sawi zawh veleh a kal a, a laizâwn Mari chu a rûkin a va ko va, “Zirtîrtu hetah a awm a, a ko va che,” a ti a.

²⁹Tin, ani chuan chu chu a hriat veleh a tho thuai a, a hnênah a va kal a.

³⁰(Isua chu khuaah a la lût lo va, Marthiin a va hmuah laia a awmna ngaiah a la awm a.)

³¹Tin, in chhûnga a thlamuantu, a awmpui Juda-te chuan Mari a tho thuaia, a chhuak an hmuh veleh, thlânah ṭap tûrin a kal dâwn emaw an ti a, an zui a.

³²Tin, Mari chuan Isua awmna chu a va thleng a, a hmuh veleh a ke bulah a bawkkhup a, a hnênah, “Lalpa, heta awm ni la chu, ka nuṭa a thi lo tûr,” a ti a.

³³Tin, Isuan Mari ṭap leh a rawn zuitu Juda-te ṭap chu a hmu a, a rilruin a rûm a, a lungngai a.

³⁴“Ani chu khawiah nge in zalh?” a ti a. Anni chuan a hnênah, “Lalpa, lo kal la, en teh,” an ti a.

³⁵Isua chu a ṭap ta a.

³⁶Tin, Juda-te chuan, “En teh u, Lazara hi a va lo hmangaih êm ve le!” an ti a.

³⁷Nimahsela, ṭhenkhat chuan, “He mi, mitdel mit tivârtu hian he mi pawh hi a thih lohtîr thei lo vem ni?” an ti a.

³⁸Tin, Isua chu a rilruin a rûm leh a, thlân chu a thleng ta a. Chu thlân chu pûk a ni a, a kawngkaah chuan lung pakhat a awm.

³⁹Isuan, “Lung hi chawi sawn rawh u,” a ti a. A thia farnu Marthi chuan a hnênah, “Lalpa, tûnah zawng a uih tawh ang; a thihna ni li a ni tawh si a,” a ti a.

⁴⁰Isuan a hnênah, “ ‘I rin chuan Pathian ropuizia i hmu ang,’ ka ti lo che em ni?” a ti a.

⁴¹Chutichuan, lung chu an chawi sawn a. Tin, Isua chu a vanvadâk a, “Ka Pa, ka thu i ngaihthlâk avângin i chungah ka lâwm e.

⁴²Kumkhuain ka thu i ngaithla ṭhîn tih ka hre reng a ni; nimahsela, mipui din vêl avângin chu chu ka ti a ni, nangin mi tîr tih an rin theih nân,” a ti a.

⁴³Tin, chutia a ṭawng zawh veleh chuan aw ring takin, “Lazar, lo chhuak rawh,” a ti a, a au va.

⁴⁴Tin, mitthi chu a kut a ke thlân puana tuam chungin a lo chhuak ta a, a hmai pawh inhrûkna puana tuam a ni a. Isuan an hnênah, “Phelh ula, kaltîr rawh u,” a ti a.

⁴⁵Chu vâng chuan Mari lênpuitu, Isua thiltih hmutu Juda-te zînga tam takin Isua an ring ta a.

⁴⁶Nimahsela, a ṭhen Pharisaite hnênah an va kal a, an hnênah Isua thiltihte chu an hrilh a.

⁴⁷Chutichuan, puithiam lalte leh Pharisaite chuan rorêltuho an ko khâwm a, “Engtin nge kan tih ang? He mi hian thil mak tam tak a ti si a.

⁴⁸Hetianga kan thlahthlam chuan mi zawng zawngin amah an ring ang a; tin, Rom-a mite an lo kal ang a, kan hmun leh kan chite hi min lâksak ang,” an ti a.

⁴⁹Tin, an zînga mi pakhat Kaiapha, chumi kuma puithiam lalber chuan an hnênah, “Nangnin eng mah in hre hauh lo,

⁵⁰kan chi zawng zawng boral lohna tûrin, mi zawng zawng aia mi pakhat thih in tân a ṭha tih in ngaihtuah bawk lo,” a ti a.

⁵¹(Chu thu chu ama phuah chawpin a sawi lo, chumi kum chuan puithiam lalber a ni a, an chite aia Isua a thih tûr a sawi lâwk a ni zâwk e.

⁵²Chumi chite ai chauh chuan a ni lo, Pathian fa khawvêla darhte zawng zawng pâwl khata a hruai khâwmna tûr pawhin a ni bawk.)

⁵³Chutichuan, chumi ni achin chu amah tihlum tûrin an inrâwn ṭhîn a.

⁵⁴Chuvângin, Isua chu Juda-te zîngah a langin a lêng leh ta lo va, chuta ṭang chuan thlalêr dep lama khaw pakhat, Ephraim an tihah chuan a va kal ta zâwk a; chutah chuan zirtîrte nên chuan an awm ta reng a.

⁵⁵Tin, Juda-te kalhlên kût chu a hnai tawh a, mi tam tak chu inthian tûrin, ram ata kalhlên kût hmain Jerusalem khuaah an han kal a.

⁵⁶Chutichuan, Isua an zawng a, Pathian biak inah ding chungin an inbia a, “Eng nge in rin? Kûtnaah a lo kal lo vang maw?” an inti a.

⁵⁷Puithiam lalte leh Pharisaiten amah chu an man theih nân, tu pawhin a awmna an hriat chuan puan tûr a ni tih thu an pe tawh si a.