Read Mizo_Old_version CHANCHIN ṬHA JOHANA ZIAK 6 Bible Online

CHANCHIN ṬHA JOHANA ZIAK 6 - Mizo_Old_version bible

CHANCHIN ṬHA JOHANA ZIAK 6

¹Chûng thil hnuah chuan, Isua chu Galili dîl, Tiberia dîl an tih râl lehlamah chuan a kal ta a.

²Tin, damlote chunga chhinchhiahna a tihte chu an hmuh avângin, mipui tam takin amah an zui a.

³Tin, Isua chu tlângah chuan a kal chho va, chutah chuan a zîrtîrte hnênah a ṭhu a.

⁴Tin, kalhlên kût (Juda-te kût chu) a hnai tawh a.

⁵Tin, Isua chu a dâk a, mipui tam takin a hnên lam rawn panin a hmu a, Philipa hnênah, “Hêngho ei tûr chhang khawi ata nge kan lei ang?” a ti a.

⁶Chûng thu chu amah fiah nân a sawi a ni, a tih tûr chu amahin a hre reng si a.

⁷Tin, Philipa chuan a hnênah, “Mi tinin tlêm têa an chan ṭheuh tûr pawh, duli zahnih man chhangin a daih lo vang,” a ti a, a chhâng a.

⁸Tin, a zirtîrte zînga pakhat, Simon Petera unau Andria chuan a hnênah,

⁹“Barli chhangpêr panga leh sangha pahnih nei mipa naupang pakhat hetah a awm; nimahsela, mi hêng zozai zîngah hian chûng chu eng tham nge ni ang?” a ti a.

¹⁰Tin, Isuan, “Mite chu ṭhuttîr rawh u,” a ti a. Tin, chumi hmunah chuan hlobet tam tak a awm. Chutichuan, patlingte chu an ṭhu a, an tam lam chu sângnga lai an ni a.

¹¹Tin, Isuan chhangpêrte chu a la a, lâwm thu a sawi zawhin a ṭhuhote hnênah chuan a sem a, chutiang bawkin sânghate pawh chu an duh tâwkin a sem bawk a.

¹²Tin, an kham hnuin, a zirtîrte hnênah chuan, “Eng mah bo lo tûrin a bângnawite chhar rawh u,” a ti a.

¹³Chutichuan, an chhar a, barli chhangpêr panga eitute ei bângnawite chuan bâwmrâng sâwm leh pahnih an tikhat a.

¹⁴Tin, mite chuan chhinchhiahna a tih chu an hmuh veleh, “He mi hi zâwlnei, khawvêla lo kal tûr kha a lo nih ngei hi,” an ti a.

¹⁵Chutichuan, amah chu lala siam tûra man luih tumin an lo kal dâwn tih Isuan a hria a, tlângah amah chauhvin a kal hrang leh ta a.

¹⁶Tin, khua a lo tlai lam chuan a zirtîrte chu dîlah chuan an zuk kal a;

¹⁷lawngah an chuang a, dîlah chuan Kapernaum khua an pan a. Tin, khua a thim ta a, Isua lah chu an hnên a la thleng si lo.

¹⁸Thlipui nasa tak a tleh avângin tui a fâwn sâng telh telh si a.

¹⁹Tin, fîng sawmhnih leh fîng nga emaw, fîng sawmthum emaw an kar chuan Isua chu dîl chungah chuan kea kala lawng rawn hnaihin an hmu a, an hlau va.

²⁰Nimahsela, ani chuan an hnênah, “Keimah ka ni alâwm, hlau suh u,” a ti a.

²¹Chutichuan, lawngah chuan chuantîr an duh ta a; tin, chawplehchilhin lawng chuan an pan khawmual chu a thleng ta nghâl a.

²²A tûkah chuan dîl râl lehlama mipui dingte chuan, lawng pakhat lo chu lawng dang a awm lo va, Isua chu a zirtîrte hnênah lawngah chuan a chuang ve lo va, a zirtîrte chu anmahni chauhvin an kal tih an hria a.

²³(Nimahsela, Lalpan lâwm thu a sawi hnua chhang an eina hmun kiangah khân, Tiberia khua aṭangin lawng tête a lo thleng si a.)

²⁴Chutichuan, mipui chuan Isua leh a zirtîrte chu an awm ta lo tih an hriatin, anni pawh lawng têahte chuan an chuang a, Isua zawngin Kapernaum khua an lo thleng a.

²⁵Tin, dîl râla an rawn hmuhin a hnênah, “Rabbi, eng tikah nge he lam i lo thlen?” an ti a.

²⁶Tin, Isuan an hnênah, “Tihtakmeuhvin, tihtakmeuhvin ka hrilh a che u, chhinchhiahnate in hmuh avanga mi zawng in ni lo va, chhangpêr in ei puar avâng khân a nih zâwk hi.

²⁷Chaw dangral mai ûmin phe phe suh u; chatuana nun thlenga awm reng tûr chaw, Mihring Fapain a pêk tûr che u chu, ûmin phe zâwk rawh u; Pa Pathian chuan ani chu a chhinchhiah tawh si a,” a ti a, a chhâng a.

²⁸Tin, anni chuan a hnênah, “Pathian hna kan thawh theih nân thil eng nge kan tih tûr?” an ti a.

²⁹Tin, Isuan an hnênah, “Pathian hnathawh chu hei hi a ni, a mi tirh hi ring ula,” a ti a, a chhâng a.

³⁰Tin, anni chuan a hnênah, “Chhinchhiahna eng nge i tih ang, kan hmuha kan rin theihna tûr chein? Thil eng nge i tih ang?

³¹Kan thlahtuten thlalêrah manna kha an ei ṭhîn, ‘Vân aṭang chuan an hnênah chhang ei tûr a pe,’ tih ziak angin,” an ti a.

³²Tin, Isuan an hnênah, “Tihtakmeuhvin, tihtakmeuhvin ka hrilh a che u, vân aṭanga chhang in hmuh kha Mosia pêk che u a ni lo; ka Pa erawh chuan vân aṭangin chhang tak a pe che u a nih hi.

³³Pathian chhang chu vân aṭanga lo chhuka, khawvêl hnêna nun petu hi a ni,” a ti a.

³⁴Tin, anni chuan a hnênah, “Lalpa, chu chhang chu kumkhuain min pe rawh,” an ti a.

³⁵Tin, Isuan an hnênah, “Kei hi nunna chhang chu ka ni; tu pawh ka hnêna lo kal chu a ril a ṭâm lo vang, tu pawh mi ring chu eng tikah mah a tuihâl lo vang.

³⁶Nimahsela, nangnin mi hmuh pawhin mi ring si lo tih ka hrilh che u kha.

³⁷Pain mi pêk zawng zawng ka hnênah an lo kal vek ang; tu pawh ka hnêna lo kal chu ka hnawt chhuak tawp lo vang.

³⁸Mahni duh zâwng ti tûra vân aṭanga lo chhuk ka ni lo va, mi tîrtu duh zâwng ti tûra lo chhuk ka ni zâwk e.

³⁹Hei hi mi tîrtu duh zâwng chu a ni, anin mi pêk zawng zawng eng mah hloh lo ila, ni kin niah chuan kaitho zâwk ila.

⁴⁰Tin, hei hi ka Pa duh zâwng a ni, tu pawh Fa hmua, ring apiangin chatuana nunna nei sela; tin, keiin ni kin niah chuan ani chu ka kaitho vang,” a ti a.

⁴¹Tin, “Vân aṭanga chhang lo chhuk chu ka ni,” a tih avângin Juda-te chu a chungah an phunnawi a.

⁴²“He mi hi Josefa fa, Isua a ni lo vem ni, a nu leh pa pawh kan hriat hi? ‘Vân aṭanga lo chhuk ka ni,’ eng ti tiha ti nge ni le?” an ti a.

⁴³Tin, Isuan an hnênah, “Phun phunnawi suh u.

⁴⁴Pa mi tîrtuin a hîp loh chuan tu mah ka hnênah an lo kal thei lo vang; tin, keiin ni kin niah chuan a lo kala chu ka kai tho vang.

⁴⁵Zâwlneite lehkhabuah, ‘Pathian zirtîrin an awm vek ang,’ tih ziak a ni. Mi tin Pa thu hriaa zir apiang chu ka hnênah an lo kal ṭhîn.

⁴⁶Tu mahin Pa an hmu ngai ka ti lo, Pathian hnêna lo chhuaka chauh lo chuan; ani chuan Pa chu a hmu.

⁴⁷Tihtakmeuhvin, tihtakmeuhvin ka hrilh a che u, tu pawh a ring chuan chatuana nunna an nei tawh a ni.

⁴⁸Kei hi nunna chhang ka ni.

⁴⁹In thlahtuten thlalêrah manna kha an ei na a, an thi a.

⁵⁰Hei hi vân aṭanga chhang lo chhuk chu a ni, miin a eia a thih loh nân.

⁵¹Kei hi vân aṭanga chhang nung lo chhuk chu ka ni, tu pawhin he chhang hi a ei chuan chatuanin a nung reng ang; a ni, khawvêl nun nâna ka pêk tûr chhang chu ka tisa hi a ni,” a ti a.

⁵²Chutichuan, Juda-te chu an inhnial a, “He mi hian engtin nge a tisa ei tûrin min pêk theih ang?” an ti a.

⁵³Tin, Isuan an hnênah, “Tihtakmeuhvin, tihtakmeuhvin ka hrilh a che u, Mihring Fapa tisa in eia, a thisen in in bawk loh chuan, nangmahniin nunna nei hek lo che u.

⁵⁴Tu pawh ka tisa eia ka thisen in chuan chatuana nunna a nei tawh; tin, ni kin niah chuan ani chu ka kaitho vang.

⁵⁵Ka tisa hi chaw tak a ni a, ka thisen hi in tûr tak a ni si a.

⁵⁶Tu pawh ka tisa eia ka thisen in chu, keimahah a awm reng ṭhîn, kei pawh amahah ka awm reng ṭhîn.

⁵⁷Pa nung chuan mi tîr a, Pa zâra nung ka ni ang bawkin, tu pawh mi ei chu keima zârah a ni pawh a nung ang.

⁵⁸Hei hi vân aṭanga chhang lo chhuk chu a ni; chi thlahtuten chhang an ei a, an thi ang kha a ni lo, tu pawh hemi chhang hi ei chu chatuanin a nung reng ang,” a ti a.

⁵⁹Chûng thu chu inkhâwmna inah a sawi a, Kapernaum khuaa a zirtîr lai khân.

⁶⁰Chutichuan, a zirtîrte a ṭhen tam takin chu chu an hriatin, “Hei hi thu khirh tak a ni, tu nge dawngsawng thei ang?” an ti a.

⁶¹Chutichuan, chumi thu-ah chuan a zirtîrte an phunnawi tih Isuan a rilruin a hria a, an hnênah, “He thu hian a tilungni lo che u elo?

⁶²Mihring Fapa hi hmâna a awmna ngaia lâwn chhova in hmuh chuan, engtin nge in tih ang le?

⁶³Tinungtu chu thlarau a ni, tisa chu eng mahah a tlâktlai lo; in hnêna thu ka sawite hi thlarau a ni, nunna pawh a ni.

⁶⁴Nimahsela, in zîngah a ṭhen ring lo in awm e,” a ti a. (Isuan amah ring lotute leh a mantîrtu tûr chu a tîr ata a hre reng si.)

⁶⁵Tin, amah vêk chuan, “Chu vâng chuan a ni, in hnênah, ‘Pain a puih loh chuan tu mah ka hnênah an lo kal thei lo vang,’ ka tih kha ni,” a ti a.

⁶⁶Chu veleh a zirtîrte zînga tam tak an kal bo va, amah an pâwl leh ta lo va.

⁶⁷Chutichuan, Isuan sâwm leh pahnihte hnênah chuan, “Nangni pawhin kal bo in duh ve em?” a ti a.

⁶⁸Tin, Simon Peteran a hnênah, “Lalpa, tu hnênah nge kan kal ang? Nangin chatuana nunna thu i nei alâwm.

⁶⁹Nang Pathian Mi Thianghlima chu i ni tih kan awih ta a, hriat pawh kan hria e,” a ti a, a chhâng a.

⁷⁰Tin, Isuan an hnênah, “Nangni sâwm leh pahnihte hi keima thlan in ni lâwm ni? In zînga mi pakhat Diabola a ni lehnghâl vei nên,” a ti a.

⁷¹(Iskariot Simona fapa Juda, sâwm leh pahnihte zînga tel vea thu kha a sawi a ni, ani chu a mantîrtu tûr a ni si a.)