Read Mizo_Old_version CHANCHIN ṬHA JOHANA ZIAK 4 Bible Online

CHANCHIN ṬHA JOHANA ZIAK 4 - Mizo_Old_version bible

CHANCHIN ṬHA JOHANA ZIAK 4

¹Tin, Isuan Johana aiin zirtîr tam zâwk a siam leh a baptis thu Pharisaiten an hria tih Lalpa chuan a hriat veleh

²(nimahsela, Isua meuh chuan a baptis lo, a zirtîrten an baptis zâwk ṭhîn),

³Judai ram chu a kalsan a, Galili ramah a kîr leh ta a.

⁴Tichuan, Samari ram a kal tlang tûr a ni.

⁵Chutichuan, Samari ram khaw pakhat Sukar an tih chu a lo thleng a, Jakoban a fa Josefa hnêna hmun a pêk kiang kha;

⁶Jakoba tuichhunchhuah pawh kha chutah chuan a awm. Chutichuan, Isua chu a kal hah avângin tuichhunchhuah sîrah chuan a ṭhu chawt a: chawfâk hun lai a ni a.

⁷Tin, Samari hmeichhe pakhat tui chawiin a lo kal a. Isuan a hnênah, “In tûr mi pe rawh,” a ti a.

⁸(A zirtîrte lah chu ei tûr leiin khuaah an kal tawh si a.)

⁹Chutichuan, Samari hmeichhia chuan a hnênah, “Nang Juda mi i ni a, kei Samari hmeichhia ka ni si a, engtizia nge ka hnêna in tûr mi dîl?” a ti a. (Juda-ten Samari mite chu engah mah an hmang ngai si lo.)

¹⁰Tin, Isuan a chhâng a, a hnênah, “Pathian thilpêk leh, ‘In tûr mi pe rawh,’ i hnêna titu hi hria la chu, nangin a hnênah i dîl zâwk tûr a ni a; tin, anin tui nung a pe tawh tûr che a ni,” a ti a.

¹¹Tin, hmeichhia chuan a hnênah, “Ka pu, khaina eng mah i nei si lo va, tuichhunchhuah a thûk vei nên, khawi ata nge tui nung chu i hmuh?

¹²Kan pu Jakoba aiin i ropui zâwk em ni? Ani chuan he tuichhunchhuah hi min pe a, amah pawhin a in a, a fapate, a rante nên,” a ti a.

¹³Tin, Isuan a chhâng a, a hnênah, “Tu pawh he tui in apiang an tuihâl leh ang;

¹⁴tu pawh an hnêna ka pêk tûr tui in apiang erawh chu kumkhuain an tuihâl lo vang, keiin an hnêna tui ka pêk tûr chu an kawchhûngah tui hna a lo awm ang a, chatuana nun thlengin a chik chho vang,” a ti a.

¹⁵Tin, hmeichhia chuan a hnênah, “Ka pu, chu tui chu mi pe rawh, ka tuihâl loh nân leh, hêng thleng thlenga tui chawi tûra ka lo kal ṭhin loh nân,” a ti a.

¹⁶Tin, Isuan a hnênah, “I pasal va ko la, hetah lo haw leh ang che,” a ti a.

¹⁷Tin, hmeichhia chuan a hnênah, “Pasal ka nei hlei nêm,” a ti a, a chhâng a. Isuan a hnênah, “ ‘Pasal ka nei hlei nêm,’ i tih hi i tidik e;

¹⁸pasal panga i nei tawh, tûna mi i neih hi i pasal a ni lo rêng a ni, he thu hi i tidik e,” a ti a.

¹⁹Hmeichhia chuan a hnênah, “Ka pu, zâwlnei i ni tih ka hre ta.

²⁰Keini thlahtute chuan he tlângah hian Pathian chibai an bûk ṭhîn; nimahsela, nangni zawngin, ‘Mihringin Pathian chibai an bûkna tûr hmun chu Jerusalem khuaah a awm,’ in ti ṭhîn,” a ti a.

²¹Tin, Isuan a hnênah, “Hmeichhia, ka thu awih rawh, he tlângah kher lo pawh, Jerusalem khuaah kher lo pawh, Pa chibai in bûk hun a thleng dâwn ta.

²²Nangnin in hriat loh chibai in bûk ṭhîn; keini zawngin kan hriata chu chibai kan bûk ṭhîn. Chhanhimna Juda-te hnên ata a lo chhuak dâwn si a.

²³Chutichuan, a hun a thleng dâwn ta, tûnah pawh a thleng tawh mêk, chumi hunah chuan Pathian chibai bûktu tak takten thlarau leh tihtakzetin Pa chibai an bûk ang, Pain chutiang mi chu a chibai bûktu tûrin a zawng a ni.

²⁴Pathian chu Thlarau a ni; a chibai bûktuten thlarau leh tihtakzetin chibai an bûk tûr a ni,” a ti a.

²⁵Tin, hmeichhia chuan a hnênah, “Messia, Krista an tih chu a lo kal dâwn tih ka hria, ani chu a lo kal hunah engkim min la hrilh ang,” a ti a.

²⁶Tin, Isuan a hnênah, “Keimah a betu che hi amah chu ka ni asin,” a ti a.

²⁷Tin, chutih lai chuan a zirtîrte chu an lo kal a, hmeichhia a bia chu mak an ti hle a; nimahsela, tu mân, “Eng nge i zawn? Engati nge hmeichhia i biak?” pawh an ti lo.

²⁸Tin, hmeichhia chuan a tuibêl a kalsan a, khuaah a kal a, mite hnênah,

²⁹“Ka thiltih apiang mi hrilh zêltu mi pakhat a awm a, lo kal ula, en teh u; Krista a ni thei âwm em?” a ti a.

³⁰Tin, anni chu khua ata chu an lo chhuak a, a hnên lam an pan ta a.

³¹Chumi hlân chuan zirtîrte chuan a hnênah, “Rabbi, ei rawh,” an ti chiam a.

³²Nimahsela, ani chuan an hnênah, “Chaw in hriat loh ei tûr ka nei e,” a ti a.

³³Tin, zirtîrte chu an inbia a, “A ei tûr miin an rawn kensak em ni chu le?” an ti a.

³⁴Tin, Isuan an hnênah a sawi a, “Mi tîrtu duh zâwng tih leh a hna thawh zawh tûr hi ka chaw a ni.

³⁵Nangnin, ‘Buh sengna tûr thla li a la awm,’ in ti lâwm ni? Ngai rawh u, ka hrilh a che u, dâk ulang, lote en rawh u, tûn apangin seng tûrin a êng a ni.

³⁶A âttuin hlawh a hmu ṭhîn a, chatuana nun thlenga awm tûrin rah a seng ṭhîn, a tuhtu leh a âttu an lâwm dun theih nân.

³⁷‘Pakhatin a tuh ṭhîn a, mi dangin a ât ṭhîn,’ tih thu hi chumiah chuan a dik hle a ni.

³⁸In thawh rim loh ât tûrin ka tirh che u kha; mi dangin an thawk a, nangnin an thawh sa chu in chhunzawm a ni,” a ti a.

³⁹Tin, hmeichhia chuan, “Ka thiltih apiang mi hrilh zêl,” tia a hriattîr thu avâng khân, chumi khuaa awm Samari mi tam takin Isua an ring ta a.

⁴⁰Chutichuan, Samari mite chu Isua hnênah an lo kal a, an hnêna awmah an ngên chiam a; tichuan, chutah chuan ni hnih a châm a.

⁴¹Tin, mi dang tam takin ama thu avângin an ring ve ta a;

⁴²tin, anni chuan hmeichhe hnênah chuan, “Tûnah zet chuan i thusawi avânga ring kan ni ta lo; keimahni ngeiin a thu kan hria a, he mi hi khawvêl Chhandamtu a ni ngei tih kan hre ta,” an ti a.

⁴³Ni hnih hnuah chuta ṭang chuan a chhuak a, Galili ramah a kal ta a.

⁴⁴Isua ngeiin, zâwlnei chu ama khaw lamah chuan chawimawiin a awm ngai lo tih a hriattîr si ṭhîn a.

⁴⁵Chutichuan, Galili ram a lo thlenin Galili rama miten an lo lâwm a, Jerusalem khuaa kût laia a thiltih zawng zawng an hmuh avâng khân; anni pawh chu kûtnaah chuan an kal ve si a.

⁴⁶Tin, Galili rama Kana khua, tui uaina a chantîrna kha a lo thleng leh a. Tin, upa tu emaw a awm a, a fapa Kapernaum khuaah a damlo va.

⁴⁷Tin, Isua chu Judai ram ata Galili ramah a lo kal tih a hriat veleh a hnênah a han kal a, a fapa zuk tidam tûrin a ngên chiam a, a thi lek lek si a.

⁴⁸Tin, Isuan a hnênah, “Chhinchhiahnate leh thil makte in hmuh loh chuan in ring tawp lo vang,” a ti a.

⁴⁹Tin, upa chuan a hnênah, “Ka pu, ka fa thih hmain lo chhuk ta che,” a ti a.

⁵⁰Tin, Isuan a hnênah, “Haw leh ta mai rawh, i fapa chu a dam tawh e,” a ti a. Tin, chu mi chuan Isuan a hnêna thu a sawi chu a ring a, a kal ta a.

⁵¹Tin, a kal chhuk lai mêkin a bawihten an lo hmuak a, “I fapa chu a dam ta,” an lo ti a.

⁵²Tin, ani chuan an hnênah a dam tirh lai a zâwt a. Tin, anni chuan a hnênah, “Niminah, ni her chauhvin a khawsik a reh ta a ni,” an ti a.

⁵³Chutichuan, a pa chuan, Isuan a hnênah, “I fapa chu a dam tawh e,” a tih lai tak a ni tih a hre ta a; tin, amah leh a chhûngten an zain an ring ta a.

⁵⁴Chu chu Isuan a chhinchhiahna tih a vawi hnihna a ni, Judai ram ata Galili rama a lo kalin.