Read Mizo_Old_version CHANCHIN ṬHA JOHANA ZIAK 19 Bible Online

CHANCHIN ṬHA JOHANA ZIAK 19 - Mizo_Old_version bible

CHANCHIN ṬHA JOHANA ZIAK 19

¹Tin, chutih lai chuan Pilatan Isua chu a hruai a, a vua a.

²Tin, sipaite chuan hlînglukhum an phiar a, an khumtîr a, puansenduk an sintîr bawk a;

³tin, a kiangah an lo kal a, “Chibai! Juda-te Lal!” an ti a, an bêng a.

⁴Tin, Pilata chu a chhuak leh a, an hnênah, “En teh u, eng mah a sualna ka hmu lo tih in hriat nân, in hnênah ka rawn hruai chhuah hi,” a ti a.

⁵Tin, Isua chu hlînglukhum khum leh puansenduk sin chungin a lo chhuak a. Tin, Pilatan an hnênah, “En teh u, mihringa hi!” a ti a.

⁶Tin, puithiam lalte leh tiang kengtute chuan amah an hmuh veleh an au va, “Krawsah khêng bet rawh, krawsah khêng bet rawh,” an ti a. Pilatan an hnênah, “Nangnin kalpui ula, krawsah khêng bet rawh u; kei zawngin eng mah a sualna ka hmu si lo,” a ti a.

⁷Juda-te chuan a hnênah, “Kan dân kawng khat a awm, chumi dân ang zêlin Pathian Fapaa a insiam avângin a thi tûr a ni,” an ti a, an chhâng a.

⁸Tin, Pilatan chu thu chu a hriatin a hlau lehzual a;

⁹a inah a lût leh a, Isua hnênah, “Khawi lama mi nge i nih?” a ti a. Nimahsela, Isuan a chhâng lo.

¹⁰Tin, Pilatan a hnênah, “Nangin kei mi be lo vei maw? Thlah thei che ka ni, krawsa khêng bet thei che ka ni tih i hre lo vem ni?” a ti a.

¹¹Isuan, “Chung lam aṭanga pêk i nih loh chuan, ka chungah hian tih theih rêng rêng i nei lo vang; chuvângin, i hnêna mi petu khân sual a phur zual a ni,” a ti a.

¹²Chumi achin chu Pilatan thlah a tum a; nimahsela, Juda-te chu an au va, “He mi hi i thlah chuan Kaisara ṭhian i ni lo vang; tu pawh lala insiam apiang Kaisara do an ni,” an ti a.

¹³Tin, Pilatan chûng thu chu a hriat veleh Isua chu a hruai chhuak a, a hming Lungrem - Hebrai ṭawng erawh chuan Gabbatha an ti, chumi hmunah chuan rorêlna ṭhutphahah a ṭhu a.

¹⁴(Tin, chumi ni chu kalhlên kût Inrinni a ni a, tûkṭhuan ei hun lai a ni.) Tin, ani chuan Juda-te hnênah, “En teh u, in Lal hi!” a ti a.

¹⁵Tin, anni chu an au va, “Tiboral rawh, tiboral rawh, krawsah khêng bet rawh,” an ti a. Pilatan an hnênah, “In Lal hi krawsah ka khêng bet ang maw?” a ti a. Puithiam lalte chuan, “Kaisara lo chu lal dang kan nei lo,” an ti a, an chhâng a.

¹⁶Chutichuan, Pilata chuan krawsa khen beh tûrin amah chu an hnênah a pe ta a. Chutichuan, Isua chu an hruai ta a.

¹⁷Tin, ani chuan mahni tâna kraws puin, “Luruh hmun,” an tih, Hebrai ṭawnga Golgotha an tih chu, chumi hmun thleng chuan a va chhuak a;

¹⁸chutah chuan krawsah an khêng bet a, mi dang pahnih nên, a sîr tuakah pakhat ve vein, a laiah Isua.

¹⁹Tin, Pilatan lehkha a ziak a, kraws lêr lamah a bel a. “Nazareth Isua - Juda-te Lal” tiin ziak a ni.

²⁰Tin, chu lehkha chu Juda-te a ṭhen tam takin an chhiar a; Isua krawsa an khen behna hmun chu khawpui kiang a ni a; Hebrai ṭawng te, Rom ṭawng te, Grik ṭawng tein ziak a ni si a.

²¹Chutichuan, Juda-te puithiam lalte chuan Pilata hnênah, “ ‘Juda-te Lal’ tiin ziak suh; ‘Juda-te Lal ka ni a ti,’ tiin ziak zâwk rawh,” an ti a.

²²Pilatan, “Ka ziak kha ka ziak zo tawh,” a ti a, a chhâng a.

²³Tin, sipaiten Isua chu krawsa an khen beh zawh chuan a silhfênte an la a, phel liah an siam a, sipaiten phel khatin an chang ṭheuh va; a kawr an la bawk a. Kawr chu ṭhui loh kawr a ni a, a nghâwng ata a pumin tah vek a ni;

²⁴chuvângin, anni chuan, “I pawt thlêr suh ang u, tu ta ber tûr nge ṭhum i vâwr zâwk ang u,” an ti a. (Pathian Lehkha Thu, “Ka silhfênte an insem a, Ka kawr atân ṭhum an vâwr a,” tih a thlenna tûrin.) Chûng thil chu sipaiten an ti a.

²⁵Tin, Isua kraws kiangah a nu leh a nu laizâwn, Mari, Klopa nupui leh Mari Magdalini an ding a.

²⁶Tin, Isuan a nu leh a zirtîr a hmangaih kha a kianga ding a hmu a, a nu hnênah, “Hmeichhia, en teh, i fapa kha!” a ti a.

²⁷Tin, zirtîr hnênah chuan, “En teh, i nu kha!” a ti a. Tin, chuta chin chu, chu zirtîr chuan ama inah ani chu a hruai ta a.

²⁸Chumi hnuah chuan Isuan thil engkim tûnah a kim tawh tih a hria a, Pathian Lehkha Thu kha a thlen nân, “Ka tui a hâl e,” a ti a.

²⁹Chutah chuan bêl pakhat uain thûra khat an hûng a; chutichuan, sponj pakhat chu uain thûra chiah khatin, husop tiangah an târ a, a hmuiah an han thlen a.

³⁰Tin, Isuan uain thûr chu a lo in zawh chuan, “A kin ta,” a ti a. Tin, a lu a kûn a, a thlarau a thlah ta a.

³¹Tin, Inrinni a nih avângin ruangte chu Chawlhnia krawsa a awm reng loh nân, (chu Chawlhni chu ni ropui a ni si a) Juda-ten Pilata hnênah an kete tihtliaha an ruang kalpuiah an ngên a.

³²Tin, sipaite chu an lo kal a, a hnêna krawsa an khen beh mi tawn tirh leh mi pakhat chu an kete an titliak a;

³³nimahsela, Isua kiangah an lo kal a, a thi tawh reng tih an hria a, a kete an titliak ve lo va.

³⁴Nimahsela sipaite zînga mi pakhatin a nâkah feiin a chhun a; tichuan, thisen leh tui a lo chhuak ta nghâl a.

³⁵A hmutu chuan a hriattîr tawh, (a thu hriattîr a dik a ni; a sawi dik tih a inhria) nangni pawhin in rinna tûrin.

³⁶Pathian Lehkha Thu, “A ruh pakhat mah tihtliah a ni lo vang,” tih thlenna tûrin chûng thil chu a lo awm ta.

³⁷Tin, Pathian Lehkha Thu dangin, “An chhuna chu an la en ang,” a ti bawk a.

³⁸Tin, chumi hnuah chuan Josefa, Arimathai khuaa mi, Isua zirtîr, nimahsela, Juda-te a hlauh avânga a rûka awm chuan Isua ruang chu kalpui atân Pilata hnênah a dîl a; tin, Pilatan a phal a. Chutichuan, a lo kal a, a ruang chu a kalpui ta a.

³⁹Tin, Nikodema, a tîra zâna a hnêna lo kal kha, murra leh aloe inpawlh sa bûk sawmnga lai sinin a lo kal ve a.

⁴⁰Tin, Isua ruang chu an la a, Juda-te inphûm dân angin englo rimtuite nên chuan puan zai sînin an tuam a.

⁴¹Tin, krawsa an khen behna hmunah chuan huan pakhat a awm a; huanah chuan tu mah la zalh ngai lohna thlân thar pakhat a awm.

⁴²Tin, Juda-te Inrinni a nih avângin, thlân chu an kiang lawk a ni si a, chutah chuan Isua chu an zalh ta a.