Read Mizo_Old_version CHANCHIN ṬHA JOHANA ZIAK 7 Bible Online

CHANCHIN ṬHA JOHANA ZIAK 7 - Mizo_Old_version bible

CHANCHIN ṬHA JOHANA ZIAK 7

¹Chumi zawhah chuan Isuan Galili ram a fang a; Juda-ten amah tihhlum an tum avângin Judai ram chu a fang duh lo va.

²Tin, Juda-te bâwkte kût chu a hnai tawh a.

³Chutichuan, a unauten a hnênah, “Heta ṭang hian Judai ramah va kal rawh, i zirtîrte pawhin i thiltih hi an hmuh theih nân.

⁴Tu mân a rûkin thil eng mah an ti lo, mahni hmingthan duh siin. Hêng thilte hi i tih takzet chuan khawvêl hnênah inentîr rawh,” an ti a.

⁵(A unaute pawh chuan amah an ring si lo va.)

⁶Tin, Isuan an hnênah, “Ka hun a la thleng lo; nangni hun erawh chu kumkhuain a thleng reng a ni.

⁷Khawvêlin nangni an haw thei lo a che u, kei erawh chu mi haw ṭhîn, an thiltihte a sual tih ka hrilhfiah ṭhin avângin.

⁸Nangni kûtnaah han kal rawh u, kei zawng tûn kûtah hian ka han kal dâwn rih lo ve, ka hun a la thlen loh avângin,” a ti a.

⁹Tin, chûng thu chu an hnênah a sawi a, Galili ramah a la awm reng a.

¹⁰Nimahsela, a unaute chu kûtnaa an chhoh tâk hnu chuan, ani pawh vântlâng hriat lohvin, a rûk angin a han kal ve a.

¹¹Tin, Juda-ten kûtnaah chuan ani chu an zawng a, “Khawiah nge a awm?” an ti a.

¹²Tin, a chungah mipuite zînga mi chu an phun ru sup sup a, a ṭhenin, “Mi ṭha a ni e,” an ti a; ṭhenkhatin, “Hnai lo ve, mipui a bum zâwk ṭhîn a ni,” an ti a.

¹³Nimahsela, Juda-te an hlauh avângin tu mân a chungchâng thu an sawi lang lo.

¹⁴Tin, kût vânglai takin Isua chu Pathian biak inah a han kal a, a zirtîr a.

¹⁵Tin, Juda-ten, “He mi hian zir ngai lovin engtin nge lehkha a thiam?” an ti a, mak an ti hle a.

¹⁶Tin, Isuan anni chu a chhâng a, “Ka thu zirtîr hi ka ta a ni lo va, mi tîrtu ta a ni zâwk.

¹⁷Tu pawh ama duh zâwng tih duh chuan, ka thu zirtîr hi Pathian tihchhuah nge keima phuah chawpa ka sawi a hria ang.

¹⁸Tu pawh mahni phuah chawp thu sawi chu, mahni mawina zawng a ni; a tîrtu mawina zawng erawh chu, chu mi chu mi takzet a ni, amahah chuan dik lohna rêng a awm lo.

¹⁹Mosian dân chu in hnênah a pe lo che u em ni? Nimahsela, in zîngah tu mahin dân chu in zâwm si lo. Nangnin engati nge min tihhlum in tum?” a ti a.

²⁰Tin, mipui chuan, “Ramhuai zâwl i nih hi; tuin nge tihhlum tum che?” an ti a, an chhâng a.

²¹Tin, Isuan a chhâng a, an hnênah, “Thil pakhat ka tih kha nangni zawng zawngin mak in tih hi.

²²Hemi avâng hian a ni, Mosian serh tan thu kha a pêk che ua (Mosia tihchhuah a ni si lo va, thlahtute tihchhuah a ni zâwk si a), Chawlhni pawha mi serh in tan ṭhin ni.

²³Mosia dân bawhchhiat loh nân, Chawlhniah pawh mipain a serh a tantîr si chuan, keiin Chawlhnia mi ka tihdam tâk viah avângin ka chungah in thinur bîk maw?

²⁴A lan angin ngaihtuah suh ula, fel takin ngaihtuah zâwk rawh u,” a ti a.

²⁵Tin, Jerusalem khuaa mi ṭhenkhatin, “He mi hi tihhlum an tuma chu a ni lâwm ni?

²⁶En teh u, a langin thu a sawi a, a hnênah eng mah an sawi si lo. Amah hi Krista a ni tih hotuten an hre ta takzet em maw ni aw?

²⁷He mi hi a pianna chin lam kan hre si a, Krista erawh chu a lo thlen hunah chuan a pianna chin tu mân an hre lo vang,” an ti a.

²⁸Chu vâng chuan, Isua chu Pathian biak ina a zirtîr pahin a au va, “Nangnin mi hria e, ka pianna chin pawh in hria e; nimahsela, mahni thua lo kal ka ni lo, mi tîrtu hi mi takzet a ni, ani chu in hre si lo.

²⁹Kei erawh chuan ani chu ka hria; a hnên aṭanga lo chhuak ka ni a, ani chuan mi tîr a ni si a,” a ti a.

³⁰Chutichuan, ani chu man an tum a; nimahsela, a hun a la thlen loh avângin tu mân an khawih si lo.

³¹Mipui zînga tam tak erawh chuan ani chu an ring a, “Krista chu a lo thlen hunah, he mi tih aia tam zâwk thil mak a rawn ti ang em ni?” an ti a.

³²Tin, Pharisaiten a chunga mipui phun rûkna thute chu an hria a; tichuan, puithiam lalte leh Pharisaiten amah man tûrin tiang kengtute an tîr ta a.

³³Tin, Isuan, “Rei lo tê in hnênah ka awm rih zet ang a, mi tîrtu hnênah ka kal ang.

³⁴Nangnin mi zawng ang a, mi hmu si lo vang; ka awmnaah pawh in lo kal thei lo vang,” a ti a.

³⁵Tin, Juda-te chu an inbia a, “Kan hmuh loh tûrin he mi hi khawiah nge a kal dâwn? Grik-te zînga Pêm darhho hnêna kalin Grik-te chu a zirtîr dâwn em ni ang?

³⁶‘Nangnin mi zawng ang a, mi hmu si lo vang a; ka awmnaah pawh in lo kal thei lo vang,’ a tih hi eng a tihna nge ni ang?” an ti a.

³⁷Tin, kût ṭiak dâwn ni, ni ropui berah chuan Isua a ding a, a au va, “Tu pawh a tuihâl chuan ka hnênah lo kal sela, in rawh se.

³⁸Tu pawh mi ring chu, Pathian Lehkha sawi angin, tui nung luite a pumah a lo luang chhuak ang,” a ti a.

³⁹(Chûng thu chu amah ringtuten Thlarau an la neih tûr thu a sawina a ni; Thlarau chu pêk a la ni rih lo, Isua chu chawimawia a la awm loh avângin.)

⁴⁰Chutichuan, mipui zînga ṭhenkhatin chûng thu chu an hriatin, “Hei hi zâwlnei chu a nih tak hi,” an ti a.

⁴¹Ṭhenkhatin, “Hei hi Krista chu a ni,” an ti a. Ṭhenkhat erawh chuan, “Khawnge Krista chu Galili rama a lo chhuah tehlul ang?

⁴²Krista chu Davida thlahte zîngah, Davida awmna khua Bethlehem aṭanga chhuak tûr a ni tih Pathian Lehkhain a sawi lo vem ni?” an ti a.

⁴³Chutichuan, amah avângin mipui chu an inṭhen a, an inkhing ta a.

⁴⁴Ṭhenkhat chuan man an duh a; nimahsela, tu mân an khawih si lo.

⁴⁵Tin, tiang kengtute chu puithiam lalte leh Pharisaite hnênah an lo kal leh a; tin, anni chuan an hnênah, “Engati nge in rawn hruai loh?” an lo ti a.

⁴⁶Tiang kengtute chuan, “Sawtiang rêngin miin thu an sawi ngai lo,” an ti a, an chhâng a

⁴⁷Tin, Pharisaite chuan an hnênah, “Nangni pawh bumin in awm ve ta elo?

⁴⁸Hotute leh Pharisaite zînga mi rêng rêng amah ring an awm tawh em ni?

⁴⁹Hêng dân hre lo mipuite tehchai hi ânchhe dawng an ni asin,” an ti a, an chhâng a.

⁵⁰Nikodema, hmâna Isua hnêna lo kal kha, an zînga tel ve a ni a, an hnênah,

⁵¹“Ama kâ ngeia a thu hriat leh a thiltih hriat hmain, kan dânin mi thiam loh a chantîr ngai em ni?” a ti a.

⁵²Anni chuan a hnênah, “Nang pawh chu Galili mi i ni ve elo? Zawng la, Galili ramah chuan zâwlnei tu mah chhuak tûr an awm lo tih hre ta che,” an ti a, an chhâng a.

⁵³Tin, mi tin mahni in ṭheuhvah an kal ta a.