Read Mizo_Old_version CHANCHIN ṬHA JOHANA ZIAK 14 Bible Online

CHANCHIN ṬHA JOHANA ZIAK 14 - Mizo_Old_version bible

CHANCHIN ṬHA JOHANA ZIAK 14

¹“In thinlung mangang suh se; Pathian in ring e, kei pawh mi ring ve rawh u.

²Ka Pa inah awmna tam tak a awm a, a awm loh chuan ka hrilh tawh tûr che u a ni; in tân hmun siamin ka kal dâwn hi.

³Tin, in tân hmun ka han siam chuan, ka lo kîr leh ang a, ka hnênah ka la ang che u; ka awmnaah nangni pawh in awm theih nân.

⁴Ka kalna tûr a kawng chin in hria e,” a ti a.

⁵Thoman a hnênah, “Lalpa, i kalna tûr chin kan hre lo asin; a kawng engtin nge kan hriat ang?” a ti a.

⁶Isuan a hnênah, “Keimah hi kawng leh thutak leh nunna ka ni; keimaha kal lo chu tu mah Pa hnênah an thleng ngai lo.

⁷Kei mi hria ni ula, ka Pa pawh in hre tawh tûr; tûn achinah amah in hria e, amah in hmu tawh bawk,” a ti a.

⁸Philipan a hnênah, “Lalpa, Pa chu keini min hmuhtîr ta che; chutichuan, kan tân a tâwk ang,” a ti a.

⁹Isuan a hnênah, “Philip, hei leh chen hi in hnênah ka awm a, chuti pawhin mi hre lo maw? Tu pawh mi hmu chu Pa hmu a ni. ‘Pa chu keini min hmuhtîr rawh,’ eng ti tiha ti nge i nih?

¹⁰Kei Paa ka awm leh Pa keimahah a awm tih i awih lo vem ni? In hnêna thu ka sawi hi keima phuah chawpin ka sawi lo; Pa keimahah a awm reng a, a thil a ti zâwk ṭhîn a ni.

¹¹Kei Paa ka awm leh Pa keimahah a awm tih mi ring rawh u; a nih loh leh, thiltih avâng tal hian mi ring rawh u.

¹²Tihtakmeuhvin, tihtakmeuhvin ka hrilh a che u, tu pawh mi ring chuan thil ka tihte hi a ti ve ang; hêng aia thil ropui zâwk pawh hi a la ti ang, Pa hnênah ka kal dâwn avângin.

¹³Tin, ka hmingin eng pawh in dîl apiang chu ka ti zêl ang, Pa chu Fapa avânga chawimawia a awm theih nân.

¹⁴Nangnin ka hmingin eng pawh mi dîl chuan, chu chu ka ti zêl ang.

¹⁵“Nangnin mi hmangaih chuan ka thupêkte chu in zâwm ang.

¹⁶Tin, Pa ka dîl ang a, ani chuan Thlamuantu dang a pe ang che u, chatuana in hnêna awm tûrin;

¹⁷chu chu Thlarau dik tak a ni; khawvêlin chumi chu an nei thei lo, amah an hmuh lohva an hriat hek loh avângin; nangnin ani chu in hria e, in hnênah a awm reng si a, nangmahniah chuan a awm dâwn a ni.

¹⁸Fahrahin ka kalsan lo vang che u; in hnênah ka lo kal leh ang.

¹⁹Rei lo deuh chinah khawvêlin mi hmu leh tawh lo vang; nimahsela, nangni zawngin mi hmu ang; keimah ka nun avângin nangni pawh in nung ve ang.

²⁰Chumi niah chuan kei ka Paa ka awm te, nangni keimaha in awm te, kei nangmahnia ka awm te in hria ang.

²¹Tu pawh ka thupêkte neia zâwm chu mi hmangaihtu a ni; tu pawh mi hmangaih chu ka Pain a hmangaih ang, kei pawhin ani chu ka hmangaih ang a, a hnênah ka inlâr ang,” a ti a.

²²Tin, Juda (Iskariota lo zâwk) chuan a hnênah, “Lalpa, keini hnênah i inlâr ang a, khawvêl hnêna i inlâr si lo tûr chu, engati nge?” a ti a.

²³Isuan a chhâng a, a hnênah, “Miin mi hmangaih chuan ka thu a zâwm ang a; ka Pain ani chu a hmangaih ang a, a hnênah kan lo kal ang a, a hnênah kan awm reng ang.

²⁴Tu pawh mi hmangaih lo chuan ka thu a zâwm lo; thu in hriatte hi ka ta a ni lo, Pa mi tîrtu ta a ni zâwk e.

²⁵In hnêna ka la awm chhûng hian hêng thu hi ka hrilh che u hi.

²⁶Tin, Thlamuantu, Thlarau Thianghlim, Pain ka hminga a rawn tirh tûr khân, chu mi chuan engkim a zirtîr ang che u a, in hnêna ka sawi zawng zawng a hriat chhuahtîr leh ang che u.

²⁷“Thlamuanna ka hnutchhiah a che u; keima thlamuanna ka pe a che u; khawvêlin a pêk angin ka pêk loh che u hi. In thinlung mangang suh se, hlauh pawh hlau suh se.

²⁸‘Ka kal bo dâwn a, in hnênah ka lo kal leh ang,’ ka tihzia che u kha in hre tawh e. Nangnin mi hmangaih ni ulang, Pa hnêna ka kal dâwn avângin in lâwm tûr a ni; Pa chu keimah aiin a ropui zâwk si a.

²⁹Tûnah a lo thlen hma hian ka hrilh tawh che u hi, a lo thlen huna in rin nân.

³⁰In hnênah thu ka sawi leh tawh mang lo vang, khawvêl lal a lo kal dâwn si a, ani chuan keimahah eng mah rêng a nei lo;

³¹nimahsela, keiin Pa ka hmangaih leh, Pain thu mi pêk ang zêlin thil ka ti tih, khawvêlin an hriatna tûr a nih hi. Tho rawh u, heta ta hi i chhuak ang u.