Read Mizo_Old_version CHANCHIN ṬHA JOHANA ZIAK 21 Bible Online

CHANCHIN ṬHA JOHANA ZIAK 21 - Mizo_Old_version bible

CHANCHIN ṬHA JOHANA ZIAK 21

¹Chumi hnuah chuan Tiberia dîlah Isua chu a zirtîrte hnênah a inlâr leh a; heti hian a inlâr:

²Simon Petera te, Thoma (Phîra an tih) te, Galili rama Kana khuaa mi Nathanaela te, Zebedaia fapa pahnihte leh a zirtîr dang pahnihte an awm khâwm a.

³Simon Petera chuan an hnênah, “Sangha manin ka kal dâwn e,” a ti a. Anni chuan a hnênah, “Keini pawh i hnênah kan kal ve ang,” an ti a. Tin, an kal chhuak a, lawngah an chuang a; chumi zân chuan eng mah an man lo.

⁴Tin, khawfîngchahin Isua chu ṭiauphovah a lo ding a; nimahsela, zirtîrte chuan Isua a ni tih an hre si lo.

⁵Tin, Isuan an hnênah, “Naute u, ei tûr engilo in nei em?” a ti a. Anni chuan a hnênah, “Nei lo,” an ti a, an chhâng a.

⁶Tin, ani chuan an hnênah, “Lawng sîr ding lamah khân lên dêng ulang, in hmu ang,” a ti a. Tin, an dêng a, sangha tam avângin an hnûk chhuak zo ta lo va.

⁷Chutichuan, zirtîr Isuan a hmangaiha khân, Petera hnênah, “Lalpa a nih saw,” a ti a. Chutichuan, Lalpa a ni tih Simon Peteran a hriat veleh a kawr a veng a (saruaka awm a ni si a), dîlah a zuang thla ta a.

⁸Nimahsela, zirtîr dangte chuan lawng tê tak tê chuan lên, sangha chawpa hnûk chungin an rawn pan a (khawmual aṭangin an hla si lo va, tawng zahnih emaw lek a ni a).

⁹Tin, khawmuala an chhuah veleh, chutah chuan meihawla mei chhêm an hmu a, a chunga sangha leh chhangpêr rawh nên.

¹⁰Tin, Isuan an hnênah, “Tûnah in sangha man kha a ṭhen han la rawh u,” a ti a.

¹¹Chutichuan, Simon Petera chu a va chuang a, lên chu sangha lian pui puia khatin khawmualah a hnûk chhuak a, za leh sawmnga leh pathum a ni; chuti zozai chu awm mah sela, lên chu a ṭet si lo.

¹²Tin, Isuan an hnênah, “Tûkṭhuan lo ei rawh u,” a ti a. Tin, zirtîrte zînga tu mahin a hnênah, “Tu nge i nih?” tiin an zâwt ngam lo, Lalpa a ni tih an hre reng a.

¹³Tin, Isua a lo kal a, chhangpêr chu a la a, an hnênah a pe a, sanghate pawh chu chutiangin a pe bawk a.

¹⁴Chu chu Isua mitthi zîng ata a thawhleh hnua a zirtîrte hnêna a inlâr vawi thumna a ni.

¹⁵Tin, tûkṭhuan an ei zawhin, Isuan Simon Petera hnênah chuan, “Simon, Johana fapa, hêngte ai hian nangin kei mi hmangaih zâwk em?” a ti a. Ani chuan a hnênah, “Aw, Lalpa; ka ngaina che tih i hria e,” a ti a. Ani chuan a hnênah, “Ka berâmnote châwm rawh,” a ti a.

¹⁶Tin, a vawi hnihnaah a hnênah, “Simon, Johana fapa, nangin kei mi hmangaih em?” a ti leh a. Ani chuan a hnênah, “Aw, Lalpa; ka ngaina che tih i hria e,” a ti leh a. Ani chuan a hnênah, “Ka berâmte enkawl rawh,” a ti a.

¹⁷Tin, a vawi thumnaah chuan a hnênah, “Simon, Johana fapa, nangin kei mi ngaina em?” a ti a. Tin, a vawi thumnaah, “Nangin mi ngaina em?” a hnêna a tih avâng chuan Petera chu a lungngai a, a hnênah, “Lalpa, engkim i hria a, ka ngaina che tih i hria e,” a ti a. Isuan a hnênah, “Ka berâmte châwm rawh.

¹⁸Tihtakmeuhvin, tihtakmeuhvin ka hrilh a che, i naupan lai khân i taiah i inhrêng a, i duhna apiangah i kal ṭhîn a; nimahsela, i upat hunah chuan i kutte i phar ang a, mi dangin an hrênsak ang chia, i duh lohna lamah an kai ang che,” a ti a.

¹⁹(Chûng thu chu engtianga thiin nge Pathian a la chawimawi ang tih hriattîr nân a sawi a ni.) Tin, chu chu a sawi zawhin a hnênah, “Mi zui rawh,” a ti a.

²⁰Tin, Petera chu a hawi a, Isuan zirtîr a hmangaih, zanriah ei laia a âwm nghênga lo thle pheia, “A mantîrtu tûr che chu tu ber nge ni?” titua khân a rawn zui a hmu a.

²¹Tin, Peteran ani chu a hmu a, Isua hnênah, “Lalpa, he mi hian eng nge a tih ang?” a ti a.

²²Isuan a hnênah, “Ka lo kal leh thlenga awm rengah phei duh ila, chu chu enga i hman tûr nge ni? Nangin mi zui mai rawh,” a ti a.

²³Chutichuan, chu zirtîr chu thi lo tûrin a thu chu unaute zîngah chuan a thang ta a; nimahsela, Isuan a thi lo vang tih a hnênah a sawi si lo, “Ka lo kal leh thlenga awm rengah phei duh ila, chu chu enga i hman tûr nge ni?” a ti mai a ni si a.

²⁴Chu zirtîr chu hêng thu hriattîrtu leh ziaktu hi a ni; a thu hriattîr hi dik tak a ni tih kan hria e.

²⁵Tin, hêng lo hi Isua thiltih a dang tam tak a la awm, chûng chu ziak fai vek ni dâwn sela, lehkhabu ziak tûr zawng zawng chu khawvêlah pawh hian lengin ka ring lo.