Read Mizo_Old_version CHANCHIN ṬHA JOHANA ZIAK 9 Bible Online

CHANCHIN ṬHA JOHANA ZIAK 9 - Mizo_Old_version bible

CHANCHIN ṬHA JOHANA ZIAK 9

¹Tin, Isuan a kal pahin a pian tirh ata mitdel pakhat a hmu a.

²Tin, a zirtîrten a hnênah, “Rabbi, mitdel saa a pian hi tuin nge thil tisual, he mi hian nge a nu leh a pain?” an ti a, an zâwt a.

³Isuan, “He mi hian a tisual lo, a nu leh a pain an tisual hek lo; Pathian hnathawh a chunga a lanna tûr a nih zâwk hi.

⁴Chhûn a nih laiin mi tîrtu hna kan thawk tûr a ni; zân a nih dâwn tâk hi, chumi hunah chuan tu mân hna an thawk thei lo vang.

⁵Khawvêla ka awm chhûngin khawvêl êntu ka ni,” a ti a, a chhâng a.

⁶Chutianga a sawi zawh chuan leiah chil a chhâk a, chil chuan hlum a siam a, hlum chu a mitah a hnawih a,

⁷tin, a hnênah, “Siloam dîlah va sil rawh,” a ti a (Siloam chu “Tirh” tihna a ni). Tichuan, a va kal a, a sil a, mitvârin a lo haw leh ta a.

⁸Chutichuan, a vêngte leh hmâna a kutdawh hmu ṭhînten, “He mi hi ṭhu chunga kutdawh ṭhîna kha a ni lo vem ni?” an ti a.

⁹Mi dangin, “Ani kha a nih hi,” an ti a. Mi dangin, “A ni lo ve, a anpui a nih zâwk hi,” an ti a. Ani chuan, “Kha kha ka ni,” a ti a.

¹⁰Tin, anni chuan a hnênah, “I mit engtin nge a lo vâr le?” an ti a.

¹¹Ani chuan, “Isua an tih khân hlum a siam a, ka mitah a hnawih a, ‘Siloam dîlah va kal la, sil rawh,’ mi ti a; chutichuan, ka va kal a, ka sil a, mitvârna ka hmu ta a nih hi,” a ti a.

¹²Tin, anni chuan a hnênah, “Ani chu khawiah nge a awm?” an ti a, “Ka hre lo,” a ti a.

¹³Tin, chumi hmaa mitdela chu Pharisaite hnênah an hruai a.

¹⁴Tin, Isuan hlum a siama, a mit a tihvâr ni kha Chawlhni a ni a.

¹⁵Chutichuan, Pharisaiten a mit a lo vâr tâk dânzia an zâwt leh a. Ani chuan an hnênah, “Ka mitah hlum a dah a, ka sil a, ka hmu thei ta mai a ni,” a ti a.

¹⁶Tin, Pharisai ṭhenkhatin, “Chu mi chu, Chawlhni a puithu loh avângin Pathian hnên aṭanga chhuak a ni lo vang,” an ti a. ṭhenkhat erawh chuan, “Mi sualin engtin nge hetiang thil mak a tih theih ang?” an ti a. Chutichuan, an inṭhen a, an inkhing ta a.

¹⁷Tin, mitdel hnênah chuan, “I mit a tihvâr kha, nang eng angin nge amah chu i ngaih?” an ti leh a. Tin, ani chuan, “Zâwlnei a ni,” a ti a.

¹⁸Nimahsela, Juda-ten a mit lo vâr taa nu leh pa chu an koh hma loh chuan, mitdel a ni ṭhîn a, a mit a lo vâr ta tih, a chungchâng thu chu an awih lo va.

¹⁹Tin, a nu leh a pa hnênah, “He mi hi in fapa, mitdel saa piang a ni in tih kha a ni em? Engtin nge tûnah a hmuh theih tâk le?” tiin an zâwt a.

²⁰Tin, a nu leh a pa chuan, “Hei hi kan fapa a ni tih kan hria, mitdel sain a piang tih pawh kan hria;

²¹nimahsela, engtin nge tûnah hian a lo hmuh theih tâk hi kan hre lo, a mit tivârtu pawh kan hre hek lo; amah zâwt rawh u; patling a ni alâwm; ama thu chu aman sawi ang hmiang,” an ti a, an chhâng a.

²²Juda-te an hlauh avângin a nu leh a pa chuan chûng thu chu an sawi a ni; Juda-ten, chûng hma pawh chuan tu pawhin, “Ani chu Krista a ni,” tia a ṭan chuan inkhâwmna in a hnawng ang tih an remti tlâng si a.

²³Chu vâng chuan a ni, a nu leh a pa chuan, “Patling a ni alâwm, amah zâwt rawh u,” an tih ni.

²⁴Chutichuan, mitdel chu an ko nawn leh a, a hnênah, “Pathian fak rawh, kha mi kha zawng mi sual a ni tih kan hria e,” an ti a.

²⁵Tin, ani chuan, “Mi sual a ni nge ni lo ka hre lo; kawng khat ka hria, tûn hma khân ka mit a del a, tûnah ka hmuh theih tâk hi,” a ti a, a chhâng a.

²⁶Tin, anni chuan a hnênah, “I chungah engtin nge a tih? I mit engtin nge a tihvâr?” an ti a.

²⁷Tin, ani chuan an hnênah, “Nichinah khân ka hrilh che u kha, in hre duh si lo; engati nge in hriat leh duh tâk ni? Nangni pawh a zirtîrte nih ve in duh elo?” tiin a chhâng a.

²⁸Tin, anni chuan an hau va, “Nang hi ama zirtîr i ni a, keini zawng Mosia zirtîrte kan ni asin.

²⁹Pathianin Mosia a bia tih kan hria, he mi tehchai hi khawi aṭanga lo chhuak nge a nih kan hre hrep lo ve,” an ti a.

³⁰Tin, chu mi chuan an hnênah, “Chu tak chu a ni a makna chu, khawi aṭanga lo chhuak nge a nih in hriat lohva, ka mit a tihvâr miau si hi.

³¹Pathianin mi sual thu a ngaithla ṭhîn lo tih kan hria; nimahsela, tu pawhin Pathian a ngaihsaka, a duh zâwng a tih chuan Pathianin ani chu a ngaithla ṭhîn.

³²Khawvêl awm tirh ata tu mân mitdel saa piang mit an tivâr leh tih an hre ngai lo.

³³He mi hi Pathian hnên aṭanga chhuak a nih loh chuan eng mah a ti thei lo vang,” a ti a, a chhâng a.

³⁴Tin, anni chuan a hnênah, “Nang sual lailet dêra piang i ni alâwm, nangin min hrilh vei em ni?” an ti a, an chhâng a. Tichuan, ani chu an hnawt chhuak ta a.

³⁵Tin, an hnawt chhuak tih Isuan a lo hria a; tin, a zawng chhuak a, “Pathian Fapa i ring em?” a ti a.

³⁶Tin, ani chuan, “Ka pu, ani chu tu nge ni, ka rin theih nân?” a ti a, a chhâng a.

³⁷Isuan a hnênah, “Ani chu i hmu tawh reng alâwm, a betu mêk che hi a ni asin,” a ti a.

³⁸Tin, ani chuan, “Lalpa, ka ring e,” a ti a, chibai a bûk a.

³⁹Tin, Isuan, “Rorêl tûrin he khawvêlah hian lo kal ka ni, mitdelte chu an mit a lo vârna tûr leh, mitvârte chu an mit a lo delna tûrin,” a ti a.

⁴⁰Tin, a hnêna Pharisai awmte chuan chûng thu chu an hria a, a hnênah, “Keini pawh hi mitdel kan ni ve elo?” an ti a.

⁴¹Tin, Isuan an hnênah, “Mitdel in nih chuan sual in nei lo vang; nimahsela, ‘Kan hmu thei e,’ tûnah in ti si a; chuvângin, in sual a awm reng a ni.