Read Mizo_Old_version CHANCHIN ṬHA JOHANA ZIAK 15 Bible Online

CHANCHIN ṬHA JOHANA ZIAK 15 - Mizo_Old_version bible

CHANCHIN ṬHA JOHANA ZIAK 15

¹“Kei grêp hrui tak tak ka ni, ka Pa a huan enkawltu a ni.

²Ka zawmpui pêng rah lo apiang a paih ṭhîn a; a rah apiang a tithianghlim ṭhîn, a rah tam lehzual nân.

³In hnêna ka thusawi avâng chuan tûnah pawh in thianghlim tawh pang a ni.

⁴Keimahah awm reng rawh u, kei pawh nangmahniah ka awm reng ang. Pêng chu grêp hruia a awm reng loh chuan amahin a rah thei lo ang bawkin, nangni pawh keimaha in awm reng loh chuan in rah thei lo vang.

⁵Kei grêp hrui chu ka ni, nangni a pêngte chu in ni; tu pawh keimaha awm renga, kei pawh amaha ka awm rengna chu, chu mi chu tam takin a rah ṭhîn; keimah lovin eng mah in ti thei si lo.

⁶Mi keimaha a awm reng loh chuan, pêng anga paih chhuahin a awm a, a vuai ṭhîn; tin, an fawm a, meiah an paih a, a kâng ṭhîn.

⁷Nangni keimaha in awm renga, ka thu nangmahnia a awm reng bawk chuan, in duh apiang dîl rawh u, in tân tihin a awm zêl ang.

⁸Hemi avângin ka Pa chu chawimawiin a awm ṭhîn, tam taka in rah hian; chutichuan, ka zirtîrte in ni ang.

⁹“Pain mi hmangaih ang bawkin kei pawhin ka hmangaih che u hi; ka hmangaihin awm reng rawh u.

¹⁰Nangnin ka thupêkte in zawm chuan, ka hmangaihin in awm reng ang; keiin ka Pa thupêkte ka zâwm a, a hmangaihin ka awm reng ang bawk hian.

¹¹Ka lâwm nangmahnia a awm reng nân leh, in lâwm a kim nân hêng thu hi in hnênah ka sawi hi.

¹²Hei hi ka thupêk a ni, keiin ka hmangaih che u ang bawkin nangni inhmangaih ula.

¹³Mihringin a ṭhian aia a nun a paih aliama hmangaihna nasa zâwk tu mân an nei lo.

¹⁴Thu ka pêk apiang che u in tih chuan ka ṭhiante in ni ang.

¹⁵Bawih ka ti leh tawh lo vang che u; a pu thiltih bawihin a hre si lo; ṭhiante ka ti tawh zâwk ang che u; Pa hnêna thil ka hriat zawng zawng in hnênah ka puang tawh si a.

¹⁶Nangnin mi thlang lo, keiman ka thlang zâwk che u a, va rah tûr leh in rah awm reng tûrin ka ruat bawk a che u; ka hminga Pa hnêna in dîl apiang a pêkna tûr che uin.

¹⁷“In inhmangaih theih nân hêng thu hi ka pe a che u.

¹⁸“Khawvêlin a huat che u chuan, a huat hma che u pawhin keimah mi hua tih in hria e.

¹⁹Nangni khawvêla mi ni ula, khawvêlin amaha mi a hmangaih tûr; khawvêla mi in ni si lo va, khawvêla mi ka thlan chhuah zâwk che u avâng hian khawvêlin a hua che u a ni e.

²⁰‘Bawih a pu aiin a ropui lo,’ tih thu ka hrilh tawh che u kha hre reng rawh u. Annin kei mi tihduhdah tawh chuan nangni pawh an tiduhdah ang che u; ka thu an zawm tawh chuan nangni thu pawh an zâwm ang.

²¹Nimahsela, hêng thil zawng zawng hi ka hming avângin in chungah an ti ang, mi tîrtu an hriat loh avângin.

²²Kei lo kalin an hnênah thu sawi suh ila, sual an nei lo tûr; tûnah erawh zawng an sual chhuanlam tûr an nei ta lo a ni.

²³Tu pawh kei mi hua chuan ka Pa pawh a hua a ni.

²⁴Thil, mi dang tu ma tih ngai lohte an zîngah ti suh ila, sual an nei lo tûr; tûnah erawh zawng annin kei leh ka Pa, kan pahnihin min hmu tawh a, huat pawh min haw tawh a ni.

²⁵Eng pawh ni rawh se, an Dân Lehkhabua, ‘Annin enga khaw lawilovin mi hua,’ tih thuziak kha a lo thlenna tûrin an ti a nih hi.

²⁶“Tin, Pa hnên ata Thlamuantu in hnêna ka tirh tûr, Paa chhuak Thlarau dik tak chu a lo thlen hunah, ani chuan ka thu a hriattîr ang;

²⁷nangni pawhin in hriattîr bawk ang, a tîr ata ka hnêna in awm avângin.