Read Mizo_Old_version TIRHKOHTE THILTIH 10 Bible Online

TIRHKOHTE THILTIH 10 - Mizo_Old_version bible

TIRHKOHTE THILTIH 10

¹Tin, Kaisari khuaah a hming Kornelia mi pakhat a awm a, Itali pâwl an tih, chumi pâwla sipai za hotu a ni a,

²Pathian ngaihsak mi a ni a, a chhûngte zawng zawng nên Pathian an tih ṭhîn a, mite hnênah thil tam tak a pe ṭhîn a, Pathian hnênah pawh a ṭawngṭai fo va.

³Chu mi chuan behliang mun hun lai vêlah, mumang angin fiah takin Pathian vântirhkoh pakhat a hnêna lûta, “Korneli,” tiin a hmu a.

⁴Tin, Kornelia chuan ani chu a lo en reng a, a hlau va, “Lalpa, eng nge ni?” a ti a. Tin, ani chuan a hnênah, “I ṭawngṭainate leh i thilpêk thute kha hriat reng tûrin Pathian hmaah a thleng chho ta a.

⁵Tûnah Joppa khuaah mite tîr la, mi pakhat Simona, Petera an tiha chu, han hruaitîr rawh;

⁶savun siamtu Simona hnênah a thleng a ni, a in chu tuifinriat kamah a awm,” a ti a.

⁷Tin, vântirhkoh a betu chu a kal veleh, Kornelia chuan a chhiahhlawhte zînga mi pahnih leh a rawngbâwl fote zînga Pathian ngaihsak sipai pakhat a ko va;

⁸tin, thu zawng zawng chu an hnênah a hrilh zawhin Joppa khuaah chuan a tîr ta a.

⁹Tin, a tûkah chuan, an kal laia khaw kiang an thlen dâwnin, Petera chu ṭawngṭai tûrin, chawfâk hun laiin in chungah a lâwn chho va;

¹⁰tin, a ril a lo ṭâm a, chaw ei a duh ta a; nimahsela, ei tûr an siam lai chuan englovin a zêl ta a.

¹¹Tin, vân inhawngin englo bâwm, puan lian tak ang, a kil lia hlina leia uai thlain a hmu a;

¹²chumi chhûngah chuan fuliafa leh rannung leh chunglêng sava tinrêngte an awm a.

¹³Tin, a hnênah awin, “Peter, tho rawh; talh la, ei rawh,” a rawn ti a.

¹⁴Nimahsela, Petera chuan, “Lalpa, ni lo ve; thiang lo leh bawlhhlawh eng mah rêng ka ei ngai lo ve,” a ti a.

¹⁵Tin, aw chuan a vawi hnihnaah, “Pathianin a tihthianghlim tawh chu nangin thiang lo ti suh,” a ti a.

¹⁶Chutiang hlîr chuan vawi thum a lo awm a; tin, bâwm chu vâna khai chhohvin a awm leh ta nghâl a.

¹⁷Tin, Petera chuan mumang anga a hmuh chu a ngaihna hre lova a mangan laiin, Kornelia mi tirhte chuan Simona in chu an lo zâwt chhuak tawh a, kawngkhâr bulah an lo ding a,

¹⁸an au va, Simona, Petera an tiha chu, chutah chuan a thlen leh thlen loh an zâwt a.

¹⁹Tin, Petera chuan a mumang ang thu chu a ngaihtuah laiin Thlarauvin a hnênah, “Ngai teh, mi pathumin an zawng a che.

²⁰Chutichuan, tho la, chhuk la, eng mah ringhlel lovin anmahni zui rawh; anni chu ka tirh an ni e,” a ti a.

²¹Chutichuan, Petera chu, chu mite hnênah chuan a chhuk a, an hnênah, “In zawn hi ka ni e; eng nge in rawn kal chhan?” a ti a.

²²Tin, anni chuan, “Vântirhkoh thianghlim pakhatin Kornelia, sipai za hotu, mi fel tak, Pathian ṭih, Juda hnam zawng zawng zînga mi hmingṭha hnênah chuan i thusawi a hriat nân, a inah nangmah ko tûr chein a hrilh a ni,” an ti a.

²³Chutichuan, mite chu a ko lût a, a riahtîr ta a. Tin, a tûkah chuan Petera chu a tho va, an hnênah a kal a, Joppa khuaa mi unau tute emaw pawh a hnênah an kal ve a,

²⁴Tin, a tûk lehah Kaisari khuaah chuan an lût ta a. Tin, Kornelia chuan a laichînte leh a ṭhian duh berte ko khâwmin, anni chu a lo nghâk reng a.

²⁵Tin, Petera chu a luh dâwn lai takin Kornelia chuan a lo hmuak a, a ke bulah a bawkkhup a, Pathian chibai bûk angin a bûk a.

²⁶Nimahsela, Petera chuan ani chu a kai tho va, “Ding rawh, kei pawh mihring ka ni alâwm,” a ti a.

²⁷Tin, a hnênah thu sawi chungin a lût a, mi tam tak awm khâwm chu a va hmu a.

²⁸Tin, an hnênah, “Juda miin hnam dang pâwl leh an hnêna kal a thian lohzia nangnin in hria e; nimahsela, tu mah thiang lo leh bawlhhlawh ka ti tûr a ni lo tih Pathianin mi hriattîr a ni.

²⁹Chuvângin, mi rawn koh veleh khân hnial lovin ka lo kal ta a nih hi. Tichuan, ka zâwt a che u, eng nge mi rawn koh chhan le?” a ti a.

³⁰Tin, Kornelia chuan, “Ni li a ni ta, tûn hun ang thleng hian ka inah, behliang mun hun ṭawngṭainaah ka ṭawngṭai a; tin, ngai teh, mi pakhat puan êng tak sinin ka hmaah a lo ding a,

³¹‘Korneli, i ṭawngṭaina kha hriatin a awm ta, mi hnêna i thilpêkte pawh kha Pathianin a hre reng a.

³²Chuvângin, Joppa khuaah mi tîr la, Simona, Petera an tiha chu, i hnênah ko rawh; ani chu tuifinriat kamah savun siamtu Simona inah a thleng a ni,’ a ti a.

³³Chuvângin, i hnênah mi ka rawn tîr ta nghâl a ni; i lo kal hi a ṭha e. Chutichuan, Lalpan thu a pêk apiang che hre tûrin, tûnah Pathian mit hmuhin kan zain hetah kan awm a nih hi,” a ti a.

³⁴Tin, Petera chuan a sawi a: “Pathianin mi duhsak bîk a nei lo tih dik takin ka hria e;

³⁵nimahsela, hnam tin zîngah tu pawh amah ṭiha, fel taka ti apiang a lâwm zâwng mi an ni ṭhîn.

³⁶Ani chuan thlamuanna Chanchin Ṭha Isua Krista kaa hrilin, Israela thlahte hnênah thu a thawn a (Isua chu mi zawng zawng Lal a ni a),

³⁷Johanan a tlângaupui ṭhin baptisma zawhah khân, thu, Galili ram aṭanga lo thang ṭana, Judai ram zawng zawnga thang chhuak kha, nangnin in hre bawk alâwm;

³⁸Nazareth Isua chungchâng thu kha, khatia Pathianin ani chu Thlarau Thianghlim leh thiltihtheihnaa a vûrzia kha; ani chuan mi chunga tiṭha leh, Diabola tihduhdah zawng zawng tidamin a fang vêl ṭhîn a, a hnênah Pathian a awm avângin.

³⁹Juda-te ramah leh Jerusalem khuaa a thiltih zawng zawng hretute kan ni e; ani chu thinglêrah khaiin an tihlum ta a.

⁴⁰Pathianin ani chu ni thum niah a kaitho leh a, fiah takin a entîr a;

⁴¹amaherawhchu, mi zawng zawng hnênah a ni lo, Pathianin hretua a ruat lâwkate hnênah chauh a ni, keimahni, mitthi zîng ata a thawhleh hnua a hnêna eia bârte hnênah hian.

⁴²Ani chu mitthite leh mi nungte chunga Rorêltua Pathian ruat chu a ni tih, mi hnêna tlângaupui leh hriattîr tûrin Pathianin thu min pe a ni.

⁴³Tu pawh amah chu ring apiang, a hming avângin sualte ngaihhnathiamin an awm ang tih, hêng a chanchin hi zâwlnei zawng zawngin an hriattîr ṭhin kha,” a ti a.

⁴⁴Tin, Peteran chûng thu a sawi lai tak chuan, thuhretu zawng zawng chungah chuan Thlarau Thianghlim a lo thleng ta a.

⁴⁵Tin, serh tanho zînga ringtute, Petera rawn zui apiang chuan, Thlarau Thianghlim pêk chu Jentailte chungah pawh leih a nih avângin mak an ti hle a;

⁴⁶ṭawng hriat lohtea thu sawiin Pathian fakin an hre si a. Tin, Peteran a bia a,

⁴⁷“Hêng mite, keimahni anga Thlarau Thianghlim hmu ve hi, baptisma an chan loh nân miin tui hman an khap thei em ni?” a ti a.

⁴⁸Tichuan, Isua Krista hminga baptisma chan tûr thu a pe a. Chûng zawhah chuan ni eng emaw zât châmah an ngên a.