Read Mizo_Old_version CHANCHIN ṬHA JOHANA ZIAK 12 Bible Online

CHANCHIN ṬHA JOHANA ZIAK 12 - Mizo_Old_version bible

CHANCHIN ṬHA JOHANA ZIAK 12

¹Tin, kalhlên kûtna tûr ni ruk a la awmin, Isuan mitthi zîng ata a kaihthawh Lazara awmna Bethani khua kha a lo thleng a.

²Tin, chutah chuan ama tân zân ruai an ṭheh a; Marthiin rawng a bâwl a, Lazara erawh chu a chawhlui kîlpuitu pakhat a ni.

³Tin, Marin bûk zâtve spiknard hriak rimtui to tak a rawn keng a, Isua kete chu a chulh a, a samin a kete chu a hru a; tichuan, chu hriak rim chuan in chu a khat ta rum rum a.

⁴Nimahsela, Iskariot Juda, a zirtîr pakhat, a mantîrtu tûr chuan,

⁵“He hriak rimtui hi engati nge duli zathuma hralhin, mi retheite hnêna an pêk zâwk loh?” a ti a.

⁶(Mi retheite a ngaihsak vânga chu thu chu sawi a ni lo; rûkru a ni a, tangka ip a kawl a, a chhûnga dah chu a lâk ṭhin vâng zâwk a ni.)

⁷Tin, Isuan, “Mi phûm ni atân khêk rawh se.

⁸Mi retheite chu kumkhuain in hnêna awm an ni alâwm; kei erawh chu kumkhuaa in hnêna awm tûr ka ni lo,” a ti a.

⁹Chutah chuan Isua a awm tih Juda hnamchawmten an lo hria ta a; tin, an lo kal a, Isua chauh rawn kal chhan an ni lo va, mitthi zîng ata a kaihthawh Lazara pawh kha hmuh duh fâwm an ni bawk.

¹⁰Tin, puithiam lalte chu Lazara pawh tihlum tûrin an inrâwn a;

¹¹amah avânga Juda-te tam takin an pakaisana, Isua an rin ṭhin avângin.

¹²A tûkah chuan kûtnaa lo kal mipui tam takin, Isua chu Jerusalem khuaah a lo kal dâwn tih an hriatin,

¹³tûmkaute an keng a, a hmuak tûrin an va chhuak a, “Hosanna, Lalpa hminga Israel Lal lo kal chu fakin awm rawh se,” tiin an au va.

¹⁴Tin, Isuan sabengtungno a hmu a, a chungah a chuang a,

¹⁵“Hlau suh, Zion fanu; En teh, i Lal chu, Sabengtungno chunga chuangin, A lo kal dâwn e,” tih ziak ang khân.

¹⁶Chûng chu a tîrin a zirtîrten an hre lo va; nimahsela, Isua chawimawia a awm hnuah chuan, a chanchinah chûng thu chu ziak a ni tih leh, a chungah chûng thil chu an lo ti ngei tih an lo hre ta a.

¹⁷Tin, Lazara thlân ata a koh chhuaha, mitthi zîng ata a kaihthawh laia a hnêna mipui awmte khân a thu chu an hriattîr ta zêl a.

¹⁸Chumi avâng chuan a ni, mipuite pawh chuan amah chu an va hmuah ni, chu thil mak chu a ti tih an hre si a.

¹⁹Chutichuan, Pharisaite chuan, “Hre rawh u, eng mah in tih theih loh hi; en rawh u, khawvêlin amah an zui tâk hi,” an ti a.

²⁰Tin, kûtnaa Pathian chibai bûk tûra han kalte zîngah Grik tute emaw an awm a;

²¹tin, chûngte chu Galili rama Bethsaida khuaa mi Philipa hnênah chuan an lo kal a, a hnênah, “Ka pu, Isua hmuh kan duh e,” an ti a, an ngên a.

²²Philipa chuan Andria a rawn hrilh a, Andria leh Philipa chuan Isua an rawn hrilh a.

²³Tin, Isuan a chhâng a, an hnênah, “Mihring Fapa chawimawia a awm hun chu a thleng tawh.

²⁴Tihtakmeuhvin, tihtakmeuhvin ka hrilh a che u, buh fang leia a tlâk lohva, a thih loh chuan a mal chauhvin a awm reng ṭhîn; a thih erawh chuan tam takin a rah ṭhîn.

²⁵Tu pawh a nun thlahlel chuan a hloh ṭhîn; tu pawh he khawvêlah hian a nun ngaitlâwm chuan chatuana nunna tûr a vawng reng ang.

²⁶Tu pawhin ka rawng a bâwl chuan mi zui rawh se; ka awmnaah ka rawngbâwltu pawh a awm ang; tu pawhin ka rawng a bâwl chuan ani chu Pain a chawimawi ang.

²⁷“Tûnah ka rilru a mangang e; eng nge ka sawi ang aw? ‘Ka Pa, hemi hun lakah hian mi chhandam rawh,’ ka ti ang em ni? Eng pawh ni sela, hemi tûr hi, hemi hun thleng hian ka awm chhan a ni.

²⁸Ka Pa, i hming chawimawi rawh,” a ti a. Chutichuan, vân aṭangin aw a lo chhuak a, “Ka chawimawi tawh, ka chawimawi leh bawk ang,” a ti a.

²⁹Tin, mipui a kianga dingte chuan chu chu an hria a, “Khawpui a ri a ni,” an ti a; mi dangten, “Vântirhkohvin amah a bia a ni,” an ti a.

³⁰Isuan a chhâng a, “Chu aw chu ka tâna lo chhuak a ni lo, nangmahni tân a ni zâwk e.

³¹Tûnah he khawvêl hi ngaihtuah lai a ni; tûnah he khawvêl lal hi paih chhuah a ni ang.

³²Tin, kei lei ata khai kânin ka awm chuan, mi zawng zawng keima hnênah ka hîp ang,” a ti a.

³³Chu thu chu a thihzia tûr hriattîr nân a sawi a ni.

³⁴Tin, mipui chuan a hnênah, “Krista chu chatuanin a awm reng dâwn tih dân lehkhabuah kan hria e; nangin, ‘Mihring Fapa khai kânin a awm tûr a ni,’ eng ti tiha ti nge i nih? Chu Mihring Fapa chu tu nge ni?” an ti a, an chhâng a.

³⁵Tin, Isuan an hnênah, “Êng hi rei lo tê in zîngah a la awm rih e. Êng in neih chhûng hian lêng rawh u, thimin a nan loh nân che u; tu pawh thima lêng chuan a kalna chin a hre ṭhîn lo.

³⁶Êng in neih chhûng hian êng hi ring rawh u, êng fate in lo nih theih nân,” a ti a. Chûng thu chu Isuan a sawi a; tin, a kal a, an hmuh loh tûrin a biru ta a.

³⁷An hmaah chutiang thil mak tam tak chu ti mah sela, amah an ring si lo:

³⁸“Lalpa, kan thusawi tuin nge ring? Lal kut pawh tu hnênah nge a lan?” tih, zâwlnei Isaia thusawi kha a thlen nân.

³⁹Hemi avâng hian a ni an rin theih loh, Isaian,

⁴⁰“Aman an mit a tidel a, An thinlung a tiâ a; Chuti lo chuan, an mitin an hmu ang a, An thinlungin an hre dah ang a; Tin, an hawi kîr leh dah ang a, Keiin anni chu ka tidam dah ang e,” tih a sawi leh avâng hian.

⁴¹Isaian a ropuizia a hmuh leh a chanchin thu a sawi avângin chûng thu chu a sawi a ni.

⁴²Nimahsela, hotute zînga tam takin Isua an ring ta a; amaherawhchu, Pharisaite avângin an inpuang lo; chuti lo chuan, inkhâwmna in hnawngin an awm ang;

⁴³Pathian hnêna ropuina ai chuan mihring hnêna ropuina an duh zâwk si a.

⁴⁴Tin, Isua chu a au va, “Tu pawh mi ring chu kei mi ring a ni lo, mi tîrtu ring a ni zâwk e.

⁴⁵Tu pawh mi hmu chu mi tîrtu hmu a ni.

⁴⁶Êntua khawvêla lo kal ka nih hi, tu pawh mi ring apiang thima an awm reng loh nân.

⁴⁷Tu pawh ka thusawi hriain, awih lo mah sela, keiin thiam loh ka chantîr lo; khawvêl thiam loh chantîr tûra lo kal ka ni lo va, khawvêl chhanhim tûra lo kal ka ni zâwk si a.

⁴⁸Tu pawh mi duh lova, ka thusawite vawng lo chuan thiam loh chantîrtu pakhat a nei a ni; ka thusawi kha, khami thu ngei khân ni kin niah chuan amah chu thiam loh a la chantîr ang.

⁴⁹Keima phuah chawpin ka sawi si lo; Pa mi tîrtu chuan ka sawi tûr leh ka hril tûr hi thu mi pe zâwk a ni.

⁵⁰Ama thupêk chu chatuana nunna a ni tih ka hria; chu vâng chuan thu ka sawi hi, Pa mi hrilh ang zêlin ka sawi a ni,” a ti a.