Read Mizo_Old_version TIRHKOHTE THILTIH 1 Bible Online

TIRHKOHTE THILTIH 1 - Mizo_Old_version bible

TIRHKOHTE THILTIH 1

¹Theophil, hmâna lehkhaah khân, Isua thiltih leh a zirtîr ṭan tirh zawng zawng thu kha ka ziak a ni;

²Thlarau Thianghlim ṭanpuia a tirhkoh thlante hnêna thu a tiam zawha vâna hruai chhohva a awm tâk ni thlenga thu kha.

³Chu tirhkohte hnênah chuan hrehawm chu a tuar hnuin hriatna tam takin nungin a inentîr a, ni sawmli zet an hnênah a inlâr a, Pathian ram thu a sawi ṭhîn.

⁴Tin, an awm khâwm a pâwl ve a, “Jerusalem khua kalsan suh u, Pa thil tiam ka sawi in hriat kha lo nghâk rawh u,” a ti tlat a.

⁵“Johana khân tuiin a baptis ṭhîn a; nimahsela, ni rei lo têan Thlarau Thianghlimin baptisma in chang ang,” a ti a.

⁶Tin, anni chuan an rawn inkhâwmin a hnênah, “Lalpa, tûnah em ni Israel-te hnênah ram i pêk leh dâwn?” an ti a, an zâwt a.

⁷Tin, ani chuan an hnênah, “Pain a hun leh a ni, ama thu thua awma a ruat chu, nangni lo hriat tûr a ni lo ve.

⁸Nimahsela, Thlarau Thianghlim chu in chunga a lo thlen hunah thiltihtheihna in la nei ang; tichuan, Jerusalem khuaah te, Judai leh Samari ram khaw tinah te, kâwlkil thleng pawhin ka thuhretute in ni ang,” a ti a.

⁹Tin, chûng thu chu a sawi zawhin an hmuh reng chungin vâna hruai chhohvin a awm a; tin, chhûmin an hmuh phâk lohvah a hruai bo ta a.

¹⁰Tin, a chhoh laia vân lam an en reng laiin mi pahnih, puan vâr sinin an kiangah an lo ding a;

¹¹chu mite chuan, “Galili rama mite u, engati nge vân lam ena in din reng? He Isua, in hnên ata vâna hruai chhohva a awm hi, vâna a chho in hmu ang bawk hian amah ngei hi a lo kal leh ang,” an ti a.

¹²Tin, Olivet tlâng an tih ata chu Jerusalem khuaah an kîr leh ta a; chumi tlâng chu Jerusalem khaw kiang a ni a, Chawlhnia kalna tâwk chauh a ni.

¹³Tin, an luhin, an awmna pindan chungnungah chuan an chho va, Petera leh Johana nên, Jakoba leh Andria nên, Philipa leh Thoma nên, Bartholomaia leh Matthaia nên, Alphaia fapa Jakoba leh Simona, Zelot pâwla mi leh Jakoba fa Juda nên an ni.

¹⁴Chûngho zawng zawng chu hmeichhia tute emaw leh Isua nu Mari nên, Isua unaute nên, rilru hmun khata ṭhahnemngai taka ṭawngṭaiin an awm reng a.

¹⁵Tin, chûng ni chuan unaute zîngah Petera a ding a, an za chuan za leh sawmhnih lai an ni a,

¹⁶“Unaute u, Thlarau Thianghlimin Davida kaa, Isua mantute hruaitu Juda thu a sawi lâwk kha, kha Pathian Lehkha Thu kha lo thleng rêng tûr a ni.

¹⁷Ani chu kan zînga chhiar tel a ni a, hêng rawngbâwlnaah hian chan pawh a nei ve si a.

¹⁸(Tin, chu mi chuan a sual manin hmun pakhat a lei a, bawkkhupin a tla a, a laiah a puak keh a, a rîl zawng zawng a chhuak vek a.

¹⁹Tin, chûng thu chu Jerusalem khuaa awmte zawng zawngin an lo hria a; chutichuan, chu hmun chu anmahni ṭawngin ‘Akeldama’ an ti a, chu chu ‘Thisen Hmun’ tihna a ni.)

²⁰“Fakna Hla Buah hêng thu hi ziak a ni: ‘A awmna tihramin awm rawh se, A chhûngah tu mah awm suh se,’ tih leh, ‘A hotu nihna chu mi dangin chang rawh se,’ tih hi.

²¹“Chutichuan, Lal Isua, kan zînga lût ṭhîn, chhuak ṭhîna a awm chhûng zawnga, Johana baptisma achin, kan hnên ata vâna hruai chhohva a awm ni thleng khân, hêng min pâwl ṭhînte zîngah hian mi pakhat, a thawhlehna min hriatpuitu atân a awm tûr a ni,” a ti a.

²³Tin, mi pahnih an ruat a, pakhat chu Josefa, Barsaba an tiha chu (a hming dang Justa an ti bawk a); tin, pakhat chu Matthia a ni a.

²⁴Tin, an ṭawngṭai a, “Nang, Lalpa, mihring zawng zawng rilru hretu, Juda chuan ama awmnaa kal tûrin hêng rawngbâwl leh tirhkoh hna a tlâwmsan hi, a ai awh tûrin he mite pahnih hi, a tu zâwk nge i thlan min hriattîr ang che,” an ti a.

²⁶Tin, ai an ensak a, an ai en chu Matthia chungah a lo tlu a; tichuan, ani chu tirhkoh sâwm leh pakhatte zîngah chuan chhiar tel a ni ta a.