Read Mizo_Old_version CHANCHIN ṬHA JOHANA ZIAK 18 Bible Online

CHANCHIN ṬHA JOHANA ZIAK 18 - Mizo_Old_version bible

CHANCHIN ṬHA JOHANA ZIAK 18

¹Isuan chûng thu chu a sawi zawhin a zirtîrte nên an chhuak a, Kidron luikawr an kân a; chutah chuan huan a awm a, chumiah chuan an lût a, amah leh a zirtîrte nên.

²Tin, a mantîrtu Juda pawh chuan chumi hmun chu a hria; Isua chu a zirtîrte hnênah chutah chuan a lêng fo si a.

³Chutichuan, Juda chuan sipai pâwl nên, puithiam lalte leh Pharisaite hnêna awm tiang kengtute nên a hruai a, khâwnvârte, meichherte, hriamte kengin chutah chuan an lo kal a.

⁴Isuan a chunga thil thleng tûr zawng zawng chu a hre reng a, a va chhuak a, an hnênah, “Tu nge in zawn?” a ti a.

⁵Anni chuan a hnênah, “Nazareth Isua,” an ti a, an chhâng a. Isuan an hnênah, “Keimah hi ka ni,” a ti a. Tin, a mantîrtu Juda pawh chu an zîngah a ding a.

⁶Tin, “Keimah hi ka ni,” a tih veleh an hnungtawlh a, leiah an tlu hlawm a.

⁷Tin, ani chuan an hnênah, “Tu nge in zawn?” a ti a, a zâwt leh a. Tin, anni chuan, “Nazareth Isua,” an ti a.

⁸Tin, Isuan, “Keimah hi ka ni tih ka hrilh che u alâwm; nangnin kei mi zawng in nih chuan hêngho hi thlah ṭha rawh u,” a ti a, a chhâng a.

⁹(A thusawi, “Nangin kei mi pêkteho pakhat mah ka hloh ral lo,” a tih kha a thlen nân.)

¹⁰Tin, Simon Peteran khandaih a vawng a, a phawi a, puithiam lalber bawih a sât a, a beng ding lam a sah thlâksak a. (Bawih hming chu Malka a ni a.)

¹¹Nimahsela, Isuan Petera hnênah, “Khandaih kha a paiah khung rawh; Pain no mi pêk hi ka in lo vang em ni?” a ti a.

¹²Chutichuan, sipai pâwl nên, an hotu lalber nên, Juda-te tiang kengtute nên chuan Isua an man a, an phuar a,

¹³Ana hnênah an hruai hmasa a, Kaiapha puzawn a nih avângin. Kaiapha chu, chumi kum chuan puithiam lalber a ni a.

¹⁴Kaiapha chu, “Mi zawng zawng aia mi pakhat thih a ṭha,” tia Juda-te rawtpuitu kha a ni.

¹⁵Tin, Simon Petera chuan Isua a zui a, zirtîr dang pakhat nên. Chu zirtîr chu puithiam lalber hmêlhriat a ni a, puithiam lalber in hual chhûng kawtlaiah Isua hnênah a lût ve a;

¹⁶nimahsela, Petera chu pâwnah kawngkhâr bulah a ding reng a. Chutichuan, zirtîr dang, puithiam lalber hmêlhriata chu a va chhuak a, kawngkhâr vêngtu chu a bia a, Petera chu a hruai lût a.

¹⁷Tin, kawngkhâr vêngtu nula chuan Petera hnênah, “Nang pawh he mi zirtîrte zînga tel ve i ni em?” a ti a. Ani chuan, “Ka ni lo,” a ti a.

¹⁸Tin, bawihte leh tiang kengtute chu chutah chuan an ding hlawm a, a vawh avângin meihawlin mei an chhêm a, a lum an ai a; Petera pawh an hnênah a tel a, ding chungin mei lum a ai ve a.

¹⁹Tin, puithiam lalber chuan Isua chu a zirtîrte chanchin leh a thu zirtîr a zâwt a.

²⁰Isuan a chhâng a, a hnênah, “Khawvêl hnênah vântlâng hriatin thu ka sawi ṭhin kha; inkhâwmna in leh Pathian biak in, Juda zawng zawng awm khâwmnaahte chuan ka zirtîr fo ṭhin kha, a rûkin eng mah ka sawi lo.

²¹Engati nge kei mi zawh? An hnêna ka thusawizia chu ka thu hretute zâwt rawh; ngai rawh, chûng chuan ka thusawi chu an hria alâwm,” a ti a.

²²Chu chu a sawi veleh a kianga ding tiang kengtu pakhatin Isua chu a bêng a, “Puithiam lalber heti hian i chhâng maw?” a ti a.

²³Isuan a hnênah, “Thu sual sawi ka nih chuan ka sualna mi hriattîr rawh; nimahsela, thu ṭha ka sawi pawhin engah nge mi ben?” a ti a, a chhâng a.

²⁴Tin, Ana chuan phuar chungin puithiam lalber Kaiapha hnênah a tîr a.

²⁵Tin, Simon Petera chuan dingin mei lum a ai a. Tin, “Nang pawh a zirtîr zînga tel ve i ni em?” an ti a. Ani chuan, “Ka ni lo,” tiin a pha a.

²⁶Tin, puithiam lalber bawih pakhat, Petera beng sah thlâka laichîn chuan, “A hnênah huanah khân ka hmu lo che em ni?” a ti a.

²⁷Tichuan, Petera chu a pha leh a; tin, âr a khuang ta nghâl a.

²⁸Tin, Isua chu Kaiapha in aṭang chuan lal inah an hruai leh a; zîng a ni a; tin, anni zawng lal inah an lût lo, an luh zawngin an bawlhhlawh ang a, kalhlên kût chaw an ei thei lo vang.

²⁹Tin, Pilata chu an hnênah a va chhuak a, an hnênah, “He mi chungah hian thupawi eng nge in neih?” a ti a.

³⁰Anni chuan a hnênah, “He mi hi mi sual ni suh sela i hnênah kan rawn hruai lo vang,” an ti a, an chhâng a.

³¹Tin, Pilata chuan an hnênah, “Nangnin hruai ulangin, in dân angin a thu rêl rawh u,” a ti a. Juda-te chuan a hnênah, “Keini thuin mi tu mah tihhlum dân a awm lo,” an ti a.

³²(A thih tûr thu Isuan a sawi anga a thlen nân.)

³³Chutichuan, Pilata chu a inah a lût leh a, Isua a ko va, a hnênah, “Juda-te Lal i ni em?” a ti a.

³⁴Isuan, “Hei hi nangma rilru puak chhuaka i sawi nge, mi dangin an hrilh che, ka chungchâng thu hi?” a ti a, a chhâng a.

³⁵Pilatan, “Kei Juda ka ni em ni? Nangma chite leh puithiam lalten ka hnênah an rawn hruai che a nih hi; thil eng nge i tih?” a ti a, a chhâng a.

³⁶Isuan, “Ka ram chu he khawvêla mi hi a ni lo; ka ram chu he khawvêla mi hi ni sela, ka ṭhuihruaiten an bei ang, Juda-te hnêna pêka ka awm loh nân; nimahsela, ka ram zawng heta mi hi a ni lo,” a ti a, a chhâng a.

³⁷Tin, Pilatan a hnênah, “Chu! Lal i ni elo?” a ti a. Isuan, “Ni e, lal ka ni asin. Thutak hriattîr hi ka pian chhan leh khawvêla ka rawn kal chhan a ni. Tu pawh thutaka mi apiangin ka thu an pawm ṭhîn,” a ti a.

³⁸Pilatan a hnênah, “Thutak eng nge ni?” a ti a. Tin, chu thu chu a sawi zawh veleh Juda-te hnênah a va chhuak leh a, an hnênah, “Eng mah a sualna ka hmu lo.

³⁹Nimahsela, kalhlên kûtah mi pakhat ka chhuahsakna tûr che u dân in nei; chutichuan, Juda-te Lal hi chhuahsak che u ila in duh em?” a ti a.

⁴⁰Tin, anni chu an au leh a, “He mi hi chu ni suh se, Barabba kha ni zâwk rawh se,” an ti a. Barabba chu suam hmang a ni.