Read Mizo_Old_version CHANCHIN ṬHA JOHANA ZIAK 16 Bible Online

CHANCHIN ṬHA JOHANA ZIAK 16 - Mizo_Old_version bible

CHANCHIN ṬHA JOHANA ZIAK 16

¹“Tihlungnihlohva in awm lohna tûrin hêng hi in hnênah ka sawi tawh hi.

²Inkhâwmna inahte an hnawntîr ang che u a; a ni, tu pawh a tihlum tûr che u apiangin Pathian chungah thil ṭha tiin an inhria ang, chutiang hun chu a thleng dâwn.

³Chûng thil chu an ti ang, Pa leh kei min hriat loh avângin.

⁴“Hêng thu hi in hnênah ka sawi tawh hi, a hun a lo thlen hunah ka hrilh tawh che u tih in hriat lehna tûrin. Hêng thil hi a tîr ata ka la hrilh lo rêng che u a ni, in hnêna ka la awm avângin.

⁵Tûnah erawh zawng mi tîrtu hnênah ka kal dâwn a ni; nangniho zînga tu mân, ‘Khawiah nge i kal dâwn?’ tiin mi zâwt si lo.

⁶Hêng thu hi in hnêna ka sawi avângin, in thinlung chu lungngaiin a khat thlu hial ta zâwk a.

⁷“Nimahsela, thu dik tak ka hrilh a che u; ka kal in tân a ṭha e; ka kal loh chuan Thlamuantu chu in hnênah a lo kal dâwn si lo; ka kal erawh chuan in hnênah ka rawn tîr ang.

⁸Ani chu a lo thlen chuan sual thu-ah te, fel thu-ah te, rorêl thu-ah te khawvêl an thiam loh a hriattîr ang:

⁹sual thu-ah te thiam loh an chang ang, kei mi rin loh avâng hian;

¹⁰fel thu-ah te thiam loh an chang ang, Pa hnênah ka kal dâwna, nangnin mi hmuh leh dâwn tawh loh avâng hian;

¹¹rorêl thu-ah te thiam loh an chang ang, he khawvêl lal hi thiam lohva a tlûk tawh avâng hian.

¹²“In hnênah thu sawi tûr tam tak ka la nei cheu va; nimahsela, tûnah zawng in tlin rih lo vang.

¹³Nimahsela, amah, Thlarau dik tak chu a lo thlen hun chuan, thutak zawng zawngah chuan a hruai lût ang che u: ama phuah chawpin thu a sawi dâwn si lo; thu a dawn apiang chu a hril zâwk ang; thil lo thleng tûrte pawh a hriattîr ang che u.

¹⁴Ani chuan kei mi chawimawi ang; ka taa mi a la ang a, in hnênah a hriattîr dâwn si che u a.

¹⁵Pain thil a neih zawng zawng ka ta a ni; chuvângin, ‘Ka taa mi a la ang a, in hnênah a hriattîr ang che u,’ ka tih hi.

¹⁶“Rei lo teah nangnin kei mi hmu lo vang a; rei lo teah bawk nangnin kei mi hmu leh ang,” a ti a.

¹⁷Tin, a zirtîrte ṭhenkhatin, “Kan hnêna a thusawi hi eng nge ni, ‘Rei lo teah nangnin kei mi hmu lo vang a, rei lo teah bawk nangnin kei mi hmu leh ang,’ a tih leh, ‘Pa hnêna ka kal dâwn avângin,’ a tih hi?” an ti a.

¹⁸Tin, anmahni vêk chuan, “Hei, ‘Rei lo te’ a tih hi eng tihna nge ni? A thusawi hi a ngaihna kan hre lo,” an ti a.

¹⁹Tin, amah zawh an duh tih Isuan a hria a, an hnênah, “ ‘Rei lo teah nangnin kei mi hmu lo vang a, rei lo teah bawk nangnin kei mi hmu leh ang,’ tia ka thusawi hi in inzâwt maw?

²⁰Tihtakmeuhvin, tihtakmeuhvin ka hrilh a che u, nangni in mittui a tla ang a, in ṭap vak bawk ang a, khawvêl erawh chu an lâwm ang; nangni in lungngai ang a; nimahsela, in lungngaih chu lâwmah a chang ang.

²¹Hmeichhiain nau a veiin a lungngai ṭhîn, a hun a thlen tawh avângin; nimahsela, nau a hrin veleh a thlaphân chu a hre leh tawh ṭhîn lo, khawvêla mihring lo piang chu a lawm avângin.

²²Tin, tûnah nangni in lungngai e; nimahsela, ka hmu leh ang che u a, in thinlung a lâwm ang a, in lâwm chu tu mân an lâksak lo vang che u.

²³Chumi niah chuan nangnin eng mah kei mi zâwt lo vang. “Tihtakmeuhvin, tihtakmeuhvin ka hrilh a che u, Pa hnênah eng pawh in dîl chuan, keima hmingin a pe ang che u.

²⁴Tûn thlengin ka hmingin eng mah in la dîl lo; dîl rawh u; tichuan, in hmu ang, in lâwm a kimna tûrin.

²⁵“Chûng thu chu a thawiin in hnênah ka sawi tawh; a hun a thleng dâwn, chumi hunah chuan in hnênah a thawiin ka sawi leh tawh lo vang a, fiah takin Pa chanchin ka hrilh zâwk ang che u.

²⁶Chumi niah chuan keima hmingin thil in dîl ang; ‘Pa hnênah keiin ka ngensak ang che u,’ ka ti lo a che u;

²⁷Pa ngeiin a hmangaih si che u a, nangnin kei mi hmangaiha, Paa chhuak ka ni tih mi rin avângin.

²⁸Kei Pa hnên ata lo chhuaka, khawvêla lo kal ka ni; khawvêl kalsana Pa hnêna hâwng leh tûr ka ni,” a ti a.

²⁹Tin, zirtîrten, “Ngai teh, tûnah zawng fiah takin thu i sawi a, a thawi rêng rêngin i sawi tâk loh hi.

³⁰Nangin engkim i hria a, tu ma zawh che i ngai lo tih tûnah kan hre ta; hemi avâng hian Pathian hnên ata lo chhuak i ni tih kan awih e,” a ti a.

³¹Tin, Isuan a chhâng a, an hnênah, “Tûnah chuan in awih ta maw?

³²Ngai rawh u, a hun a thleng dâwn, a ni, a thleng tawh mêk, chumi hunah chuan mahni in ṭheuhvah in darh vek ang a, keimah chauhvin mi thlahthlam ang; nimahsela, Pa ka hnênah a awm avângin mahni chauhvin ka awm si lo.

³³Hêng thu hi in hnênah ka sawi tawh hi, keimahah hian in thlamuanna tûrin. Khawvêlah hian hrehawmin in awm ṭhîn; nimahsela, thlamuang takin awm rawh u, keiin khawvêl ka ngam ta,” a ti a.