Read Mizo_Old_version CHANCHIN ṬHA JOHANA ZIAK 2 Bible Online

CHANCHIN ṬHA JOHANA ZIAK 2 - Mizo_Old_version bible

CHANCHIN ṬHA JOHANA ZIAK 2

¹Tin, ni thum niah Galili rama Kana khuaah lawi chaw a awm a, chutah chuan Isua nu a awm.

²Isua leh a zirtîrte pawh lawi chaw eiah an sâwm a.

³Tin, uainin a daih ta lo va, Isua nu chuan a hnênah, “Uain an tlachham ta e,” a ti a.

⁴Tin, Isuan a hnênah, “Hmeichhia, nanga mi lo hriatsak tûr eng nge awm? Ka hun a la thleng lo ve,” a ti a.

⁵Tin, a nu chuan rawngbâwltute hnênah, “In hnêna a sawi apiang chu ti zêl ang che u,” a ti a.

⁶Tin, Juda-te sil fai dân angin lung tuibêl paruk, bûk sawmli hmun hnih emaw, hmun thum emaw leng ṭheuh, chutah chuan an hûng a.

⁷Tin, Isuan an hnênah, “Tuibêlahte tui tikhat rawh u,” a ti a. Tin, a rawng rualin an tikhat ṭheuh va.

⁸Tin, an hnênah, “Tûnah thâl ula, ruaiṭheh fatu hnênah kalpui rawh u,” a ti a. Tin, an kalpui ta a.

⁹Tin, ruaiṭheh fatu chuan tui uaina lo chang ta chu a tem a, a chhuahna chin a hre lo va (tui thâl rawngbâwltute erawh chuan an hria a), nupui nei tûra chu a ko ta a,

¹⁰a hnênah, “Mi tinin a tîrah uain ṭha an dah chhuak ṭhîn; tin, a tam deuh an in hnuin a ṭha lo deuh chu an dah chhuak ṭhîn; nang zawngin tûn thlengin uain ṭha i la vawn hi,” a ti a.

¹¹Isuan he a chhinchhiahna tih ṭan tirhna hi Galili rama Kana khuaah chuan a ti a, a ropuizia a lantîr ta a; tin, a zirtîrte chuan ani chu an ring a.

¹²Tin, chumi hnuah chuan Kapernaum khuaah a zuk kal a, amah leh a nu nên, a unaute nên, a zirtîrte nên; chutah chuan ni rei lo tê an awm a.

¹³Tin, Juda-te kalhlên kût a hnai tawh a, Isua chu Jerusalem khuaah a han kal a.

¹⁴Tin, Pathian biak ina sebâwngte, berâmte, ṭhuro zuartuho leh tangka thlengtuho ṭhu a hmu a.

¹⁵Tin, hruihrualin vuakna a siam a, berâm leh sebâwng chu a zain Pathian biak in aṭang chuan a hnawt chhuak a, tangka thlengtute tangka chu a leihbua a, an dawhkânte a nam thlûksak bawk a;

¹⁶tin, ṭhuro zuartute hnênah chuan, “Hêng thil hi heta ṭangin kalpui rawh u, ka Pa in sumdâwnna inah siam suh u,” a ti a.

¹⁷(Tin, “I ina ka ṭhahnemngaihnain mi ei zo vang,” tih ziak a ni tih a zirtîrte chuan an hre leh ta a.)

¹⁸Chutichuan, Juda-ten a hnênah, “Hêng thil i tih hi chhinchhiahna eng nge min hmuhtîr theih?” an ti a, an chhâng a.

¹⁹Isuan an hnênah, “He in hi tichhia ulang, ni thum chhûngin ka tungding leh ang,” a ti a, a chhâng a.

²⁰Tin, Juda-te chuan, “He in hi kum sawmli leh kum ruk sak a ni; nangin ni thum chhûngin i tung ding ang maw?” an ti a.

²¹(Nimahsela, a taksa in thu sawi a lo ni zâwk si.

²²Chuvângin, mitthi zîng ata a thawhlehin, chumi thu chu a sawi tawh tih a zirtîrten an hre leh ta a; tin, Pathian Lehkha Thu leh Isua thusawi chu an ring ta a.)

²³Tin, kalhlên kûta Jerusalem khuaa a awm lai chuan a thil mak tihte an hmu a, mi tam takin a hming an ring ta a.

²⁴Nimahsela, Isua chu an lakah a ngampa lo, mi zawng zawng a hriata,

²⁵mihring thu tu ma hrilh fiah a ngaih loh avângin; amahin mihring chhûnga awm apiang chu a hre si a.