Read Mizo_Old_version CHANCHIN ṬHA JOHANA ZIAK 13 Bible Online

CHANCHIN ṬHA JOHANA ZIAK 13 - Mizo_Old_version bible

CHANCHIN ṬHA JOHANA ZIAK 13

¹Tin, kalhlên kût hmain Isuan he khawvêl hi chhuahsana, Pa hnêna a kal hun a thleng tawh tih a hria a, ama mi, khawvêla awm a hmangaih ṭhinte chu, a tâwp thleng pawhin a hmangaih reng a.

²Tin, zanriah ei laiin (chumi hma pawhin Diabolan Simona fapa Iskariot Juda chu, Isua mantîr a rilrûktîr a),

³Isuan, Pain a kutah thil engkim a vawntîr te, Pathian hnên aṭanga lo chhuak a nih te, Pathian hnêna a kal dâwn te hre reng chungin,

⁴a zanriah kîl lai chu a tho va, a puante a dah a, inhrûkna puan a la a, a veng a.

⁵Tichuan, maihûnah tui a bun a, zirtîrte ke a sil ta a, inhrûkna puan a ven chuan a hru zêl a.

⁶Chutichuan, Simon Petera hnênah a lo kal a. Ani chuan, “Lalpa, nang êmin ka ke i sil dâwn em ni?” a ti a.

⁷Isuan a hnênah, “Ka thiltih hi tûnah i hre lo; nimahsela, nakinah i la hria ang,” a ti a, a chhâng a.

⁸Peteran a hnênah, “Ka ke i sil tawp lo vang,” a ti a. Isuan a hnênah, “Ka sil loh che chuan ka hnênah eng mah chan i nei lo vang,” a ti a.

⁹Simon Peteran a hnênah, “Lalpa, chuti a nih chuan ka ke chauh ni lovin, ka kut leh ka lu pawh le,” a ti a.

¹⁰Isuan a hnênah, “Inbual tawh chu a ke lo chu sil a ngai lo, a fai var alâwm; nangni in fai e, in za erawh chuan a ni lo,” a ti a.

¹¹(A mantîrtu tûr chu a hre si a; chuvângin, “In za chuan in fai lo,” a ti a ni.)

¹²Chutianga an ke a sila, a puante a lâka, a ṭhut leh hnu chuan an hnênah, “In chunga ka thiltih hi eng tihna nge ni in hria em?

¹³Nangnin Zirtîrtu leh Lalpa min ti ṭhîn; in tidik e, ka ni ngei rêng a.

¹⁴Kei Lalpa leh Zirtîrtu mahin in ke ka sil chuan, nangni pawhin in ke in insilsak tûr a ni.

¹⁵In chunga ka tih ang hian nangni pawhin in tih vena tûrin ka tihhmuh che u a ni si a.

¹⁶Tihtakmeuhvin, tihtakmeuhvin ka hrilh a che u, bawih a pu aiin a ropui lo; tirhkoh pawh a tîrtu aiin a ropui hek lo.

¹⁷Chûng thil chu in hriat chuan ti ula in eng a thâwl ang.

¹⁸“In zaa thu ka sawi lo ve; ka thlante chu ka hria; nimahsela, chu chu, ‘Ka chhang eituin a keartui ka chungah a lek ta,’ tih Pathian Lehkha Thu kha a lo thlen theihna tûr a ni.

¹⁹Tûnah a lo thlen hmain ka hrilh che u hi, a lo thlen hunah kei hi amah kha ka ni tih in rin theihna tûrin.

²⁰Tihtakmeuhvin, tihtakmeuhvin ka hrilh a che u, tu pawh ka tirh apiang lâwm chu, keimah mi lâwm a ni; tu pawh kei mi lâwm chu mi tîrtu lâwm a ni,” a ti a.

²¹Isuan chutianga a sawi zawh chuan a rilruin a mangang a, “Tihtakmeuhvin, tihtakmeuhvin ka hrilh a che u, in zînga mi pakhatin mi mantîr ang,” tiin a hriattîr ta a.

²²Tin, zirtîrte chuan a tih bîk an hre lo va, an inen hlawm a.

²³Tin, a zirtîrte zînga mi pakhat, Isuan a hmangaiha chu, dawhkân sîrah Isua ângchhûngah bawkin a awm a.

²⁴Tin, Simon Peteran chu mi hnênah chuan, “Tu thu ber nge a sawi, mi hrilh teh,” tiin a zaizir a.

²⁵Tin, ani chu a awmna ngaiah a awm a, Isua âwm nghêngin a lo thle phei a, a hnênah, “Lalpa, tu ber nge ni?” a ti a.

²⁶Tin, Isuan, “Chhang them ka chiahsaka, ka pêka chu a ni ang,” a ti a, a chhâng a. Chutichuan, chhang them chu a chiah hnuin a la a, Iskariot Simona fapa Juda hnênah chuan a pe a.

²⁷Tin, chhang them chu a pêk hnu chuan a chhûngah Setana a lût ta nghâl a. Chutichuan, Isuan a hnênah, “I tih tûr chu ti thuai rawh,” a ti a.

²⁸(Tin, dawhkân sîra mite chuan tu mân engtiziaa ti nge a nih an hre lo.

²⁹ṭhenkhatin, Juda chuan tangka ip a vawn avângin, Isuan, “Kût atân thil kan châkkhai apiang lei rawh,” a ti emaw, “Mi retheite hnênah englo pêk tûr,” a ti emaw an ti a ni.)

³⁰Tin, ani chuan chhang them chu a la a, a chhuak ta nghâl a; chumi lai chu zân a ni a.

³¹Chutichuan, a chhuah hnuin Isuan a sawi a, “Tûnah chuan Mihring Fapa chawimawiin a awm ta, amah avângin Pathian pawh chawimawiin a awm a ni.

³²Pathianin amahah chuan ani chu a chawimawi ang, a chawimawi nghâl ang.

³³Naute u, rei lo tê in hnênah ka la awm rih e. Nangnin mi zawng ang; tin, Juda-te hnênah, ‘Ka kalna tûrah in lo kal thei lo vang,’ tih ka sawi ang khân, tûnah chuti bawkin in hnênah ka sawi hi.

³⁴“Thupêk thar ka pêk che u hi, inhmangaih ula; keiin ka hmangaih che u ang hian nangni pawh inhmangaih ula.

³⁵In inhmangaih chuan mi zawng zawngin ka zirtîrte in ni tih chumiah chuan an hria ang,” a ti a.

³⁶Simon Peteran a hnênah, “Lalpa, khawiah nge i kal dâwn?” a ti a. Isuan, “Ka kalna tûrah nangin tûnah mi zui thei lo vang; nakinah erawh chuan mi zui ang,” a ti a, a chhâng a.

³⁷Peteran a hnênah, “Lalpa, engati nge tûnah pawh ka zui theih loh vang che? Nangmah avângin ka nun ka paih ang,” a ti a.

³⁸Isuan, “Keimah avângin i nun i paih ang maw? Tihtakmeuhvin, tihtakmeuhvin ka hrilh a che, nangin vawi thum mi phat hma loh chuan âr a khuang lo vang.